قصة الشابين الصينيين اللي نصبوا على "أبل" في مليون دولار

09/04/2019


اشابين صينيين بيدرسوا في جامعة أوريجون الأمريكية، اسمهم  يانج يانج تشو وتشيوان جيانج عملوا مخطط نصب على شركة "أبل" اشتغلوا عليه لمدة سنة، من أبريل 2017 لمارس 2018، وبالفعل قدروا ينصبوا على الشركة في حوالي مليون دولار أمريكي.

القضية اتحولت لمحكمة فيدرالية، والوثائق بتقول إن الشابين كانوا بيصنعوا في الصين موبايلات "أبل" مزورة لكنها نسخ متطابقة مع موبايلات الشركة الأصلية، وكانوا بيبعتوا طلبات إصلاح أعطال بشكل فردي لكل جهاز، مع ادعاء إن الجهاز ده مابيفتحش أصلا رغم إنه جديد، عشان يستغلوا سياسة الاستبدال بتاعت "أبل" واللي بتقول إن العميل من حقه يحصل على جهاز جديد لو ظهر عيب صناعة مؤثر في الموبايل أثناء فترة الضمان، وبالفعل نجحوا في تقديم 1500 تليفون مزور لـ"أبل" عشان تتخدع الشركة وتفكر إنها أجهزة بايظة وتقدم أجهزة بديلة (حقيقية طبعا) للشابين الصينيين.

الشابين قدموا حوالي 3 آلاف طلب إصلاح لـ 3 آلاف تليفون مختلف، تلقوا من خلالهم 1500 تليفون جديد، والموبايلات الجديدة الأصلية كانت بتتشحن من أمريكا للصين علشان تتباع، وكانت أم يانج يانج تشو بتحول الفلوس على حساب ابنها في أمريكا.

الغريب إن مهندسين "أبل" فشلوا في اكشتاف إن الموبايلات مزيفة، والمخطط اتكشف لما الجمارك ظبطت 95 جهاز "أبل" مشكوك في أمرهم مبعوتين من الشابين لأمريكا، ولما تم فحصهم، الفحص أثبت إنهم مزورين، ولما تم تفتيش بيت جيانج، السلطات عثرت على 300 جهاز تاني مزور، واعترف جيانج وحكى التفاصيل كاملة.

Comments: