ورش لتعليم أطفال أسوان الفنون في مهرجان أشري نارتي التالت

21/04/2019

فعاليات مهرجان أشتري نارتي التالت للفنون في قرية غرب سهيل النوبية في أسوان بدأت، المهرجان بيهتم إنه يعلم أطفال أسوان مهارات مختلفة في الفنون على إيد عدد من الفنانين والمصورين المتخصصين.

في اليوم الأول للمهرجان من الساعة 11 الصبح لحد الساعة 4 العصر استقبل أكتر من 100 طفل، الأطفال حضروا الورش الفنية عشان يتعلموا.

وقال المصور جلال المسري رئيس المهرجان إن اليوم الأول كان فيه عدد من الورش اللي بتتضمن ورش صناعة العرايس من الفوم، وورشة "بونساي" وهي عبارة عن ورشة بيتم صنع شجر فيها من النحاس والخرز، طبعا غير ورش الرسم والتلوين، وقال كمان إن الأطفال دخلوا ورش مباديء التصوير وورش حكي واللي بيرسموا فيها الحكايات زي ما اتخيلوها.

وقالت ضحى إبراهيم المدير الفني للمهرجان، إن دي تالت دورة للمهرجان على التوالي، وأكدت إن فيه حرص على تعليم أطفال النوبة وأسوان الفنون المختلفة، وإن اللي بسطهم أكتر هو حضور وانتظام الأطفال اللي حضروا في الدورات اللي قبل كده، ده غير النتايج الفنية المميزة اللي ظهرت من الأطفال في نهاية الورش.

الجدير بالذكر إن مهرجان أشري نارتي التالت للفنون هيكمل فعالياته لحد يوم 26 أبريل.

Comments: