متلازمة اليد الغريبة: مرض أعصاب بيحرك الإيد بدون إرادة صاحبها

31/03/2019

بقينا كل فترة نسمع عن أمراض ماكناش بنسمع عنها، لكن عمرك قبل كده سمعت إن ممكن مرض يصيب إيد شخص ويتسبب في موته؟ مرض متلازمة اليد الغريبة هو من ضمن الأمراض العصبية ومن أخطرها وبيسبب "حركة الإيد بشكل لا إرادي"، وساعات بتتأثر على رجل واحدة لكن الأمر ده مش شائع أوي.

هو عبارة عن مرض عصبي بيعاني فيه المريض من عدم القدرة على السيطرة على إيده، بتبقى كأنها إيد شخص تاني، والمرض ده بيبقى نتيجة عن إصابة في المخ أو إن المريض بيبقى معتمد على فص واحد من فصين المخ، في الغالب الإيد دي بتكون الإيد الشمال، وفيه حالات بتقول إن إيدها حاولت إنها تضرها.

من أبرز أعراض متلازمة الإيد الغريبة إن الشخص مابيبقاش قادر يتحكم في إيده، لإنها بتتحرك بشكل مستقل وبتعمل سلوكيات عدوانية وغريبة زي شد الشعر، وتقطيع الهدوم، أو لمس أي مكان في الجسم قدام الناس، والأكل بطريقة عشوائية وملي الفم بالأكل، وممكن يوصل الموضوع إن الشخص يقول إن دي مش إيده مثلا وهي إيد شيطان في جسمه، ده غير إن الأخطر هو إن الشخص ممكن يخنق نفسه أو يضرب نفسه أو يضرب الناس اللي جنبه.

من العوامل المسببة لحدوث المتلازمة هي بعد التعرض لسكتة دماغية أو صدمة أو أحيانا بيرتبط بالسرطان والأمراض العصبية أو تمدد الأوعية الدموية في الدماغ.

للأسف لحد دلوقتي ماظهرش أي علاج للمرض ده، بس كل اللي العلم وصل له إنهم يقللوا تطورات الأعراض، وفيه أساليب لزيادة تحكم المخ في الإيد زي إن الشخص يشغلها عشان يقدر الشخص يوصل لطريقة تدريجية للسيطرة على إيده نوعا ما.

بدأ اكتشاف المرض في سنة 1908 على يد الدكتور الألماني كورت جولدشتاين في تقرير مفصل عن أغرب الحالات المرضية في التاريخ، واتكلم عن ست أربعنية بعد ما نجت من الجلطة الدماغية لكن حصل لها شلل نصفي في النص الشمال، ومع الوقت تعافت تدريجياً لكن بعد 10 شهور من العلاج لاحظت إن إيدها بتتحرك بشكل عشوائي وهي مش عارفة تتحكم فيها، وقال دكتور كورت جولدشتاين إن حالة إيدها اتطورت وإن حالتها النفسية بقيت أوحش بسبب إيده لإنها كانت بتحلف إن دي إيد شخص تاني، وبعد سنين من المعاناة انتهت قصتها وماتت.

Comments: