مراجعة الموسم السادس من جيم أوف ثرونز: عودة ذئاب وينترفيل الشقية

12/04/2019

كتب: كابتن بسلة

افتتاحية الموسم السادس ما بتتأخرش كتير لإرضاء محبي اللورد كوماندور "جون سنو" ومليسندرا بتعمل حاجة عدلة أخيراً في حياتها وبتقدر ترجعه تاني من الموت بمساعدة إله النار، بعدها "جون سنو" بيحكم قبضته من تاني عل كاسيل بلاك وبيعدم كل المتأمرين والخونة اللي قتلوه.

بعدها بيفاجىء جون بوصول سانسا أخيراً بصحبة بريان لكاسيل بلاك وأخيراً الستارك بيبدأ يرجع شملهم تاني بعد كل السواد اللي شافوه وسانسا بتسخن جون سنو بعد ما تحكيله كل اللي فاته في ويستروس واللي حصل في وينترفيل وبيبدأ يخطط لاسترجاعها من إيد "رمزي بولتون".

بيتحرك "جون" بجيش ناحية وينترفيل وبيقابل رمزي في Battle of Bastards اللي بتنقذه فيها "سانسا" في اللحظات الأخيرة باستدعائها لبيتر بيليش وفرسان الـ Vale وبيسحقوا جيش بولتون وجون بيسيب قرار مصير "رمزي" في إيد "سانسا" اللي بتقرر تعدمه بأفضل طريقة تليق به وأكلته لكلابه اللي كان مربيهم بنفسه.

على ناحية تانية في الجنوب "سيرسي" كانت لها معركة خاصة للإنتقام من كل اللي أهانوها وبعد إصرار الهاي سبارو إنها لازم تتحاكم على خطاياها، بتوافق سيرسي وبتتقمص شخصية أبوها تايون لانستر وبتعمل في كل أعدائها مدبحة أشبه بالريد ويدينج عشان تخلص منهم كلهم مرة واحدة بس المرة ممكن نسميها "محرقة" باستخدامها للوايلد فاير وبتهد حرفيا "المعبد على اللي فيه" وبتتخلص فيها من الهاي سبارو وأعوانه وعائلة التاريل مارجري وأخوها ماعدا الجدة، وابنها تومن الملك بينتحر بعدها وبتنصب نفسها ملكة على ويستروس بالقوة  كل ده وهي مانزلتش من أوضتها وبتشرب كاسها المفضل من النبيت!

على ناحية تانية دينيريس بتخرج من أسر الدوثراكي بواحد من أكثر المشاهد شبحنة في المسلسل بحرقها لكل القادة الرجال ليهم وخروجها من وسط النار فلة شمعة منورة من غير ما يحصلها حاجة وبتقود جيش الدوثراكي اللي بقى تحت أمرها عشان تستعيد حكم "ميرين".

في الجزر الحديدية "ثيون" بيرجع لعائلته وأخته "يارا" بتسانده وبيتعاونوا سوا على السيطرة على أسطول الجزر الحديدية من إيد عمها "يورن" وبياخدوا الأسطول في إتجاه إيسوس عشان ينضموا لتحالف "دينيريس".

على جانب تاني واحد من الستارك بقى شبح الحتة هو كمان وهي "أريا" بعد ما أتعلمت الفنون القتالية في برافوس ورجعت ويستروس عشان تنتقم لعيلتها وبدأت بوالدر فراي وقتلت عيلته كلها وقتلت عياله وحطتهم في فطيرة لذيذة ودبحته زي ما دبح كاتلين أمها في الريدويدنج، حاجة كدة ميكس انتقام يريح قلب كل واحد اتحرق دمه في الريدويدينج.

ورا الـ  Wall  بران بيتحول رسمياً للغراب أبو تلت عيون وبيوصل بقدراته الخارقة لليفل الوحش وبيبدأ يتحرك ناحية وينترفيل اللي فيها كل بيوت الشمال بتعلن ولائها لجون سنو وبتعلنه ملك الشمال وبنعرف إن جون مش ابن نيد ستارك ولكن أبن أخته ليانا ستارك!

في "إيسوس" دينيريس بتوصل للاحتراف في ركوب تنينها دروجون وبتسيطر على ميرين وعملت أسطولها الخاص وبدأت رحلتها البحرية في إتجاه "ويستروس" عشان تعلمهم الأدب.

لقراءة مراجعة الموسم الأول: هنا

لقراءة مراجعة الموسم التاني: هنا

لقراءة مراجعة الموسم التالت: هنا

لقراءة مراجعة الموسم الرابع: هنا

لقراءة مراجعة الموسم الخامس: هنا

Comments: