عالم مارفل.. 6 أسباب تخلي Avengers: Endgame فيلم ملحمي

01/05/2019

يوم 24 أبريل نزل فيلم Avengers: Endgame وهو كان الجزء الرابع من سلسلة أفلام Avengers وحصل ضجة كبيرة وقت نزوله في العالم كله، وحقق الفيلم إيرادات خيالية في أسبوع واحد، وصلت على مستوى العالم لـ 1.2 مليار دولار، وهو الفيلم رقم 22 في عالم مارفل السينمائي

الجدير بالذكر إن فيلم Avengers: Infinity War اتصدر قايمة على الأفلام اللي حققت إيرادات في 2018 لإنه حقق إيرادات حوالي 2 مليار و350 مليون دولار، أما فيلم Avengers: Age of Ultron حقق مليار و405 مليون دولار، وحقق الفيلم الأول The Avengers مليار و519 مليون دولار.

وعموما Avengers: Endgame هو الفيلم الـ 22 في عالم "مارفل" السينمائي اللي انطلق سنة 2008 بفيلم "أيرون مان" ومن وقتها أسست الشركة لعالم سينمائي متكامل مليان بتشابك وتعقيدات وقصص وحبكات شديدة التنوع، لكنها بتدور في نفس عالم الأبطال الخارقين وبنفس الشخصيات، مع إضافة شخصيات جديدة في بعض الأحيان في نهاية كل فيلم، ثم تخصيص فيلم كامل لاستكشاف عالم الشخصية دي، زي ما مهدت الشركة لظهور "كابتن مارفل" في فيلم Infinity War عشان يبقى الفيلم التالي مباشرة هو "كابتن مارفل".

ناس كتير فكرت إن Endgame هو نهاية سلسلة Avengers، والحقيقة إن "مارفل" عاملة تخطيط طويل الأمد للسلسة عشان تستمر السلسلة في النجاح وجني مليارات الإيرادات من غير ما تقع في فخ الملل والتكرار، عشان كده كانت مقسمة السلسلة لمراحل، ويعتبر Endgame هو نهاية المرحلة التالتة في عالم "مارفل" تمهيدا لبدء المرحلة الرابعة بفيلم عن سبايدرمان.

بالعودة لـ Endgame، هنلاقي أسباب واضحة جدا لنجاحه وكسره الأرقام القياسية لأفلام عالم "مارفل" زي ما قال تقرير لصحيفة theguardian البريطانية:

1- الفيلم بيجمع عدد كبير من"السوبر هيروز": بعد إضافة شخصيات جديدة في السنين اللي فاتت، وبرغم طول مدة الفيلم (3 ساعات)، وده وقت طويل جدا يخلي المشاهد يزهق بس بالعكس مابتحسش بالوقت وإنت بتشوفه، وهتحس بكل المشاعر اللي ممكن تتخيلها وإنت بتتفرج على الفيلم، والمشاكل اللي بيسببها السفر بالزمن بتخلي المشاهد متشوق ومبسوط أكتر بالأحداث.

2- إحساس النهاية: على الورق الفيلم مش نهاية السلسلة، هو نهاية للمرحلة التالتة من أفلام عالم "مارفل"، لكن عموما أحداث الفيلم بتدي المشاهد إحساس إن دي نهاية الشخصيات ونهاية الخطوط الدرامية، وده بيخلي المشاهد مبسوط.

3- في كل مستوى فيه ملحمة: بشكل عام هو الفيلم اللي المشاهد متوقعه، كان Epic طبعا على كل المستويات، وعاطفي وماكنش بيخلى من الكوميديا، كان هيبقى أحلى لو كابتن مارفيل كانت موجودة أكتر، بس اللي بيشوف الفيلم هيتبسط من رجوعها للمعركة الأخيرة.

4- عظمة الأداء: اللي شاف الفيلم يقدر يقول بكل بساطة إن مكنش في دور سيء ولا حتى متوسط على مستوى التمثيل، كل الكاست عملوا أدوارهم بأحسن طريقة ممكنة

5- فيه أجزاء كتير جوا الفيلم حلوة: مثلا زي رحلات الرجوع بالزمن والنوستالجيا اللي فيها، خصوصا في الأوقات اللي ظهر فيها كابتن أمريكا.

6- رسايل بشكل فني: رسايل زي الشجاعة والصداقة والتضحية وغيرهم، بيقولها الفيلم بشكل فني وغير مباشر، جزء من عظمة الأبطال الخارقين في الفيلم ده مش كونهم خارقين أو أصحاب قوى غير طبيعية، إنما إزاي بيتصرفوا في الأزمات ومواقفهم من الحياة بشكل عام.

Comments: