أكلاتك المفضلة ممكن يبقى فيها سم قاتل: منها البطاطس والكاجو

24/04/2019


الأكل متعة، وأكلاتك المفضلة هي اللي ممكن تعدل مود يوم سيء، أو تخرجك من حالة زهق وملل، أو تبقى مكافأة نهاية يوم شغل متعب، لكن فكرت قبل كده إن أكلاتك المفضلة زي البطاطس والمشروم واللوز ممكن يبقى فيهم سم قاتل؟ موقع Best life جميع أبرز الأطعمة اللي كلنا بنحبها، وممكن يبقى فيها سموم

1- البطاطس
 


صديقة الجميع، حبيبة الشباب، رفيقة الفاست فود، مسلوقة أو محمرة أو مشوية، بملح أو بكاتشب أو بمايونيز، واحدة من أكتر الأكلات المحببة للبشر في العالم، بينمو معاها أثناء نموها في الورق والجدور والثمار مادة كيميائية سامة اسمها "سولانين"، وهي مادة بتنتجها البطاطس كميكانيزم دفاعي ضد أي حشرات أو آفات ممكن تتعرض لها، ومع الوقت بتحتوي كل ثمرة بطاطس على متوسط 10 ميللي جرام "سولانين"، وثمار البطاطس المتراكمة عليها "السولانين" بيبقى لونها أخضر.

200 ميللي جرام من "السولانين" ممكن يسببوا اضطرابات في المعدة وغثيان وقيء ودوخة وصداع وهلوسة، عشان كده أكل كمية كبيرة من البطاطس اللي فيها اللون الأخضر ممكن يكون مؤذي، وكذلك شرب شاي ورق البطاطس، وكمية كبيرة جدا من "السولانين" ممكن تؤدي للموت.
 

2-  الكاجو
 

نبات الكاجو دايما بيتباع مقشر لأن تقشيره صعب وممكن يسبب نسبة قاتلة من السمية، أوراق الكاجو والجزء الفاصل بين القشرة والثمرة نفسها بيحتوي على مادة دهنية سامة اسمها اليوروشيول، اللي بيضيع مفعولها مع الحرارة

3- بياض البيض
 

بياض البيض فيه مادة مثبطة للتربسين، وهي بتتفاعل مع بروتين البيض وبتسبب عسر هضم البروتينات عموما، وممكن تؤدي للموت البطيء

4- اللوبيا
 

اللوبيا فيها مادة كيميائية سامة بتمكن أي عنصر خارجي إنه ينفذ من غشاء الخلية، وبالتالي مفيش مناعة ولا يمكن للشخص إنه يسيطر على جسمه أو يحافظ عليه من أي أجسام خارجية، والأعراض ممكن تبدأ بعد أكل حبات قليلة من اللوبيا، ولتجنب السمية وأعراضها، لازم يكون الطبخ على أعلى من 100 درجة مئوية، والبعض بيوصي بإنها "تتنقع" 5 ساعات قبل طبخها.

5- اللوز - التفاح - المشمش
 

الحاجات دي مفيهاش سموم بشكل مباشر، لكن بذورها فيها نسبة عالية من السمية واللي مقادير صغيرة جدا منها ممكن تستخدم كعلاج للكحة، في حين زيادة الجرعة ممكن تؤدي لحالة من الضعف العام وآلاف في الرأس وهبوط وصداع وتشنجات، وممكن تؤدي للموت في النهاية 

Comments: