منظمة عالمية تنشر صورا لتعذيب خيول وجمال في الأهرامات

21/04/2019


موقع metro البريطاني نشر خبر عن فيديوهات انتشرت عن التعذيب والإساءة للحيوانات المستخدمة في الأماكن السياحية في مصر زي الخيول والجمال. منظمة PETA asia قالت في نهاية الأسبوع اللي فات إن فيه صور وفيديوهات تم التقاطها في أماكن سياحية خصوصا في أهرامات الجيزة وسقارة والأقصر، لخيول وجمال بيتم تعذيبهم.

ظهر في الفيديوهات إنه بيتم إجبار الخيول والجمال إنهم يتحركوا تحت درجة حرارة عالية وجروحهم مفتوحة مع ضربهم في أماكن حساسة، وقال شهود عيان إن الجمال بيتم ضربهم في سوق "برقاش" للإبل قبل ما يتم بيعها.

وده كان السبب إن PETA بتطالب حاليا بمنع استخدام الحيوانات في أماكن السياحة في مصر، وقالت المتحدثة باسم المنظمة إن فيه فيديو ظهر فيه بعض العاملين في منطقة الأهرامات، بيضربوا الحصان بعنف لدرجة إنه انهار ونام على الأرض في حين إنهم كملوا ضربه عشان يجر العربية، وكان واضح إن الحصان اتصاب بجروح كبيرة بس استمروا في ضربه لحد ما قام وجر العربية.

وقالت كمان إن فيه خيول كتير للركوب في الجيزة والأقصر بتعاني من جروح صعبة وبتقف تحت الشمس بجروحها من غير أكل أو مياه ومن غير حتى ما تقف في أماكن ضل، وخيول وجمال تانية ضلوعها بانت من جلدها بسبب الضرب وقلة الأكل، وفي سوق "برقاش" للجمال قال شهود عيان إنهم شافوا الجمال وهي بيتم ضربها وبتصرخ.

إليسا إلين مديرة PETA قالت إن من المخزي إنه يتم ضرب حيوانات منهكة وضعيفة، وإن الحيوانات بتشتغل تحت درجة الحرارة العالية حتى بعد ما تنهار وتقع، وطالبت كمان وزارة السياحة المصرية استبدال الحيوانات بعربيات حديثة عشان السياح يقدروا تاريخ مصر الغني من غير ما يتم استخدام العنف ضد الحيوانات.


 

Comments: