مراجعة الموسم الأول من جيم أوف ثرونز: نبتدي منين الحكاية؟

04/04/2019

 

كتب: كابتن بسلة


يوم 14 أبريل اللي جاي هيبدأ الموسم التامن والأخير من المسلسل اللي قلب الدنيا "جيم أوف ثرونز" وبسبب إن الموسم الأخير ده أخد سنتين عشان يخلص مش زي كل موسم قبله فاحنا كفانز للمسلسل بنبقى محتاجين مراجعة سريعة كدة تنشط الذاكرة على خفيف لأن مفيش وقت لإعادة مشاهدة كل حلقات المسلسل عشان عندنا شغل وبننام بدري والوقت مابقاش في صالحنا.
 


ودي مراجعة الموسم الأول من المسلسل.. فهيا بنا نتذكر يا أصدقاء:

شوية شباب من النايت واتش اتحركوا شمال الـ Wall في مهمة استطلاع بيطلعلهم "وايت ووكر" يقتلهم وبيهرب منهم واحد ويرجع لوينترفيل وبيحكي اللي شافه و"نيد ستارك" بيعدمه عشان خان قسم النايت واتش وتخلى عن مكانه وبيبدأ يقلق شوية من اقتراب الشتاء ويرجع يحذر الناس في الرايحة والجاية Winter is Coming!
 

 في الوقت ده بيجيله زيارة من الملك "روبرت براثيون" صديقه الأنتيم القديم ويقوله يا نيد عايزك تيجي –لامؤخذة- تمسك منصب Hand of the King بعد ما مات في ظروف مريبة "جون أرين" اللي كان ماسكه وتعالى عيش معاي في "كينجزلاندينج" ونجوز الواد "جوفري" لسانسا بنتك ونوفق راسين في الحلال عشان أنا مابقتش أثق في حد.

 ساعتها "بران" ابن نيد الصغير شاف في البرج "جيمي لانستر" يمارس لامؤخذة الرذيلة مع أخته – استغفر الله العظيم يارب- "سيرسي لانستر" واللي هي تبقى مرات الملك وبنت "تايون لانستر" فجيمي يذق الواد بران عشان يقتله من فوق البرج ومايفضحهمش قام ما متش ودخل في غيبوبة وأتشل وحصلت محاولة لقتله وهو في سريره بقاتل معاه خنجر "تيريون لانستر"!

"تيريون لانستر" القزم العبقري أخو جيمي وسيرسي اللي مش بيطيق سيرسي ولا أبوه قابل "جون سنو" وهو رايح يخدم في النايت واتش وقاله ما تشوف بالمرة وإنت هناك حوار الوايت ووكرز دول يمكن يطلع بجد ومشي وبعد كدة تم إتهامه إنه حاول يقتل الواد "بران" وهو في الغيبوبة –مع إنه برىء- وخطفته "كاتلين" مرات نيد ستارك وراحت به عند أختها وخالة بران وأرملة "جون أرين" في الـ Vale وقالتله هعدمك هنا يابن اللانستر يا وغد، قالها أنا عايز محاكمة بالمبارزة وأقنع "برون" يقاتل بداله وبقوا صحاب بعد ما كسب المبارزة ونجا من الهبل بتاع كاتلين وأختها.

في الوقت ده "نيد ستارك" في كينجز لاندج بدأ يحقق في موت "جون أرين" فا وهو بيحقق عرف إن ولاد الملك التلاتة مش ولاده وإنهم من أخو الملكة وإن التوأمين دول -جيمي وسيرسي- هم اللي قتلوا جون أرين عشان عرف كده, وبعدها مات الملك مسموم في حادثة صيد مريبة برضه ووصى إن نيد ستارك يبقى واصي على العرش.

نيد عشان راجل طيب وشريف وأحمق للأسف شوية راح مصارح سيرسي باللي عرفه- فاكرها غلبانة وهتخاف- وقالها خدي عيالك وأمشي من هنا وبعت لأخو روبرت "ستانيس براثيون" وقاله تعالى أحكم أنت عشان الأحق دلوقتي بالعرش من الواد "جوفري" ابن خاله ده!

طبعاً سيرسي مش هبلة، ونيد اتخان من "بيتر بيليش" وقفشوه وطلعت ابنها جوفري يبقى ملك والدنيا ولعت وجوفري السادي أتهور وأعدم "نيد ستارك" بتهمة الخيانة ومسك الحكم وحبس سانسا معاه وأريا قدرت تهرب، وروب ستارك ابنه الكبير قالك هجيب حقك يا أبويا من اللانستر الأوغاد وتحالف مع أُسر الشمال وبدأت الحرب بقى وأعلنوا إن روب هو ملك الشمال وجاين لك يا كينجزلاندج نجيب عليكي واطيكي.
 

بعيد بقى عن الهيصة اللي بتحصل في "ويستروس" دي وبعد البحر الضيق أخر من تبقت من سلالة "التارجريان" –ملوك التنانين- دينيريس البنت الغلبانة جوزها "كال دروجو" قائد الدوثراكي مات على إيد ساحرة راحت دينيريس مولعة فيها وانتقمت له وكان معاها 3 بيضات تنانين قديمة –بيض التنين حرفياً- كانت جايلها هدية جوازها فقسوا وطلع منها تلت تنانين بسم الله ماشاء الله زي القمر واعتبرتهم ولادها وسمتهم دروجون وفيسيرون ورايجال وسمت نفسها "أم التنانين" ورجعت عصر التنانين تاني بعد انقراضها من مئات السنين...
 

 وآه طلعت ما بتتحرقش من النار وبدأت رحلتها للرجوع من المنفى لويستروس عشان تاخد حقها الشرعي على العرش الحديدي…

ماذا سيحدث لعائلة الستارك وأين ذهبت أريا هذا ما سنعرفه في الحلقة القادمة من المراجعة مع إنكم عارفينه أصلاً بس قشطة يعني...

لقراءة مراجعة الموسم التاني: هنا

لقراءة مراجعة الموسم التالت: هنا

Comments: