٩ أسباب منطقية للي بيكرهوا Game Of Thrones

22/04/2019

التريند العالمي كل أسبوع خصوصا كل يوم حد بالليل و يوم الاتنين كله، هو حلقة جيم أوف ثرونز الجديدة، كل محبين المسلسل بيتجمعوا على الشوشيال ميديا يعملوا يناقشوا الحلقة الجديدة، ويعبروا عن انبهارهم بيها، ويكتبوا الريفيوز بتاعتهم عن الحلقة أو يطلع شخص يحرق الحلقة الجديدة وهنا تبدأ الخناقات، بس بيبقى فيه ناس ملتزمة الصمت خالص ومش فاهمين مين الشخصيات دي أصلا ولا فارق معاهم الأحداث وهما رابطة كارهي "جيم أوف ثرونز"، طبعا المسلسل ممكن يكون الأهم والأنجح في التاريخ، من ناحية ضخامة الإنتاج وجودة الكتابة والتمثيل والإخراج، لكن إحنا هنا مش بنناقش مدى نجاحه أو جودته كعمل فني، على قد ما بنناقش وجهة نظر اللي مش بيحبوا المسلسل أصلا، واللي عندهم أسباب منطقية، وفي النهاية هو عمل فني هنلاقي اللي بيحبه واللي مابيحبوش،

لو مش مقتنع إن جيم أوف ثرونز مايتحبش تعالى نقولك ليه ممكن يتكره:

1- شخصياته كتيرة جدا:

فيه مسلسلات كتير اتعمل منها أجزاء كتيرة بعدد شخصيات كبير، لكن مابيتخلوش عن الشخصيات القديمة زي مسلسل The Wire ، وإنك تفتكر كل شخصية تقريبا مهمة صعبة بس مش مستحيلة لكن بالأسماء الصعبة غالبا بتبقى مستحيلة، ممكن يبقى سهل تفتكر شخصية زي Jon Snow بس صعب تفتكر شخصية زي  Myrcella Baratheon اللي بتظهر موسم وتختفي موسم تاني، طبعا مفهوم إنه عالم معقد عشان بيتكلم عن فترة تاريخية خيالية، لكن لو فيه عدد أقل من الشخصيات في المسلسل هيبقى مقبول نوعا ما بالنسبة للي بيكرهوه.

2- تيمة الموضوع مش واضحة بسهولة:

كل الشخصيات الكتير اللي موجودة ليها دور(ده دراميا كويس) لكنه بيزود المؤامرات الأساسية والفرعية وبيبقى صعب على الواحد إنه يفتكر كل الأحداث دي، وده اللي بيخلي المتفرج مشتت ومش عارف المسلسل عايز يقول إيه بسبب العلاقات المعقدة بين العائلات اللي في مواقع سلطة.

3- فيه مؤامرات كتير أسباب واضحة:

إيه ممكن يبقى محبط أكتر من إنك تتفرج على قصص مالهاش نهاية معينة، وليه ممكن يبقى فيه أحداث فرعية مالهاش غرض أساسي في الموضوع وتحس إن المسلسل بيتمط وخلاص، غالبا النقطة دي بتأكد النقطة اللي فاتت وزي ما كتب توم لي في موقع Deadspin إن بيكون فيه تفسيرات كتير في المسلسل عشان يشرح المؤامرة أو الحدث اللي حصل، وبعدين بيحصل حدث مأساوي أو مريب عشان يشد الجمهور.

4- مشاهد جنسية من غير سبب:

في البداية كانت المشاهد الجنسية في سياق الدراما حرفيا زي مثلا "روس" العاهرة اللي اتقتلت في بداية المسلسل، لكن بعد كده كترت المشاهد الجنسية في المسلسل زي الاغتصاب وزنا المحارم، ونقاد كتير انتقدوا تعرض سانتا للاغتصاب في ليلة زفافها، وده اللي خلى "فيمينستس" يبطلوا يتفرجوا عليه.

5- ممكن التنبؤ بيه:

طبعا صعب التنبؤ بالأحداث اللي ممكن تحصل في الحلقة اللي جاية لإن دي أكتر حاجة روشة في المسلسل، لكن مش هتتخض لو حصل مشهد قتل أو حرب أو اغتصاب أو أي مشاهد عنف.

6- الناس الطيبة في المسلسل بتموت:

ممكن ده يبقى كويس عشان غير متوقع بس فيه ناس كتير بتتمني تشوف البطل بيكسب في أي موقف، فيه أشرار كتير في المسلسل، ومكملين لحد النهاية، طبعا شيء ممتع إنك ماتتوقعش إن الأبطال يموتوا في نص الأحداث لكن ضروري برضه يبقى فيه توازن في الأحداث.

7- كآبة كتير:

أكيد كل الناس حتى اللي عمرهم ما شافوا المسلسل عارفين كميات الناس اللي ماتوا في المسلسل، عشان كده مافيش حظ ولا أحداث سعيدة في المسلسل، طبعا الواقعية الجريئة دي حلوة جدا لكن بعد 50 حلقة أكيد هتتعب.

8- قلة المصادقية:

أغلب الناس اللي بيعجبها جيم أوف ثرونز بيعجبهم عشان خيالي وفاقد للمصداقية، ودي نقطة ضعف بالنسبة للناس اللي بيحبوا الأعمال الفنية الواقعية

9- متابعين جيم أوف ثرونز:

من أكبر مشاكل جيم أوف ثرونز المتابعين بتوعه وده لإنهم متشددين جدا ومش قابلين إن حد ينتقد المسلسل، يعني مثلا لو حد منهم قرا المقال ده دلوقتي هيجلدنا.

Comments: