دليلك للاستخدام الآمن للإنترنت: إزاي تتعامل مع الـ Password والمواقع المجهولة

15/04/2019

السوشيال ميديا أو الإنترنت عموما مهمته الأساسية عند الناس هي إنه بيخليهم يتواصلوا اجتماعيا ويشتغلوا ويتعلموا من عليه وممكن كمان يلعبوا، بس للأسف الإنترنت مكان غير آمن، لكن الخبر الحلو إن فيه طرق سهلة ونصايح تقدر بيها تحافظ على خصوصيتك وعلى الأكونتس بتاعتك على السوشيال ميديا وعلى أساسه، جمعنا أحسن نصايح نشرها موقع connect safely عشان تخلى الإنترنت مكان أمن ليك

التفاعل مع أصدقائك الجداد والقدام:

1- خليك لطيف على السوشيال ميديا، مش لازم تبقى بتقبل كل حاجة بس بلاش تضايق الناس

2- لو عرفت حد من على الإنترنت وحبيت تقابله قابله في مكان عام

3- اعرف ازاي ممكن تبلغ عن أي شخص يضايقك أو يزعجك أونلاين أنت أو أي حد تعرفه

4- ماتبعتش أي صور لأي حد حتى لو كانوا أشخاص واثق فيهم، صحابك ممكن في يوم من الأيام مايبقوش صحابك وده شبه مستحيل إنك تمسح صورك اللي بعتهالهم

5- خلي بالك من السخرية على النت، ممكن تبقى بتهزر بس شخص تاني يحسك بتسخر منه أو بتتنمر عليه

الأمان والـ Passwords:

1- استخدم Passwords قوية وطويلة وصعب أي حد من اللي حواليك يخمنها

2- بلاش تدوس على أي لينك بيظهرلك، لإنها ممكن تبقى وهمية وتوديك لمواقع ضارة فاكتب عنوان الويبسايت اللي هتدخل عليه بنفسك

3- اتأكد إن موبايلك مقفول بباسورد أو "باترن" أو عليه بصمة عشان مش أي حد يفتح موبايلك.

4- ماتستجبش لأي حد بيقولك إن الكومبيوتر بتاعك بايظ وفيه فيروسات حتى لو قالك إنه خبير في الكمبيوتر وإنه هيقلب فيه وينضفه أو يصلحه

التبرع والتسوق والأعمال المصرفية عن طريق الإنترنت:

1- أكيد طبعا دي حاجة حلوة جدا إن يبقى فيه مسابقة وإنك كسبت فيها وإن فيه ملوك من النيجر عايزين يتواصلوا معاك ويهنوك بنفسهم بس للأسف كل ده مش حقيقي

2- اعمل شوبينج من على المواقع الكبيرة المعروفة على الإنترنت بلاش تستخدم موقع وإنت مش عارفه أو محدش من اللي حواليك مجربه

3- ماتبعتش فلوس على النت واستخدم البطاقات المصرفية

4- لو هتعمل شوبينج أو هتعمل أي خدمات مصرفية استخدم مواقع آمنة والمقصود بآمنة هي اللي بتبدأ بـ"https"

5- قبل ما تتبرع لأي مكان عن طريق الإنترنت اعمل شوية أبحاث وشوف إذا كانت فعلا التبرعات دي راحة للمكان الصح ولا نصب

6- ماتديش حد أبدا رقم الضمان الاجتماعي أو رقم الرعاية الطبية أو أي هوية تانية إلا لما تتأكد إنها ضرورية زي إنك تاخد رقم الائتمان مثلا.

استخدام التطبيقات والمواقع غير المعروفة:

1- لو جيت تدخل على موقع أو تفتح Application مش معروف أوي، اقرأ الـ reviews المكتوبة عنه قبل ما تأكد على تنزيل التطبيق

2- خلي بالك من اللي التطبيق هيطلبه منك قبل ما تنزله أو تستخدمه، يعني اقرا الشروط والـ Policy بتاعته كويس واعرف هيستخدم إيه من على موبايلك أو هيبقى ليه access على إيه

3- اعرف إزاي تستخدم "السيتينج" بتاعت الموبايل بتاعك أو أي برنامج وأبلكيشن.

4- ماتقدمش أي معلومات شخصية عنك وعن نفسك على أي أبلكيشين إلا لما تتأكد منهم الأول

نصايح للسلامة على السوشيال ميديا:

1- اعرف ازاي تتعامل مع خصوصية كل برنامج أو تطبيق فيهم

2- ماتخليش الناس الغريبة ولا القريبة يضغطوا عليك وتبقى شخص مابتحبهوش، خليك شخص ذكي على الإنترنت واعرف حدودك واعرف إن العلاقات بتتغير وإن بتحصل حاجات غير متوقعة على العالم الافتراضي ده

3- خليك شخص لطيف على الإنترنت وعامل الناس بالطريقة اللي تحب تتعامل بيها، لإن الناس اللي من صفاتها على الإنترنت، العدوانية أو مضايقة الناس بيتعرضوا لمضايقة أكتر من الأشخاص اللطيفة، ولو حد ضايقك حاول ماتردش ممكن تتجاهله أو فيه بلوك ممكن تستخدمه برضه

4- فكر في اللي بتكتبه أو بتنشره بصفة عامة لأن أي حد ممكن يستخدمه ضدك

5- خليك عارف إن مش كل الناس اللي بتكون لطيفة معاك عايزة تكون صحابك أو يدخلوا معاك في علاقة ممكن يبقوا عايزين حاجة معينة، فممكن تبقى الرسايل اللي فيها "فليرتيشن" أو دعم تبقى خدعة أكتر ما تكون إن حد بيحاول يقرب منك

6- اتجنب إنك تقابل الناس اللي عرفتهم من على السوشيال ميديا في الحقيقة لأن في الحقيقة ممكن لو حصلك أذى هيبقى أذى جسدي، ولو كان ضروري إنك تقابل حد عرفته من السوشيال ميديا قول لحد قبل ما تنزل معاه أو خد حد من صحابك معاك زيادة أمان

الأخبار المزيفة:

1- خليك عارف إن مش كل حاجة بتقرأها على السوشيال ميديا هي صح بنسبة 100%

2- دور ورا مصدر الأخبار، شوية بحث ورا الأخبار اللي شوفتها هتأكدلك صحتها من زيفها

3- ماتعملش شير لأي حاجة عندك نسبة شك فيها، لإنه شيء سيء عموما تعمل شير للأخبار اللي إنت مش متأكد منها وبيضر بمصداقيتك إنت

4- خليك عارف إن مش معنى إنك مايل للأخبار دي إنها صحيحة

Comments: