٩ نصايح عشان تحافظ على برودة جسمك في الصيف: ابعد عن اللحوم والآيس كريم

02/05/2019

الموجات الحارة بدأت من دلوقتي والصيف داخل يثبت وجوده، ومع إن استهدام التكييف هو طريق النجاة في الحر، إلا إن إبقاء درجة حرارة الجسم منخفضة والحفاظ على الجسم بارد من الداخل هي طريقة تانية فعالة وأحسن للصحة وللجسم عشان يقدر يقوم بوظايفه الحيوية ويتكيف مع حر الصيف، ده غير إن درجات الحرارة المرتفعة خطر على الأطفال وكبار السن واللي بيعانوا من أمراض القلب، النصايح الجاية نشرها موقع Bestlife المتخصص في الصحة واللايف ستايل، عشان تحافظ على برودة جسمك في الصيف والموجات الحارة:

1- الأكل الـ Spicy

في سبب وجيه بيخلي الأكل الحار والتوابل والشطة ليها مكانة مميزة في الدول اللي درجات الحرارة فيها مرتفعة أغلب الوقت زي الهند، وده بسبب إن الأكل الحار وسيلة لتبريد الجسم لأن مادة الكابسيسين الموجودة بكثافة في الفلفل والنباتات الحارة بشكل عام (الزنجيل - التوم - البصل - الفلفل الأحمر - الفلفل الأسود)، المادة دي بتخلي المخ يدرك إن الجسم بيعاني من حرارة وبالتالي بيفرز بشكل أكبر، العرق اللي بيخفض درجة حرارة الجسم

2- نباتات المنزل

النباتات الطبيعية في البيت غير إنها بتحسن المزاج وبتدي شعور بالراحة، هي في نفس الوقت بتنقي الهوا وبتطلع أكسجين وبتشتغل على ضبط معدلات الرطوبة في البيت أو الغرفة، وده بيساعد في الاحتفاظ بدرجة حرارة منخضة وقت الحر

3- ابعد عن الآيس كريم

رغم عظمة الآيس كريم في كل زمان ومكان، في الصيف والشتا، ورغم الاعتقاد الشائع بإن كون آيس كريم في اليوم الحر بيلطف الجو، لكن على العكس تماما الدهون في الآيس كريم بتحتاج مجهود من الجسم عشان تهضمها وتحرقها، ودايما رفع معدل الحرق والمجهود اللي بيبذله الجسم في الهضم بيرفع درجة حرارة الجسم

4- ابعد عن اللحوم الحمراء

بنفس منطق الآيس كريم، اللحوم الحمرا والمعقدة بتبقى صعبة الهضم هي وأي بروتين معقد بيحتاجوا مجهود كبير للهضم، عشان كده اختيار الأكل والبروتين ومعدل أكل البروتين حاجة مهمة في الصيف، مش بس عشان درجة الحرارة، لكن كمان عشان راحة الجسم عموما

5- الشاي بالنعناع

بالظبط زي مادة الكابسيسين الموجود في الفلفل والمسؤولة عن الإحساس بارتفاع درجة الحرارة (من غير ارتفاع فعلي في الدرجة)، فمادة المنثول الموجودة في النعناع مسؤولة بصورة مباشرة عن خفض درجة حرارة أو بمعنى أدق تلطيف أي وسط بتتعامل معاه، وبالتالي فإن استنشاق المنثول أو شربه أو أكله أو رشه على الجلد بيساعد على تلطيف الجسم، وخلال اليوم الحر ممكن تشرب شاي بالنعناع أو حتى ترش الشاي بالنعناع البارد على جسمك

6- سناكس بدل الوجبات التقيلة

تقليل الوجبات التقيلة اللي محتاجة مجهود من الجسم في الهضم، واستبدالها بسناكس من حين لآخر على مدار اليوم، بيساعد في إبقاء درجة حرارة الجسم منخفضة

7- أكل غني بالمياه

واحد من أهم أسباب ارتفاع درجة حرارة الجسم في الصيف (وفي أي وقت تاني)، هي نقص كمية المياه في الجسم، وبالتالي الاهتمام بفواكه وخضروات فيها نسبة مياه عالية، زي الخيار والبطيخ والكنتالوب، هيعمل فرق كبير

8- البس أبيض

الملابس البيضا والألوان الفاتحة عموما في الصيف مطلوبة لأنها بتعكس أشعة الشمس، وبالتالي امتصاص الجسم/ الجلد للأشعة الضارة هيبقى أقل بكتير

9- البس قطن
 

القطن صحي للجلد في درجات الحرارة المرتفعة لأنه بيمتص العرق وبيساعد إن الهوا يتخلل الجسم بعكس الملابس اللي مسامها مقفولة زي الألياف الصناعية، وهو كمان مناسب لأصحاب البشرة الحساسة وبيمنع عندهم أي تهيج في البشرة أو حكة أو طفح جلدي، وبالتالي بيحافظ على درجة حرارة الجسم معتدلة 

Comments: