اعرفي تتصرفي إزاي لو فيه حد بيفليرت معاكي

15/04/2019

لو حد قرر يقولك كلام حلو هتلاقي نفسك تلقائي بتردي تقوليله شكرا أو ربنا يخليك أو روح إلهي تنستر وبتقلبي امرأة خمسينية بتدعيله بالستر والصحة، بغض النظر إذا كنت حابه الفليرتيشن ده أو الكلام الحلو اللي بيتقالك أو لا، في الأول قبل ما تردي فإنتي محتاجة تعرفي إذا كنتي حابه فعلا الاهتمام ده ولا لا، لو كنتي مش حابه الاهتمام أو الكلام ده فإنتي محتاجة تحطي طبعا حدود للكلام ده وتبيني رفضك له، بس لو مهتمه Wikihow عرفتنا إزاي نرد:

1- شجعيه لو كنتي مهتمه وإديله اهتمام وهو بيتكلم:

لو مهتمه بالكلام بلاش تمسكي الموبايل وهو بيتكلم وتواصلي معاه بعنيكي فمثلا لو قال حاجة بتضحك ممكن تضحكي وده هيوضح له إنك مهتمه بيه زي ما هو مهتم بيكي، لإنك لما بتضحكي مخ الطرف التاني بيترجم إنها مكافأة على الكلام، فالابتسامة أو الضحكه هى أول الطريق اللي بيوضح ده.

2- افتحي كلام معاه:

لو سألك سؤال ولقيتي الكلام خلص ممكن ترجعي تتكلمي معاه في أي حاجة تانية، وبكده هيفهم إنك مهتمه بيه أو مهتمة على الأقل إن الكلام يستمر، ممكن تسأليه عن الأكل اللي بيحبه أو عن ماتشات النهاردة مثلا أو بيشجع فريق إيه ، وبلاش تسألي الأسئلة اللي بتنتهي بآه أو لا دي.

3- جامليه إنتي كمان:

لو كان بيهزر معاكي فأكيد قالك شوية حاجات لطيفة يعني فرديهاله، كل الناس بتحب تسمع حاجات لطيفة عن نفسهم حتى الرجالة، فلو ردتي له المجاملة هيعرف إنك مهتمة بيه، وبلاش المجاملات السطحية العايمة، حاولي تقولي حاجة حقيقية عجباكي فيه وخليكي محددة، بلاش تقولي "إنت حلو مثلا" ممكن تقولي "ضحكتك حلوة" وممكن تطلعي خالص من التعليقات أو المجاملات اللي على الشكل وتتكلمي على طبعته مثلا إن دمه خفيف أو ذكي.

4- حاولي تخلي الكلام مفتوح بينكوا:

إنتي كمان عليكي جزء من مسؤولية إن الكلام يفضل مفتوح، عشان كده حاولي تعملي مجهود إن الكلام يفضل مستمر.

لو كنتي مش موافقة بقي على  الفليرتيشين ده، اتصرفي بالطريقة دي:

1- ماتخديش أي رد فعل:

ممكن ماتديش الكلام اللي بيقوله اهتمام بس من غير ما تبقى قليلة الذوق، بمعنى إنك تحاولي ماترديش على الكلام اللطيف اللي اتقال وبكده هيفهم إن الكلام ده مش مرغوب فيه، ولو فيه ناس تانية معاكي خدي رأيهم كل ما يتكلم أو يطلب رأيك، وممكن كمان ماتقبليش منه أي عرض إنه يعزمك على حاجة.

2- استخدمي لغة الجسد:

لغة الجسد هتساعدك توصل رسالة للشخص باللي إنت عايزة، مثال ربعي إيدك أو بصي الناحية التانية ماتبصلهوش، وطبعا بلاش تبتسمي له لإن الإبتسامة هتساعده يكمل.

3- قولي لا:

هي ’ه طريقة ممكن توجع الطرف التاني شوية، بس هي زي الحقن تقريبا هتريح على طول، بس طبعا اعملي ده بأكتر أسلوب مؤدب ممكن تعمليه بيه، زي إنك تقولي إنك مش مبسوطة من الكلام أو مش مهتمة، خلي الجمل قصيرة ومحددة وبتوصل اللي عايزة تقوليه .

4- اكدبي كدبة بيضاء:

لو مش عارفة ترفضيه أو محرجة من ده ممكن تكدبي عليه كدبة بيضا، زي إنك مصاحبة مثلا أو في علاقة وبرضه خليكي مؤدبة طبعا، لكن لو هو شخص قريب منك الأحسن إنك ماتعمليش كده وممكن تقولي إنك مش عايزة تدخلي في علاقة دلوقتي.

Comments: