١٢ خطوة تخليك تنسي شخص كنت بتحبه

24/04/2019


من أصعب اللحظات على الواحد إنه يفركش أو يسيب شخص كان مرتبط بيه خصوصا لو لسه بيحبه، لكن بشوية خطوات وشوية وقت وصبر أكيد هتتخطى وتنسى وتدور على السعادة مع شخص تاني، ابدأ إنك تقطع أي تواصل بينك وبين الشخص، وشوية تفاصيل صغيرة كده هنقولك تعملها إزاي:

1- اقطع الاتصال بينكوا تماما:

صعب جدا تتغلب على وجود شخص ما في حياتك وإنت لسه بتكلمه أو حتى إنتوا مجرد صحاب، حتى لو عايز تبقوا صحاب بعد كده ممكن تاخد بريك طويل من الشخص عن طريق إنك تعمله "أنفريند" أو بلوك من على السوشيال ميديا حتى لو ده هيضايقك شوية أو هيضايق الطرف التاني، فممكن تقوله إنك عايز تبقوا صحاب بعدين بس دلوقتي إنت محتاج فترة راحة طويلة، ولو هيبقى غصب عنك بتشوف الشخص ده اتعامل معاه بطريقة لطيفة من غير ما تبقوا صحاب.

2- تخلى عن فكرة إن ممكن ترجعوا لبعض تاني:

كل ما تفكر إن إنت والشخص ممكن تبقوا مع بعض تاني ده هيخليك صعب تتخطى العلاقة، ولما تحس إنك محتاج العلاقة دي افتكر إنك محتاج تتخطاها، وقول لنفسك إنكوا فركشتوا عشان سبب وإنك تستحق تتخطى العلاقة.

3- اكتب جواب للشخص وماتبعتهوش:

قول كل مشاعرك اللي حاسسها على ورقة، واكتب الذكريات الكويسة والوحشة اللي بينكوا، واحتفظ بالورق والرسايل دي لإن مفيش داعي إنك تبعتهومله، وخد وقتك عشان تخرج من العلاقة دي.

4- امسح إيميلات الشخص والرسايل والفويسنوتس:

لو عندك رسايل من الإكس كل شوية هتدخل تقراها وده شيء هيخليك متمسك بالماضي، لو كنت عايز تخلي الذكريات دي معاك ممكن تحطها مثلا على كارت ميموري تاني وتديها لواحد صاحبك لحد ما تتخطى ده، ونفس الكلام طبعا ينطبق مع الصور حتى الصور المطبوعة.

5- فكر نفسك بالأسباب اللي دمرت العلاقة:

لإنك لو بتفشل إنك تنسى شخص أكيد إنت بتحاول تفتكر الأوقات والذكريات الحلوة اللي بينكوا، عشان كده اكتب في ورقة الحاجات السيئة اللي حصلت بينكوا والذكريات المؤلمة اللي خلت العلاقة ماتستمرش.

6- سامح الشخص:

واحدة من الطرق الفعالة عشان تنسى الشخص هي إنك تسامحه على أي حاجة غلط، وممكن تفتكر الصفات الكويسة اللي في الشخص لإن ده هيساعدك تفكر فيه إنه إنسان كامل فيه صفات كويسة ووحشة وإنه ممكن يغلط، وده ممكن يساعدك إنك تسامحه، وخليك عارف إنك لما هتسامح الشخص ده أحسن ليك.

7- ماتلومش على حد:

ماتلومش على نفسك عشان انفصلتوا وماتلومش على الطرف التاني في العلاقة، لإن مفيش حد يتلام عليه لإن إنتوا ماكنتوش متفقين، ولو لسه فيه بينكوا علاقة وديه حاولوا ماترموش اللوم على حد فيكوا.

8- غير رغبتك في تغيير الماضي:

أكيد هيجي عليك وقت وتندم على حاجة عملتها في الماضي أو رد فعل ماكنتش عايز تعمله، وده طبيعي إنك تبقى عايز تغير الماضي بس غير رغبتك في ده، كل اللي تقدر تعمله هي إنك تغير رغبتك في تقبل الماضي.

9- روح لدكتور نفسي لو تعبت:

كلنا معرضين إننا نتعب أو نعاني ماتقللش من حجم المعاناة اللي إنت فيها أبدا، واطلب المساعدة من حد "بروفيشنال"، مافيش أي داعي يخليك خايف أو قلقان من الخطوة دي.

10- علم نفسك تبقى شخص مستقل تاني:

فكر نفسك إنك شخص مستقل ولوحدك مش محتاج شخص تاني عشان يكملك، وإنك قابل نفسك زي ما إنت وفي الوقت ده حاول تكتشف نفسك مرة تانية، واعمل قايمة بالحاجات اللي ممكن تعملها وإنت سينجل مش لازم تبقى في علاقة مع حد.

11- اتجمع مع صحابك وعيلتك:

أكتر ناس هيفهموك ويقدروا يقدموا دعم ليك من غير مقابل هما أهلك وصحابك لإنهم عايزين يشوفوك كويس، وماتخافش إنك تطلب منهم حب إضافي في الفترة دي، الاكس مش هو الشخص الوحيد اللي حبك وحبيته أهلك وصحابك قادرين يساعدوك في التغلب على التوتر والعواطف.

12- ادخل علاقة تاني:

ادي نفسك وقت مناسب وكفاية للحزن والنسيان ولما تكون مستعد اتعرف على ناس تانية وادخل علاقات جديدة

Comments: