مراجعة الموسم السابع من جيم أوف ثرونز: النايت كينج جالكوا خبوا عيالكوا

12/04/2019

كتب: كابتن بسلة

الموسم السابع بيبدأ بوصول دينيرس وأسطولها لدراجون ستون المكان اللي كان عايش فيه ستانيس براثيون واللي بيحمل دلالة تانية وهو إنه كان أول مكان يصل له التاريجريان الأوائل لما دخلوا ويستروس.

 مليسندرا بتوصل هناك وبتقنع دينيرس إنها تعمل تحالف مع جون سنو عشان هو اللي يقدر يساعدها في استرجاع عرشها من سيرسي.

بعد ما بتوصله دعوة رسمية من دينيريس بيقرر جون سنو يروح يقابلها ويتفاوض معاها، وده بيغضب منه سانسا وقادة الشمال اللي معاه في وينترفيل ولكنه بيبص للصالح العام وشايف إن مفيش مجال للنزاعات دلوقتي عشان في خطر أكبر جاي من الشمال وهو الوايت ووكرز وجيش النايت كينج اللي هيقضوا على كل كائن حي في طريقهم لإحتلال ويستروس وإننا كلنا لازم نتنازل ونتكاتف سوا.

دينيريس بتبعت جزء من جيشها مع أسطول "يارا" في اتجاه كينجزلاندينج عشان تحتلها من البحر ولكن سيرسي بتتحالف مع عم يارا "يورن" وبينهزم للأسف أسطول دينيريس وبتتاخد يارا أسيرة لعمها، وجيش اللانستر بقيادة جيمي بيحكم قبضته على هاوس تاريل وجيمي بيموت الجدة "أولينا تاريل" بالسم ولكنها ما بتسبش فرصة إنها تحرق دم اللانستر حتى وهي بتموت وبتوصل رسالة لسيرسي مع جيمي إن هي اللي قتلت "جوفري" مش تيريون.

في طريق رجوعهم لكينجزلاندينج دينيريس بتقرر تنتقم بنفسها من الهزائم اللي حصلتلها على إيد سيرسي وبتاخد دروجون وجيش الدوثراكي وبتهجم على جيش اللانستر وبتسحقه وقلبنا بيوقف في المعركة دي واحنا خايفين على التنين دروجون اللي كان هيموت بسهم ضخم وعلى جيمي اللي كان هيموت بنار دروجون وأنقذه برون في أخر لحظة وحاجة في منتهى لخبطة المشاعر المتناقضة.

جيمي بعد ما بيشوف التنين لأول مرة وبيحس بالخطر الحقيقي لدينيريس بيقدر يوصل مع تيريون لاتفاق بعمل هدنة بين سيرسي ودينيريس عشان يتناقشوا كلهم كناس عاقلة في مصيبة النايت كينج اللي جاي من الشمال ده وبيحددوا معاد اجتماع.

جون سنو على جانب تاني بيعمل مجازفة خطيرة وبيروح بفرقة عشان يمسكوا واحد من الوايت ووكرز ويأسروه عشان تشوفه سيرسي وتقتنع بإن الكارثة اللي جاية من الشمال أكبر من خناقة على كرسي حديد.

 ولكن بيقع جون وفرقته بتاعة شمس الزناتي دي في فخ من النايت كينج وبتنقذهم دينيريس بهجوم بتنانينها التلاتة مرة واحدة وكان ده عز الطلب فبيقتل النايت كينج التنين "فيسريون" وبيحوله لتنين أزرق وبيركبه ويدمر به جزء من الـ Wall وبيفتح ثغرة ضخمة لعبور جيشه تجاه ويستروس والأيام بتسود.

في الاجتماع مع سيرسي كله بيشوف وايت ووكر وبيصدق وجوده ولكن سيرسي تستمر في عنادها وبتعمل نفسها اشطه أنا صدقت ولكن من ناحية تانية بتبعت أسطول "يورن" عشان تغدر بدينيريس، جيمي ما بيوافقش على اللي بيحصل ده ولأول مرة ياخد قرار ضد سيرسي وبيسبها ويقرر يسافر لوحده لوينترفيل عشان ينضم لتحالف جون سنو ودينيريس ضد النايت كينج.

في وينترفيل وبعد وصول "أريا" لها ولقائها مع سانسا لأول مرة من سنين، ولم شمل ما تبقى من الستارك وهم أريا وسانسا وبران، بيحاول ليتل فينجر يلعب بديله عليهم ويقلبهم على بعض ولكن بيتطلعوا عاقلين وبيعدموه بعد اكتشافهم خيانته لأبوهم نيد ستارك وبيموت موتة مستفزة ضايقت أغلب المشاهدين عشان كان نفسنا بيتر بيليش يموت موتة أجمد من كدة!

"سام" بيوصل لوينترفيل ومعاه دلائل على إن جون سنو مش ابن غير شرعي ولكن هو الوريث الحقيقي والوحيد للعرش الحديدي لأنه ابن ريجار تارجريان وليانا ستارك وأسمه الحقيقي "إيجون تارجريان" نص ستارك "تلج" ونص تارجريان "نار" ولكن لسه جون ودينيريس مايعرفوش بالحقيقة دي اللي تعتبر دلوقتي عمته وعلى المركب اللي في طريقها لوينترفيل بيعملوا قلة أدب وهم ولا دارين بالعك ده!

ولحد هنا تكون تمت مراجعات كل المواسم السبعة اللي فاتت من جيم أوف ثرونز ويتبقى الموسم التامن والأخير اللي هيعرض يوم الأحد 14 إبريل 2019 بالليل بتوقيت أمريكا و فجر الأتنين 15 إبريل بتوقيت القاهرة وفي إنتظار نهاية الملحمة الجميلة دي اللي معلقانا معاها من سنة 2011، ذاكروا كويس وحضروا الفشار ويارب النصر لابننا جون سنو فخر وينترفيل.

لقراءة مراجعة الموسم الأول: هنا

لقراءة مراجعة الموسم التاني: هنا

لقراءة مراجعة الموسم التالت: هنا

لقراءة مراجعة الموسم الرابع: هنا

لقراءة مراجعة الموسم الخامس: هنا

لقراءة مراجعة الموسم السادس: هنا

Comments: