اعرف ازاي تتعامل مع البنت وهي بـ PMS

09/04/2019

اتفرض على كل الستات في العالم إنهم يعانوا كل شهر من ألم الدورة الشهرية، بس الألم الجسدية ممكن يتغلبوا عليها عن طريق المسكنات أو المشروبات السخنة، بس اللي العلم لسه ماتوصلهوش لحد دلوقتي هو حل مشكلة تقلب الهرمونات وخصوصا في الفترة اللي قبلها.

ال PMS في الغالب هي فترة صعبة على الستات وعلى شريكها كمان لإنه مابيكونش عارف يتعامل معاها ازاي، ممكن في لحظة تبقى مبسوطة، وبعدها بلحظات تبقى حزينة ممكن يبقى الموضوع ده محبط شوية للراجل اللي معاها خصوصا وهو حاسس إنه ماعملش حاجة غلط، لكن فيه خطوات سهلة ممكن تخليك تقدر تتعامل معاها وأهمها هي إنك تخلقلها الهدوء أو السلام عن طريق إنك تتجنب الخناق معاها في الوقت ده وتبين لها بتحبها قد إيه.

موقع Wikihow  قال لنا ممكن تعمل إيه بالتفصيل:

1- قلل الأنشطة الإجتماعية:

في الفترة دي بتكون جسمها وارم أو منفوخ شوية عشان كده بيبقي مش سهل عليها إنها تشوف الناس، ولو فيه مناسبة في الفترة بتتطلب إنها تلبس حلو أو تبقى بمظهر معين اتأكد منها الأول إن ماعندهاش مشاكل إنها تروح، مثلا لو قررت إنكوا تسافروا في الفترة دي اتأكد منها إنها تقدر تيجي.

2- ساعدها في شغل البيت:

لو الطبيعي إنها بتغسل المواعين وبتعمل الأكل حاول تخفف عنها مجهودها وتساعدها في شغل البيت، لو عملت كده عموما هي هتقدر مجهودك وتعبك ده وفي نفس الوقت هتقلل التوتر من عليها لإنك هتشيل من عليها المسؤوليات.

3- استوعب نظامها الغذائي اللي بيتغير:

لو شريكتك بتعمل دايت أو بتحب الأكل الصحي في الفترة اللي قبل الدورة الشهرية فهي ممكن تطلب بيتزا لارج لوحدها، ولو اشتكت إن هدوها ضيقة عليها ممكن تتمشى معاها في الكلام ده وتقولها إنها فترة وهتعدي أو إنها ترجع للدايت تاني بدل ما تقولها بالعكس شكلك حلو.

4- اعمل حاجة ممكن تخليها تستريح:

في فترة الـ PMS بتكون شخص عاطفي أو منفعل أكتر من اللازم، ممكن تساعدها في إنك تجهزلها حمام دافي أو اعملها مساج مثلا أو شجعها على الميديتاشين في الفترة دي، خطوات بسيطة زي دي هتساعدها في الأحساس بالراحة.

5- ساعدها على النوم:

النوم غالبا بيساعدها تتخطى الفترة دي عشان كده حاول تتجنب أي حاجة ممكن تزعجها أو تقلق نومها، ماتكلمهاش وهي نايمة، وطي صوت التلفزيون، بلاش تعمل دوشة وصوت عالي، وبدل ما تقلق نومها ممكن تعملها حاجة سخنة تشربها.

6- حاول تعرف مواعيد الـ PMS :

خليك عارف امتي بالظبط من الشهر مواعيد "البيريود" لإن ده هيساعدك تكون صبور أكتر معاها، ممكن تستخدم الإبلكيشينز عشان تعرف المعاد بالتقريب.

7- بلاش تلومها على مودها اللي بيتقلب كل شوية:

بلاش كمان تلومها على مزاجها السئ، خصوصا إن ممكن رأيها يتغير في نفس اللحظة، بلاش تبقي بتلومها على ده.

Comments: