٥ رسايل بتبعتها لغة جسدك من غير ما تحس

26/04/2019


لغة الجسد أو الـ Body Language هي لغة غير منطوقة ومع ذلك هي مهمة بالظبط زي الكلام اللي بيتنطق لإن الإشارات دي على الرغم من كونها خفية فجسمنا بيعملها بسبب إدراكه للمحيط اللي حواليه، وعشان يعبر عن نفسه حتى لو إحنا مش عايزين نقول الكلام بشكل صريح، واللي عن طريقها بيبقى فيه تأثير قوي على الناس اللي بتتكلم معاهم، عشان كده هنقولك على 5 رسايل خفية بيبعتهم الجسم في مواقف معينة:

1- رفع الحاجب:
 

لما بترفع حاجبك رفعه سريعة ده بيحصل غالبا من غير ما تاخد بالك، وغالبا بيحصل وإحنا بنتعرف على حد من أول مرة، لكن ممكن يحصل وإنت واعي لما تبقى بتسلم على حد أو بتصبح عليه فترفع حواجبك، قالت إخصائية السلوك البشري إيريناوس إيبسفلدت، إن حركة رفع الحاجب هي حركة عالمية بتحصل في لحظة إدراكك للشخص اللي قدامك، إنك عارفه وعايز تحييه أو تسلم عليه.

2-اتساع حدقة العين:
 

فيه سلسلة من الأبحاث لقيت إن شكل الستات بيبقى أحلى لما عنيهم بتبقى أوسع أو لما بيتعمدوا يوسعوا عينيهم، ده بيرجع لإن الستات عند الفراعنة كانوا بيكحلوا عنيهم وبيرسمهوها بطريقة تبان أوسع، عشان كده ممكن الست تتعمد تدي نظرة بعين واسعة في وقت معين عايزة تبان فيه جميلة زيادة

3- حركة "مظبوط" أو "هقطعك":
 

الحركة دي هي اللي بتضم فيها صباعين السبابة والإبهام على بعض وترفع باقي الـ 3 صوابع لفوق، الشخص اللي بيعمل الحركة دي كأنه بيقول أو بيأكد إنه فهم خلاص، وغالبا بينقل إحساس إيجابي للشخص اللي بيشوف الحركة لإنها بتنقل له إحساس بالحكمة.

4- الضحكة الصفرا:
 

فيه مجموعة أبحاث عملها بول إيكمان وزمايله عن الابتسامات الحقيقية اللي بتبين السعادة الصادقة والسعادة المزيفة، ولقوا إن مفتاح التميز بين الضحكتين موجود في العيون، وفي الغالب الابتسامات الصفرا أو المزيفة بتكون عشان ترضي حد واللي غالبا بتوصله بيها أنا ببتسملك بس أنا مش مستمتع بده وحاسس إني متضايق.

5- قبضة الإيد:
 

وهي القبضة المقفولة اللي بيكون فيها الإبهام مرفوع، وهي أداة فعالة جدا وبتنقل تأكيد الكلام بطريقة إيجابية، لو اتفرجت على خطابات لرئيس أمريكا الأسبق بيل كلينتون هتلاقيه كان بيستخدم الحركة دي كتير.

Comments: