ثقافات دول العالم في التأخير عن المواعيد: المصريين مش لوحدهم

26/04/2019

المواعيد المظبوطة أو الانضباط في المواعيد عموما شيء نسبي من شخص للتاني، مش بس كده هو غالبا بيبقى ثقافة في البلد نفسها وحاجة بيتربوا عليها وعلى حسب كمان الشخص ما اتعود بمعنى إنه لو اتأخر على معاده 5 دقايق وحصل مشكلة هيتعلم إنه مايتأخرش تاني، بس لو الموضوع عدى أو هو كان أول واحد ييجي أصلا فبيتعلم إن التأخير حاجة عادية.

وزي ما التعامل مع الوقت شيء نسبين فممكن يبقى التأخير في بلد ما سلوك بشع لكن في بلد تانية مقبول عادي، وعشان كده دكتور اسمه "جيمز" عمل دراسة للخصائص الثقافية في الالتزام بالوقت على حسب موقع Boredpanda وكانت نتايجها:

1- كوريا الجنوبية: مجتمع منظم جدا، والثقافة الأساسية عندهم هي تجنب الإحراج والإزعاج فلازم الشخص ييجي في معاده بالظبط.

2- ماليزيا: بيتقال كتير عنهم إن موقفهم من الالتزام بالمواعيد في اللذيذ في المواعيد الشخصية والمهنية "زي عندنا في مصر كده"، وممكن ده يبقى راجع لزحمة المرور اللي عندهم والمواصلات اللي بتتعطل أوقات كتير، فمعنى إنهم يقولوا قدامي 5 دقايق وابقى عندك يعني احسب ساعة.

3- الصين: المواعيد بتختلف من المواعيد المهنية عن المواعيد الشخصية، فهي حاجة مش طبيعية لو حد راح لصحابه في معاده بالظبط، بس التأخير بيبقى 10 أو 20 دقيقة بالكتير عن المعاد المتفق عليه ومابتحسبش تأخير يعني بيتحسب إن الشخص جيه في معاده.

4- اليابان: بالرغم إن اليابان معروفة بالمغامرين إلا إنهم مابيغامروش في حوار الوقت ده خالص، لإن التأخير عموما بيوصل لمرحلة عنيفة، لو القطر اتأخر دقيقة واحدة عن المعاد في الجدول بتاعه ده بيتحسب تأخير.

5- المكسيك: طبيعي جدا إن الواحد يستني نص ساعة تأخير عن المواعيد الرسمية للاجتماعات!

6- ألمانيا: شكرا للتاريخ الصناعي في البلد دي اللي علم أهلها إنهم لازم يجوا قبل المعاد بـ 10 دقايق، لكن أكيد طبعا فيه مجموعة من الناس ممكن يبقوا بيكسروا الصورة النمطية للبلد وعشان كده الناس اللي بيتأخروا عليهم بيبدأوا يسألوا إزاي لسه فيه ناس عايشة على الأرض ممكن يحصلهم أي ظروف تأخرهم ثانية على معادهم!

7- نيجيريا: لو متفقين على إن الاجتماع هيكون الساعة 1 معناه إن الاجتماع هيبقى أي وقت بين الساعة 1 للساعة 2، عدد سكان البلد تقريبا 180 مليون نسمة فالتعميم ممكن يبقى غير عادل وممكن حركة المرور والبنية التحتية للبلد بتأثر بشكل كبير على مواعيد الشخص في البلد.

8- البرازيل: لما تتفق على معاد مش شرط تروح فيه إلا لو استخدموا كلمة "English time" لازم تيجي في معادك، فيه تسامح كبير في فكرة التأخير عن المعاد، ولو كنت أجنبي ورايح البلد فأنت ماينفعش تتأخر لإنهم هيعاملوك بجملة "English time".

9- السعودية: الوقت مش حاجة مهمة في السعودية، عادي إنك تتأخر نص ساعة على معادك، ممكن تبقى يبقى راجع للجو الحر اللي في البلد اللي بيخلي الناس تعمل كل حاجة بالراحة، وطبعا إنك تبص في ساعتك وإنت في معاد يعتبر عيب.

Comments: