شاب حول العملات المصرية لرسم ثلاثي الأبعاد: عجبت الألمان

11/04/2019

كتب - رحاب سعدي 

يوميا بنتعامل بالعملات النقدية في كل تفاصيل حياتنا، 
جايز في التعاملات دي تكون خدت بالك من الرسمة اللي على العملة، لكن مش هتكون عارف اسم الرمز اللي عليها إلا لو كنت مهتم بالتاريخ، بس كل ده مش هيمنع إنك هتشوف القيمة الفنية اللي على العملة، وعشان القيمة الفنية دي، قدرت رسومات العملات المصرية تلفت انتباه طلاب ألمان في أحد الكورسات المعنية بالتصميم والعمارة.

بداية الحكاية كانت في ألمانيا، عند طالب بيدرس الهندسة المعمارية وبيشتغل في مجال التصميم اسمه عمرو إبراهيم موسى، عنده ٢٣ سنة. حبه للفنون البصرية والعمارة كانت حافز ليه علشان يسافر ألمانيا ياخد كورس modelling workshop ودي كانت فرصة لتبادل ثقافة العمارة والرسم بين البلدين أو أكتر من بلد خلال الكورس.

وواحد من الحاجات اللى كان بيتبادلها الطلبة في الكورس هي العملات النقدية لبلد كل واحد منهم، ونالت العملة المصرية إعجابهم كلهم.

من هنا بدأ عمرو يركز أكتر في تصاميم العملات ويسأل نفسه هل العملات فيها قيمة فنية واضحة للأجانب أكتر مننا بحكم التعود عليها والروتين؟ بعدها جاتله فكرة مشروع عملات مصر بتصميم 3D.

نشر عمرو المشروع على الإنترنت بمجرد ما انتهى منه في أربع أيام كاملة، كمان نشره على منصات فنية زي behance، ولما سألناه عن ردود الأفعال قال إنها كانت إيجابية وإن ناس كتير كانت بتقول إحنا فعلا مفكرناش قبل كدة إزاي عملتنا تصميمها حلو، والسفر بيخلينا نحس بالفرق لما نشوف عملات تانية ونستخدمها، وأكتر فكرة عجبته كانت استخدام المشروع للترويج للسياحة.

أما عن البرامج اللي استخدامها عمرو في مشروعه كانت:
Autodesk 3Ds Max, Vray, Adobe Photoshop, Adobe Illustrator, and Adobe After Effects.

ولما سألناه عن أهدافه اللى بيسعى ليها الفترة الجاية، قال إنه بيحلم يشارك في زيادة الوعي الثقافي والفني من خلال التصميم، كمان بيتمنى يقدر يشارك في معارض فنية ومسابقات قريب.

Comments: