مراجعة الموسم الرابع من جيم أوف ثرونز: اللانسترز بياكلوا في بعض

11/04/2019

كتب: كابتن بسلة

بعد ما خسر الستارك كل حاجة في المواسم التلاتة الأولى وشافوا كل أنواع الألم والحزن والقهر، جيه الوقت عشان اللانستر يدوقوا شوية من اللي عملوه وبيبدأ الموسم الرابع بأحلى بداية لكل مشاهدين المسلسل والمتعاطفين مع الستارك وهو موت "جوفري" مسموم في حفل جوازه بـمارجري تاريل على غفلة ومفاجأة للجميع كعادة جيه أر مارتن في كتابته .

لكن للأسف بعد ما بنفرح بموت "جوفري" المجنون السادي بنزعل لأن بيلبس التهمة "تيريون لانستر" وبيتم تهريب "سانسا" وقت الحادثة أخيراً من كينجزلاندينج عن طريق "بيتر بيليش" وده للأسف بيخلي التهمة لبساها أكتر هي وتيريون باعتبارها مراته قدام الناس كلها وبياخدها "ليتل فينجر" للـ Vale عند خالتها اللاسعة "ليزا أرين" اللي بتحب "بيتر بيليش".

بيتر بيليش كان معشم ليزا بالجواز، وطلع هو اللي بدأ كل المصايب دي لما تعاون هو وهي على تسميم جوزها "جون أرين" وتلبيس التهمة لسيرسي وجيمي وتلبيس تهمة محاولة اغتيال بران لتيريون، وجنان ليزا بيزيد لما بتعرف إن بيتر بيليش عايز يتجوز سانسا فبتحاول تقتل سانسا ولكن بيليش هو اللي بيزقها من الـ Moon Door ويخلص منها وبينصب نفسه واصي على ابنها اللي المفروض بعد موت أمه بقى حاكم الـ Vale وبالتالي بيليش بقى له الكلمة على كل فرسان الـ Vale وبيتقدم أكتر في خطته المريبة.

في كينجزلاندينج بيكون بريان وجيمي وصلوا من رحلتهم الطويلة بس جيمي ماوصلش حتة واحدة ووصل بإيد واحدة بعد ما اتقطعت، جيمي بيهدي لبريان واحد من السيفين اللي عملهم له أبوه تايون بعد إذابه سيف المرحوم "نيد ستارك" واللي بتنطلق في رحلة بحث عن "سانسا" و"أريا" عشان تحميهم زي ما وعدت الحاجة "كاتلين" الله يرحمها.

بيتم محاكمة "تيريون" قدام كل البلد بتهمة قتل جوفري وبيدافع تيريون عن نفسه في خطبة عظيمة وبعدها بيرزعهم كلهم مفاجأة وبيستخدم لتاني مرة طلب الـ trial by combat  وبيتطوع للمبارازة بداله برنس "أوبرين مارتيل" اللي بيكره اللانستر عشان قتلوا أخته وعيالها زمان أيام ثورة روبرت براثيون ونيد ستارك على الملك المجنون.

للأسف فرحتنا بذكاء ومهارة برنس "أوبرين مارتيل" في المبارازة قدام "The Mountain" ما بتكملش عشان غروره بيلبسه في الحيط وماونتن بيموته موتة بشعة كل الناس بتقشعر منها كل ما تفتكرها وبكدة يكون خسر تيريون المحاكمة وحكم عليه بالإعدام.

جيمي ما بيقبلش اللي بيعمله أبوه وأخته في أخوه وبيقرر يهرب "تيريون" بالتعاون مع "لورد فاريس" ولكن "تيريون" مقدرش يمشي ويسيب أبوه اللي عارف إنه مظلوم وقرر يحكم عليه بالإعدام، وبيروح أوضته عشان يقتله فيلاقي حبيبته "شاي" اللي خانته في المحاكمة وشهدت ضده في سرير أبوه وبتخونه ماشاء الله على كل المستويات!

 "تيريون" بيقتلها وبعدين يروح لأبوه "تايون لانستر" ويموته موتة مهزقة تليق بتاريخه القذر وهو قاعد بيعمل بيبي في الحمام وبيهرب بعدها هو و"فاريس" في سفينة في طريقهم لـدينيرس عشان يتحالفوا معاها ضد سيرسي.

في الشمال جون سنو بينشق عن الوايلدلينجز وبيرجع للنايت واتش يحذرهم بالهجوم اللي ناوي يعمله "مانس ريدر" وجيشه على Castle Black وبتدور معركة ليلية طويلة ضد الوايلدينجز بتموت فيها "يجريت" وبنزعل عليها كلنا وبينقذ النايت واتش "جون سنو" وذئبه "جوست" وتدخل جيش "ستانيس براثيون" اللي وصل للـ Wall عن طريق البحر بأسطول ضخم.

روز بولتون بيرجع من الريد ويدينج لوينترفيل اللي كانت تحت قيادة أبنه السادي المجرم "رامزي بولتون" اللي بيلاقيه لعب في "ثيون جريجوري" البخت وعذبه أشنع أنواع التعذيب وقطع له لامؤخذة.. لا مش هقول أنتوا عارفين، وخلاه خادم له أسمه "رييك".

بريان بتقابل أريا وهاوند في طريقها وبتحاول تقنع أريا تيجي معاها ولكنها بترفض وتهرب على سفينة لبرافوس عشان تسافر لجاكين هاكار وتنضم لجماعة الـ Faceless men  اللي عندها أمل فيهم يعلموها إزاي تنتقم لعيلتها.

لقراءة مراجعة الموسم الأول: هنا

لقراءة مراجعة الموسم التاني: هنا

لقراءة مراجعة الموسم التالت: هنا

Comments: