مراجعة الموسم التالت من جيم أوف ثرونز: صفحة وفيات وضربت في وشنا

09/04/2019

كتب: كابتن بسلة

بعد مراجعة الموسم الأول والتاني من جيم أوف ثرونز جيه وقت مراجعة الموسم التالت، اللي هيغير اللعبة تماماً واللي نهايته قلبت شكل الدراما التليفزيونية للأبد، ومن غير رغي كتير نستدعي صوت الفنان القدير إبراهيم نصر وجملته الشهيرة ونختصر المقدمات و"ما تيجوا نشوف!" حصل إيه..

بيصحى "تيريون لانستر" من غيبوبة بعد إصابة في الحرب وهزيمته لأسطول ستانس براثيون فيلاقي الحاج صاحب البيت "تايون لانستر" وصل بنفسه كينجزلاندينج وقرر يمشي هو الأمور بقى تحت مبدأ "ياخيبة بختي في عيالي" وهاجي أوريكم بقى السياسة القذرة بتتلعب إزاي وبينصب نفسه في منصب Hand of the King  بمبدأ أنا قررت كدة ويارب تكونوا مبسوطين معاي وبيجوز "تيريون لانستر" لـ "سانسا ستارك" بالعافية ولكن تيريون راجل محترم ومش بيغصب سانسا على حاجة عشان عارف إنها جوازة مكروهين عليها هم الأتنين .

كمان تايون بيكمل دور "الخاطبة" وبيخطب الملك "جوفري" لـ "مارجري تايرل" أرملة رينلي اللي موته أخوه ستانيس في الجزء التاني عشان يبدأ يعمل تحالف مع هاوس تايرل وبيظهر لأول مرة واحدة من أقوى الشخصيات النسائية في المسلسل وهي الجدة "أولينا تايرل" واللي تعتبر الند القوي والنسخة النسائية من "تايون لانستر"!

ورا الـ Wall  "جون سنو" بيتعرف أكتر على "مانس ريدر" وهو قائد الوايلدينجز وملقب نفسه "الملك خلف الجدار" ومانس بيحاول يشرح لسنو دوافعه والمعركة القريبة اللي هتحصل بينه وبين الوايت ووكرز والنايت كينج وجون سنو بيبدأ يحب "يجريت" وبيدخلوا الكهف ومش عايزين نشرح الباقي بقى كله عارف اللي حصل في الكهف واللي بنسمع فيه من "يجريت" أشهر جملة بعد  Winter is coming وهي جملة " You Know nothing Jo Snow" بس طلع شقي وبيعرف!  

وسط الحرب والمخمضة اللي هم فيها "روب" هو كمان بيقع في حب الممرضة "تاليسا" وبيقرر يتجوزها هي بدل بنت "والدر فري" وبينقض العهد اللي قطعه معاه إنه هيتجوز بنته مقابل التحالف بينهم، والدر فري بيعمل نفسه عبيط ويقوله اشطه ياعم محصلش حاجة ولا تضايق نفسك وتعالى أنا عازمك أنت ومراتك الحامل وأمك وكل قادة جيشك تتفضلوا عندي وبنتي اشطه خليها تتجوز "ادمور تالي" وأنا موافق.

بينقلب الحفل الجميل على غفلة لمدبحة وبيطلع إنه كان فخ لروب ولكل الستارك بخيانة والدر فري وروز بولتون وبتخطيط من تايون لانستر وبنشوف أصعب حلقة في تاريخ التليفزيون اللي خلت كل مشاهدين المسلسل يسبوا ويلعنوا ويقولوا هو المسلسل هيكمل إزاي كدة؟! بس "جيه. أر. مارتن" ما بيغلبش وعرف يكمل عادي اشطه.

بتنتهي الحرب وبيخسر الشمال قدام اللانستر بالطريقة القذرة دي وفي ليلة واحدة بتخسر "أريا" أخوها الكبير وأمها وبينقذها "الهاوند" في الليلة دي إنها تتهور وتموت هي كمان وبياخدها بعيد عن المدبحة، ومقابل اللي عمله روز بولتون تايون لانستر بيعينه حاكم للشمال "واردن أوف ذا نورث" وبيديله وينترفيل هدية وحاجة في منتهى حرقة الدم.

على جانب أخر "بران ستارك" بيبدأ يكتشف قدراته الجديدة الخارقة واللي منها إنه يقدر يـ "وارج" وهي إنه ينقل نفسه داخل الذئب بتاعه ويتحكم فيه، القدرات اللي هتبدأ تتطور واحدة واحدة لحد ما هيقدر ينقل نفسه جوا أي حاجة لامؤخذة من أول الغربان لحد البني آدمين وهيبقى الغراب أبو تلت عيون!

"بريان أوف تارث" بعيداً عن كل ده مكملة رحلتها مع جيمي لانستر في إتجاه كينجزلاندينج واللي العلاقة بينهم بتتطور ويبقى في مشاعر إعجاب وحب على استحياء كدة بين الأتنين.

وكالعادة "دينيريس" أم التنانين في حتة تانية خالص بتعرف بذكائها اللي فاجئت به كل الناس حتى المرافقين ليها إنها تجمع جيش من 8000 جندي من جنود الـ " “Unsullied المحترفين وبتحررهم من الأسر والعبودية وبيختاروا يكون ولائهم ليها وتنانينها بيبدأوا يكبروا ويزدادوا قوة وشقاوة.

لقراءة مراجعة الموسم الأول: هنا

لقراءة مراجعة الموسم التاني: هنا

Comments: