٦ نصايح عشان تطلب من بنت معجب بيها الخروج في Date

26/04/2019

من أشد لحظات التوتر اللي بيعيشها أي شاب، هي اللحظة اللي بيقرر فيها يطلب من بنت معجب فيها إنهم يخرجوا في Date، وقتها بيبقى عارف كويس إن ممكن طلبه ده يترتب عليه فشل وانتهاء العلاقة من قبل ما تبدأ، أو إنه هيبقى مدخل كويس هيكشف عن إعجاب متبادل، ده غير موقف الأصدقاء المشتركين من الموضوع لو عرفوا.

القرار والإقدام عليه صعب خصوصا للي ماجربوش قبل كده أو معندهمش الخبرة والخفة اللازمة للطلب ده، عشرات من سيناريوهات الرفض هتيجي في دماغك وإنت بتمسك موبايلك عشان تسألها عندها مانع تنزل معاك ولا لأ، عشان بنقدم لك قايمة نصايح تخليك تتعامل مع الخطوة الأولى بذكاء:

1- خطط كويس.. واهتم بالخطط البديلة

ماتقولهاش إنك عايز تشوفها أو تنزلوا مع بعض وخلاص، حدد إنك عايز تنزلوا باليوم والساعة والمكان اللي هتروحوا فيه، ولو قالت إنها مش حابة المكان أو نوع الأكل أو طبيعة النزولة أو مش فاضية اليوم ده، لازم يبقى عندك خطط بديلة بمواعيد تانية وأماكن ونشاطات تانية، ولو اتكرر رفضها لاقتراحات البديلة، يبقى هي مش مهتمة وإنت لازم تنسحب بهدوء

2- اختار المكان

اختيار المكان عامل مهم لنجاح الخطوة الأولى، لو اقترحتها عليها مكان معروف إنه رومانسي جدا أو إنه بتاع couples بس هتقلق من أولها، خليك في مكان متوسط المستوى ينفع لـ couples وينفع لصحاب، عشان ماتبقاش حاسة إنها متكتفة أو متحاصرة من أولها، وبنفس المنطق ماينفعش يبقى club أو مكان صاخب زيادة عن اللزوم، الـ date الأول ده للتعارف والكلام والرغي فماينفعش تروحوا مكان مش هتسمعوا بعض فيه.

3- اختار الوقت

اختيار الوقت لا يقل أهمية عن اختيار المكان، اعرف كويس حالة الجو عاملة إزاي اليوم اللي هتنزلوا فيه، العواصف والتراب والحر والتلزيق هتسبب مود سيء وضيق ليكوا إنتوا الاتنين، ويمكن تبقى ذكرى وحشة بينكم، اختار كمان وقت يكون لطيف بالنسبة لها، يوم أجازة، يوم قبل/ بعد عيد ميلادها على طول

4- اسألها وجها لوجه

بلاش تستخدم التليفون سواء مكالمة أو Texting عشان تطلب منها تنزلوا في date، الوسايل دي هتحرمك من التواصل الحي معاها وإنك تستكشف رد فعلها اللحظي ده غير إنها ممكن تسبب سوء تفاهم في الردود خصوصا المسدجات الأونلاين، استنى لما تقابلها وكلمها بينك وبينها، حدد المعاد والمكان واسألها واستنى ردها، لكن لو مش بتقابلها كتير أو مش بتقابلها خالص، يبقى لازم تبعت مسدج، وساعتها خليها بسيطة على قد ما تقدر

5- استعين بصديق

الأصدقاء المشتركين بينكم ممكن يكون ليهم دور كبير في نجاح الخطوة الأولى، اسأل صديق مشترك عن تفضيلاتها وعن الحاجات اللي مش بتحبها، ماينفعش تقول لها في أول date يلا ناكل سوشي وهي مش بتحبه، أو تعالي ناكل ستيك وهي نباتية، وعموما الاستعانة بصديق هتخليك تحدد المكان والوقت بشكل كويس ومناسب حسب اهتماماتها واهتماماتك إنت كمان

6- خليك واضح.. مش أوي

مش لازم تقول في الأول بشكل صريح إنه Date، أحيانا ده بيكون ليه وقع سيء أو بيسبب التوتر لبعض البنات، وبيحسسهم إنهم في ورطة، خلي الموضوع يمشي بسلاسة لكن لو اتسألت بشكل واضح هو ده date أو "إنت مهتم/ معجب بيا؟" لازم تجاوب بصراحة من الأول لأن إخفاء المشاعر هيحطك في zone مش هتحبها

Comments: