الـ Multitasking شطارة ولا فهلوة ولا خيبة؟

18/04/2019

إنك تبقى شخص بتعرف تعمل أكتر من حاجة في نفس الوقت دي حاجة بتخلينا فخورين بنفسنا، الأشخاص اللي بيعملوا كذا حاجة في نفس الوقت اسمهم Multitasking، بالرغم من فخرهم بنفسهم بس للموضوع شوية عيوب.

لكن خلينا نتكلم الأول عن مميزات إنك تبقي شخص Multitasking بعدين نقول العيوب زي ما قال موقع greengarage

1- الكفاءة هتزيد:

خلينا نعترف إنك لما تنجز كذا حاجة في وقت أقل ده هيخليك تخلص حاجات أكتر، فممكن الشخص الـ Multitasking يقدر يعمل كذا حاجة في الوقت اللي غيره يعمل فيه حاجة واحدة بس، لكن فيه شوية مواقف روتينية هتلاقي نفسك بتعمل كذا حاجة في نفس الوقت زي كل يوم الصبح وإنت بتشوف إيميل الشغل وانت بتتكلم في التليفون، أو زي ما تبقى بتاكل وتتفرج على التلفزيون في نفس الوقت.

2- زيادة الإنتاج:

مش كل المهام اللي الشخص بيعملها ممكن تزود إنتاجية الشركة أو الشغل اللي هو فيه، فلو الشخص ده قدر يشتغل في نفس الوقت اللي بياكل فيه هينجز في الوقت اللي بيضيع في حاجات مابتزودش إنتاجية الشغل.

3- زيادة المرونة:

الشخص الـ Multitasking بيبقى قادر يركز في كذا حاجة في نفس الوقت وده اللي بيزود التركيز عنده، وبيدرب الشخص على إنه يركز وهو بيبدل من مهمة للتانية وده اللي بيخليه يكون شخص مرن في التركيز.

4- القدرة على التكيف:

قدرة الشغل إنه ينقل تركيزه بين حاجتين أو كذا حاجة بسرعة بتزود قدرة العقل البشري على التكيف، وعموما تركيز الإنسان مرن، أول ما بيتكيف على المرونة بيفضل كده.

عيوب بقى إنك تبقى شخص Multitasking :

1- الجودة هتقل:

إنجاز كذا حاجة في نفس الوقت احتمال كبير يقلل من جودة الحاجة اللي إنت بتعملها، مش هتكون أحسن حاجة لإن تركيزك كله ماكنش في نفس الحاجة، وده اللي بيسبب إن غلطات كتير بتحصل.

2- التشتيت:

الـ Multitasking بسهولة جدا هو إنك تركز في كذا حاجة فتتشتت في كل حاجة، وممكن يوصل لإن الشخص يبقى دايما مشتت، وده اللي بيخلي الشخص مابيقدرش يركز على الحاجات البسيطة ولا المعقدة.

3- التسويف وترتيب الأولويات بطريقة غلط:

اعتقاد الشخص إنه يقدر يخلص المهام اللي عنده بسهولة وفي أي وقت وتحت أي ظروف بتخليه يماطل، وبالتالي الشخص بيفقد ترتيب أولوياته ومهامه بطريقة صح وبيستخدم "الفهلوة"
 

Comments: