سيلفي المرايا أكتر صور هتظبط شكلك بس اعرف تلقطها إزاي

18/04/2019

سيلفي المرايا دايما معروف إنه أحسن من أي صورة حد يصورهالك بتبقى شايف نفسك وشايف شكلك وفي نفس الوقت جسمك ولبسك وكل تفاصيلك بيظهروا، عشان كده ظهر من كام يوم هاشتاج عالمي على تويتر اسمه #PostYourFavMirror ، وعشان تشارك في التريند ده لازم تعرف الأول تتصور سيلفي ازاي:

1- دور على مرايا كويسة:

خلي بالك من حجم المرايا، المرايا تكون طويلة ومش من المرايات اللي بتتخن وتكون نضيفة عشان لو مش ممسوحة هتلاقي ده ظاهر في الكاميرا بكل وضوح، بس طبعا لو كنت عايز صورة لوشك بس ممكن تتصور في المرايات الصغيرة.

2- روق الأوضة أو الباك جراوند للمرايا اللي هتظهر فيها:

فمثلا لو كنت هتتصور في أوضتك أو في أي مكان في بيتكوا مش لازم تبين كميات الهدوم اللي على السرير ولا باسكت الزبالة في المرايا، خلي بالك إن المرايا بتوضح جزء كبير من المكان اللي وراك.

3- دور على مكان فيه اضاءة طبيعية:

دور على مرايا تكون الشمس هي إضاءتها أو ياريت تفتح الشبابيك والستاير أحسن، ولو كان الوقت ليل ممكن تفتح الإضاءة الهادية أحسن من الأنوار العالية لإنها هتخلي بشرتك باهته، واتأكد من الضوء مايكونش في ضهرك  لإن النور لو لفي ضهرك دي هتبقى صورة ضلية.

4- بص للكاميرا مش للمرايا:

خلي عينك في شاشة الموبايل مش للمرايا، الوضع ده هيساعدك كمان ماتبانش إنك محرج أو مجبر إنك تتصور، وبلاش تضحك أوي بدل من الضحك أوي جرب تضحك ضحكة خفيفة أو تكشر ده هيبقى أحلى.

5- قدم رجل عن رجل، أو اعمل رجلك "كروس":

لو  قدمت رجل عن رجل، أو عملت رجلك "كروس" رجلك هتبان أرفع، تخيل نفسك كأنك هتاخد خطوة لقدام أو خطوة لورا.

6- عشان تبين هدومك ابعد رجل عن الرجل التانية حاجة بسيطة:

وده عشان تسلط الضوء على الهدوم اللي إنت لابسها، افرد كتافك وممكن تفرد الأيد التانية اللي مش ماسك بيها الموبايل، عموما ممكن تحرك إيدك بشكل طبيعي أو بالشكل اللي يناسبك.

7- جرب أشكال تانية قدام المرايا غير إنك تقف:

خلي فيه تنوع في صورك قدام المرايا، وممكن تجرب إنك تقعد مثلا على الأرض قدام المرايا أو لو واقف ممكن تحط رجلك على طرابيزة قدامك.

8- امسك الموبايل بزاوية لتحت شوية عن وشك:

اتأكد إن ارتفاع الموبايل أقل من ارتفاع مستوى دقنك، وكل ما الموبايل كان فوق كل ما هتبان أرفع وأطول، والعب على الارتفاعات لتحديد اللي هيناسبك.

9- لو مش عايز الموبايل يبان في الصورة ابعد الموبايل لبرا عن المرايا:

مد ذراعك للجنب وخلي زاوية الموبايل في اتجاه جسمك، وطبعا قبل ما تلقط الصورة اتأكد من إن شكلك مظبوط فيها.

Comments: