تعرف إيه عن تورتة الرنجة؟ شوف الصور واعرف المكونات

26/04/2019


صور كتيرت متداولة على "فيس بوك" لطبق اسمه "تورتة الرنجة" باعتبارها تقليعة جديدة في موسم شم النسيم السنة دي، لكن من 5 سنين بدأت الشيف غادة جميل تحضر الطبق وبنفس الاسم "تورتة رنجة" وهي بالفعل تورتة كبيرة ودائرية الشكل وبتتكون من طبقات، والرنجة هي الطبقة الأساسية فيها، إلى جانب العيش التوست والمستردة والكوبوتشي والبيض والمايونيز والطحينة، وصفة تورتة الرنجة موجودة في فيديو للشيف غادة من برنامجها على قناة CBC سفرة.

ومن قبل غادة جميل، أصل تورتة الرنجة جاي من السويد والنرويج، هو طبق متعارف عليه هناك وبيعتبروه من الأطباق سهلة التحضير، تقدروا تشوفوا من هنا نموذج لوصفة ومكونات وطريقة تحضير تورتة الرنجة من موقع "من النرويج".

أما وصفة الشيف غادة جميل فنشرت CBC مكوناتها كالآتي:

- نصف كيلو رنجة مخلية

- 1 كيس توست أبيض 

- 1 كوب طحينة 

- 1 كوب مايونيز

 - 2 كابوتشي

- عصير ليمون 

- مستردة

- كاتشب

-  كريم تشيز 

- زبادي 

- طماطم شيري 

- حرنكش 

- جزر

طريقة التحضير:

1- اخلطي المايونيز مع المستردة والكاتشب والطحينة والزبادي وقلبيهم كويس

2- ضيفي قطع الرنجة الصغيرة والكابوتشي المقطع للعجنة

3- هاتي "بايركس" حطي فيه قطع "استرتش" أو نايلون ورصي فيه العيش التوست

4- ضيفي طبقة من حشوة الرنجة وبعدين طبقة تانية من التوست وطبقة تالتة من الرنجة

5- اقفلي العجنة دي كلها بطبقة من التوست ولفي على النايلون على البايركس ودخليها التلاجة لمدة ساعتين

6- خرجيها من التلاجة وغطيها بالكريم تشيز وزينيها بالطماطم الشيري والحرنكش والجزر وقدميها باردة

Comments: