١٤ إنجاز يخلوك فخور بنفسك بعد العشرين

14/04/2019

حياتك بعد العشرينات المفروض إنها حياة ناضجة بتبقى مليانة مسؤوليات وأولها عن نفسك، تنفيذ المسؤوليات دي شيء بيخليك فخور بنفسك وباللي بتعمله، فيه تفاصيل صغيرة في يومك لما بتعملها لوحدك بتبقي فخور بنفسك وبتساعدك تكمل في حياة الناس النضجة المتعبة زي:

1- إنك تصحي في الوقت اللي ظابط المنبه فيه من غير ما حد يساعدك:

وبالذات لو من الساعة 6 للساعة 8 .

2- غسل الهدوم قبل ما الهدوم النضيفة اللي موجودة تخلص:

مع إن الغسالات اتوماتيك عادي بس برضه الغسيل ونشر الغسيل من أسخف المهام عشان كده بتأجلها، لو لحقت تغسل قبل ما الهدوم النضيفة تخلص فعلا بتبقى فخور بنفسك.

3- تعمل أكل لنفسك بدل ما تشتري أكل من برا:

لإن بس المليونيرات هما اللي بيقدروا ياكلوا من برا كل يوم.

4- إنك تنضف الشقة أو المكان اللي قاعد فيه أو تغسل المواعين:

طبعا غسيل المواعين أول بأول مهمة صعبة وشبة مستحيلة لأي حد عايش لوحدة، ده غير ترويق الشقة وتطبيق الهدوم المرمية على السراير.

5- تنضيف السرير الصبح بعد ما تصحى من النوم:

الطاقة اللي بتخليك أول ما تصحي الصبح وتبقى مش شايف قدامك فتروق السرير وتطبق الغطا وتظبط الملاية دي مابتجيش غير كل سنة مرة بالذات لو ماكنتش طلب ست الحبايب فلازم تبقى فخور بنفسك بعدها.

6- تمشي على الدايت لمدة أسبوع:

دي من أهم الحاجات اللي محتاجة إرادة وأسبوع كامل ملتزم بأكل ممكن تبقى مابتحبهوش أوي أو بتحب أكل أحلى منه إنجاز طبعا

7- تخرج مع صحابك بدل ما تتفرج على أفلام لوحدك في البيت:

بعد العشرين الواحد بيبقى عنده حب غريب إنه يقضي وقت فراغه في الفرجة على الأفلام والمسلسلات أونلاين، لو استغنيت عن الرغبة دي وخرجت مع صحابك تتفرج على أفلام في سينما أو خرجت معاهم في المطلق يبقى إنجاز برضه.

8- تذاكر ساعة على بعضك أو تشتغل لحد ما تخلص التاسك من غير ما تلعب:

إنك تخلص اللي وراك الأول بعدين تشوف إيه الكلام على السوشيال ميديا، أو ترد على اللي جروب صحابك وتهلس معاهم من غير ما تفصل نفسك.

9- تتمشي بدل ما تركب العربية أو مواصلات:

عشان الحياة بقيت أسهل ما كنا نتخيل فبقى المشي أقل حاجة ممكن نعملها، لو عايز توصل لآخر الشارع هتطلب أوبر أو هتاخد تاكسي، عشان كده المشي إنجاز برضه تستحق تبقى فخور بنفسك عليه.

10- تنام في وقت معقول:

ممكن تدخل السرير من الساعة 9 بليل بس مش هتنام أول ما تدخل السرير عشان هتقعد تلعب في الموبايل أو تتفرج على أي حاجة وهتضيع وقت، لو نمت من أول من غير ما الوقت يسرقك في تفاهات ده برضه يعتبر إنجاز.

11- تطمن على أهلك مش هما اللي يطمنوا عليك:

سواء كنت عايش مع أهلك أو مستقل عنهم أو متجوز فلازم يبقى فيه مكالمة يومية لحد فيهم، لو إنت اللي خدت الخطوة أي يوم وكلمت حد فيهم تطمن عليه وعلى يومه ده إنجاز برضه

12- بالنسبة للبنات: تشيلي الميك أب بتاعك قبل ما تنامي

إنت قبل ما تنامي بتبقي عارفة إنك هتصحي الصبح تغسلي وشك فبتكسلي طبعا تغسلي وشك من الميك أب قبل ما تنامي، في حين إنك عارفة إن وشك كده هيتعب ويبوظ، لو استجابتي مرة للصوت الداخلي اللي جواكي وغسلتي وشك قبل النوم ده إنجاز برضه.

13- ماتستلفش فلوس آخر الشهر:

طبعا مش هنقول تحوش فلوس كل شهر بس كونك ماستلفتش ده إنجاز تحمد ربنا عليه وتسجد سجدة شكر للمولى كمان.

14- البقاء في الحياة يوم كمان:

لإن فيه أيام وأوقات بيكون صعب إنك تعدي اليوم اللي إنت فيه، كونك استحملت وفضلت عايش يوم كمان من غير ما تأذي نفسك أو اللي حواليك ده إنجاز طبعا خليك فخور بنفسك عليه.

كونك بقيت شخص بالغ أو مسؤول عن نفسك دي فترة صعبة ماتستقلش بيها، لازم تبقى فخور بنفسك إنك بتنجز شوية تفاصيل زي دي بنفسك، شجعك نفسك عشان الحياة صعبة وماتستحملش إحباطات.

Comments: