المُشاهد: 8 ملاحظات على الحلقة الأولى من الموسم التامن لجيم أوف ثرونز

15/04/2019


كتب: كابتن بسلة

قبل المقدمات والدبجات تحذير هام بالحرق، الموضوع ده للي شاف الحلقة ولو ماشوفتهاش ماتفتحهوش إلا لما تشوفها، وقد أعذر من أنذر.

النهاردة عرضت الحلقة الأولى من الموسم التامن والأخير لجيم أوف ثرونز زي ما كل محبين المسلسل عارفين ومتابعين، وهنا هنحاول نشارك بعض شوية ملاحظات على الحلقة الافتتاحية للموسم من منظور "مُشاهد" ومُتابع للمسلسل عادي، وهي كانت كالمتوقع حلقة تشويقية أشبه بتريلر طويل للموسم بيقدم تمهيد للأحداث الجاية والخطوط الدرامية اللي هيمشي فيها بشكل كبير.

 وملاحظتنا هي:

1- بداية من تتر البداية الجرافيكس اتطورت بشكل جميل كالعادة وزيادة عليها المرة دي بجانب إظهار أهم مواقع الأحداث في ويستروس اللي هتظهر في الحلقة بناخد جولة داخل أشهر الأماكن دي في أروقتها وقاعتها الداخلية زي قلعة وينترفيل وكينجزلاندينج.

2- الحلقة اللي عنوانها "Winterfell" ومدتها 54 دقيقة، إيقاعها سريع ومش هتحس بالوقت وأنت بتتفرج لأن بجانب إنها تشويقية إلا أنها كمان بتقفل أبواب كتير متفتحة من الموسم اللي فات بسرعة بدون مط فيها وده قرار ذكي ومفهوم طبعاً لأن أحداث الموسم ده المفترض هتكون ملحمية جداً وهي الحرب الكبرى اللي بيتمهد لها بقالنا 9 سنين وعدد الحلقات الباقية 5 حلقات فقط فلازم نكثف الأحداث بشكل أكبر وهو ده اللي حصل.

3- وتكثيف المشاهد والأحداث ده بيخلينا نشوف الشخصيات بتعبر عن اللي جواها سريعاً بدون لف ولا دوران، فسانسا بتعبر عن تخاوفتها من دينيريس لجون ومن سيرسي لتيريون، ودينيريس بتقابل سام وبيعرف اللي عملته في أبوه وأخوه، وسام بيقول لجون على حقيقته بدون تأجيل وده المشهد الأهم فيهم ولكن تفاعل جون سنو مع الحقيقة دي كان غريب شوية لأنها المفروض دي الصدمة الأكبر في حياته واللي بتقلب كل الحقايق والحسابات في ويستروس، فهل يكون أول ما يجي في بال شخص زي ده هو الخوف على ردة فعل دينيريس؟!

4- وبنشوف كمان لقاءات Reunion كتيرة زي أريا وهاوند وجندري، وجون سنو بأريا وبران،  وتيريون وسانسا..إلخ، وبنشوف ثيون وفرقته بينقذوا يارا بسرعة، وأقواهم طبعاً هو اللقاء المرتقب بين "بران" و"جيمي" اللي ماشفوش بعض من الموسم الأول واللي اتمهدله بطريقة ذكية ومؤثرة جداً بانتظار بران له وهو بيقول لسام "مستني صديق قديم" وبنشوف جيمي في نهاية الحلقة وبنعرف ساعتها بران كان قصده على مين، أنتابتني القشعريرة والله من الحركة دي، شابوه يوسف الشريف.

5- طبعا الحلقة كانت لازم تداعب الفانز اللي نفسهم يشوفوا "جون سنو" بيركب تنين ودي حاجة فعلاً كلنا كنا مستنينها ولكن المشهد كان مُحبط الصراحة وعلى عكس المأمول منه وجيه بسرعة جداً بدون تمهيد وكأنهم بيقولوا لنا عايزين جون يركب تنين؟! يلا أهو اتبسطوا!

 دي المرة الأولى اللي شخص زي ده يختبر الطيران  وتوجيه كائن ضخم زي تنين والتحكم فيه واختبار النوع ده من القوة، فهل كل اللي نشوفه هو شوية لف في السما وبعدين أول مايبدأ يفهم التنين ويحاول يتحكم فيه يروح نازل "راكنه" على جنب وخلاص كدة؟! ماكنش العشم يا رجالة، يرجى عزيزي القارىء مراجعة المشهد الشهير في فيلم Man of Steel لسوبرمان وهو بيختبر الطيران لأول مرة وشوف فرق الإخراج بين المشهدين.

6- مشهد "سام" ولقائه بدينيرس ومعرفته بخبر إعدام أبوه وأخوه على إيدها، كان من أفضل مشاهد الحلقة وأكترهم ألماً، وأداء "جون برادلي/سام" فيه كان رائع ومؤثر جداً.

7- رجعنا نشوف لورد "فاريس" تاني في كذا مشهد بعد اختفائه المريب في أحداث الموسم السابع وياريت ما يطلعش أول حلقة بس برضه ويختفي تاني وحواره القصير مع "تيريون" في العربية وهم داخلين وينترفيل كان دمه خفيف وذكي وبداية لطيفة للحلقة.

8- طبعا مش هنصدق إن "برون" ممكن يقتل "تيريون" أو "جيمي" وشكلها طريقة فقط من صناع المسلسل عشان يحركوه ناحية الشمال ويشارك مضطراً بعدين في المعركة ضد الوايت ووكرز لأنهم أشاروا لنقطة مهمة في بداية مشهده وهو بيفخر قدام البنات إنه كان هيقتل تنين دينيريس؟! فهل يكون ده   foreshadowing إن برون هو اللي هيقتل تنين النايت كينج في المعركة؟! نضمها لباقي النظريات اللي بتضرب في وشنا عادي!

بونس بوينت:

9- فين "جوست" يا خونا؟! والله عيب، الذئب الأصيل ده يفضل موسم بحاله مختفي في السابع وكمان في أول حلقة في التامن تعملوا Reunion لكل حاجة ماعدا هو وجون سنو؟! إزاي بس؟! حالة تجاهل "جوست" دي غريبة فعلاً لأنه يعتبر واحد من شخصيات المسلسل المهمة واللي كانت مؤثرة في مواقف كتيرة وماينفعش يفضل مختفي كدة ومفيش أي hint حتى عن هو فين وبيعمل إيه؟! لو فلوس الجرافيكس بتاعته غالية كنتوا قولوا لنا نجمع مع بعض ونساعدكم! بس مش كدة!

Comments: