مراجعة الموسم الخامس من جيم أوف ثرونز: غدر الصحاب والنايت واتش

12/04/2019


كتب: كابتن بسلة

بعد هزيمة الوايلدلينجز في معركة البلاك كاسيل ستانيس عاش دور الملك على القلعة كلها وبيأسر "مانس ريدر" وبيعدمه بالحرق ولكن "جون سنو" اللي تم انتخابه لورد كوماندر للنايت واتش برغم صغر سنه بيتدخل وبيقتل "مانس ريدر" بسهم في قلبه رحمة به، وهو الموقف النبيل اللي مش بينساه له باقي الأسرى من الوايلدلينجز.

ستانس بعدها بيوصل لحالة الجنون القصوى وبيسمع كلام "مليسندرا" وبيحرق بنته الطفلة قدام جيشه كله قرباناً لإله النار وبعدها مراته بتنتحر وبيفقد احترام جيشه كله وبيسبوه ويمشوا ومابيتبقاش معاه إلا عدد قليل أوي بيتم إبادتهم على إيد "رمزي بولتون" على أبواب وينترفيل.

الحدث اللي زي ماكان نهاية ستانس البائسة على إيد "بريان" انتقاما منها على قتله لأخوه رينلي كان كمان فرصة ذهبية لهروب "سانسا" من جحيم "رمزي بولتون" اللي أتجوزها غصب عنها وعذبها بمساعدة "بيتر بيليش" اللي سلمها له تسليم أهالي وكان كمان سبب هروب "مليسندرا" للـ Wall واحتمائها عند النايت واتش في البلاك كاسيل واللي هيكون له فايدة في بداية الموسم السادس.

في كينجزلاندينج الجدة "أولينا تاريل" اللي سممت "جوفري" بدأت هي وحفيدتها "مارجري" لعبة خطيرة ضد سيرسي وقدرت "مارجري" تتجوز "تومن" أخو جوفري الصغير اللي بقى الملك، وبدأت سيرسي في التخطيط للإطاحة بيها بدعمها للهاي سبارو اللي بيقود جماعة دينية متطرفة ظناً منها إنه هيساعدها ولكن خبر علاقتها بأخوها بيقلب الآية عليها وبيتم القبض عليها من الهاي سبارو وبيهينها قدام البلد كلها ويمشيها عريانة عشان تكفر عن ذنوبها وحاجة في منتهى التهزيق والألم.

على الجانب الأخر من العالم دينيريس بتحكم قبضتها على مدينة "ميرين" بجيشها الكبير ومستمرة في حركتها لتحرير كل العبيد ولكن بتقابل معارضة قوية جداً من سادة المدينة اللي بيستعينوا بجماعة اسمها أبناء الهيربي في الإنقلاب عليها وبيقربوا إنهم يقتلوها بعد ماعملوا كمين لها ولحاشيتها في ساحة القتال ولكن بينقذها في أخر لحظة عودة الأبن الضال "دروجون".

دروجون التنين الأكبر بين أخواته كان هرب من دينيريس فترة، وده خلاه أكبر حجماً وأقوى من أخواته التانين اللي أتربوا في زنزانة، ولأول مرة دينيرس هتتجرأ وتركب دروجون وترجع تاني عهد التارجريان في ركوب التنانين، ولكن الواد ابنها بينزلها في أرض الدوثراكي ويسيبها ويمشي وبتقع أسيرة في إيديهم وميرين بتبقى تحت حكم "تيريون" بالنيابة عن دينيريس لحد ما ترجع.

في الشمال "جون سنو" بياخد القرار كلورد كوماندر للنايت واتش ويروح للي اتبقوا من الوايلدلينجز شمال الـ Wall ويحاول اقناعهم في تشكيل تحالف مع بعض ضد الوايت ووكرز والنايت كينج ولكن في نص اجتماعهم بيفاجئهم جيش الوايت ووكرز بالهجوم وبالعافية بيقدر جون سنو يهرب باللي اتبقوا من الوايلدلينجز وبيكتشف في المعركة دي قدرة سيفه المصنوع من الصلب الفاليري إنه يقدر يقتل الوايت ووكرز به!

بعد رجوع "جون سنو" للبلاك كاسيل بيتأمر عليه مجموعة من النايت واتش ويقتلوه وبيسيبوا المشاهدين متعلقين لمدة سنة بحالها مش عارفين جون سنو مات ولا هيرجع في الموسم السادس.. وأنت لو شوفت المسلسل ورا بعضه مرة واحدة وماضطرتش تعيش العذاب ده وقتها أعرف إنك محظوظ جداً.

لقراءة مراجعة الموسم الأول: هنا

لقراءة مراجعة الموسم التاني: هنا

لقراءة مراجعة الموسم التالت: هنا

لقراءة مراجعة الموسم الرابع: هنا

Comments: