ليه أغاني معينة بتعلق معانا طول اليوم؟ اعرف السبب العلمي

16/04/2019

كتب - رحاب سعدي 

بيكون يوم أسود حقيقي مش عليك لأ على الناس اللي قاعدين معاك لما تلزق أغنية في دماغك ومتعرفش تخرجها، بتحاول بكل الطرق بس هي بتطلع منك بشكل تلقائي، دي حاجة اسمها متلازمة الموسيقى اللاإرادية أو متلازمة الأغنية الأخيرة، طلع الموضوع حقيقي وكمان علمي.

نشر موقع  "medical daily" تقرير بيقول فيه إن باحثين من ضمنهم خبير في العلوم الإدراكية اسمه لاسي ليكانين دورهام أشاروا إلى أن 90% من البشر بيصابوا بمتلازمة آخر أغنية في الأذن واللي إحنا بنعبر عنها بأن الأغنية بتعلق في وداننا ومش بترضى تخرج منها ودة عادة بيحصل في الأوقات اللي مبتكونش بتعمل حاجات كتير أو دماغك مش مشغولة بحاجة مثلًا.

 

طبعًا متلازمة الأغنية الأخيرة زي ما سماها العلماء ليها أسباب أو بمعنى تاني إن الاغنية اللي هتلزق في دماغك لازم يكون ليها 3 خصائص محددة، أولها سرعة وشكل اللحن، أما عن الخاصية التانية فهي فترات الاستماع للأغنية (لو سمعتها أكتر من مرة)، والخاصية الأخيرة هي ارتباط الاغنية دي أو الموسيقى اللى بترددها كتير بموقف معين، زي إنك كنت بتسمعها لما كنت بتلعب رياضة في الجيم وبالتالي في المرات اللى هتحاول تلعب فيها رياضة وإنت مش بتسمع أغاني هتردد في ودانك الموسيقى نفسها علشان ارتبطت بموقف معين.

وفي دراسة تانية تمت في جامعة "جولد سميث" البريطانية أجراها 6 باحثين أشارت إلى إن الظاهرة اللي أطلقوا عليها "دودة الأذن" بتحصل مع آخر أغنية سمعتها وكل ما زاد عدد مرات التكرار كل ما ثبتت الأغنية أكتر في دماغك وكان صعب إنك تخرجها، كمان سبب تاني بيخلي دودة الأذن تحصل وهو حاجة اسمها ترابطات الذاكرة واللي بتكون عبارة عن إثارة متلازمة دودة الأذن أو متلازمة الموسيقى اللاإرادية لما تشوف أي صورة ليها علاقة بالأغنية.

Comments: