٥ أسباب يعرفوك ليه كلنا بنحب الفضايح

04/04/2019


التريندات اللي بتعتمد على النم والفضايح بتفضل مستمرة لفترة طويلة، ومهما كانت الفضايح اللي فيها فالناس بتتكلم عنها وعن تفاصيلها سواء كان على السوشيال ميديا أو في يومهم وقعداتهم العادية.

استغربنا جدا عشان إحنا بنحب الفضايح وبنتكلم فيها وعنها عشان كده دورنا ولقينا موقع psychology today بيكشف 5 أسباب ليه الناس بتحب الفضايح:

1- بيكون فيه سعادة في إنك تخترق المساحة الشخصية لشخص معين، ده غير إن فيه متعة أو سعادة غريبة في اختراق القوانين، وكشف فضيحة في حياة حد الشخصية غالبا ما بتكون مغرية عشان بتخترق قوانين ومساحة الشخص الخاصة.

2- فيه متعة الشخص بيلاقيها في إنه بيعاقب المخالف، وبيكون فيه شعور بالرضى لما الشخص اللي غلطان يتعرض للإهانة، لإن ده بيعيد فكرة إن الكون مكان عادل وفيه أخلاق، ده غير إن الفضايح بتوضح إن فيه ناس طيبين وناس أشرار.

3- وفيه متعة كمان إنك تشوف شخص بيفلت من العقاب، وإن الشخص اللي عمل الفعل الغلط مش هيتعاقب وده غالبا شئ مثير بيخليك تبقى متابع الموضوع للأخر

4- ده غير إن في الآخر بيتطلب منك كمتلقي للفضيحة إنك تسامح وتتخطى اللي حصل وده بيحسس الشخص بالقوة والانتصار والمفروض إن إنت كشخص في موقف قوة توافق إنك تسامح أو ترفض وده بيدي إحساس بالقوة أكتر وبيحسسك إنك في مكان أحسن

5- ويمكن الحاجة الأهم من كل ده هو إنك هتلاقي حاجة تتكلم فيها بعيد عن المشاكل الصعبة اليومية، ده غير إنك لما هتتكلم عن مشكلة حد وصلت لحد الفضيحة هتحس إن مشاكلك اليومية دي سهلة وصغيرة وممكن تعديها.

Comments: