٩ برامج بتوضح تطور برامج المقالب في رمضان

06/05/2019

آخر كام سنة ارتبط عند المصريين وقت الفطار ببرامج المقالب، مش شرط برنامج معين، لكن برامج المقالب في العموم بقت حاجة أساسية في رمضان من فترة طويلة من أيام الكاميرا الخفية، وبعدها اتطورت برامج المقالب لدرجة إن كل موسم في رمضان لازم يكون فيه برنامج مقالب أو أكتر، عشان كده جمعنا برامج المقالب اللي اتعملت من أول الكاميرا الخفية:

1- الكاميرا الخفية:

أول برنامج مقالب مصري قدمه في الأول فؤاد المهندس ومثل فيه إسماعيل يسري ومحمد جبر، وكان من إنتاج وكالة "طارق نور" وأول عرض له كان سنة 1983

2- الكاميرا الخفية مع إبراهيم نصر:

في التسعينات بدأ إبراهيم نصر في إعداد وتقديم برنامج الكاميرا الخفية في مواسم كتير منها في موسم كان في دور واحدة ست و اسمها زكية زكريا، وفي موسم تاني عمل شخصية تانية صعيدية وكان اسمه غباشي النقراشي، وأخر موسم للبرنامج اتقدم على قناة دبي في 2011 وكان اسمه "هيما شو"

3- إديني عقلك:

البرنامج استمر تقريبا حوالي 14 سنة، ومقدمين البرامج هما حسين مملوك، ومنير مكرم، والبرنامج كان عبارة عن تنفيذ مقالب في الناس اللي في الشارع واتعرف البرنامج جدا لدرجة إن منفذين البرنامج ظهروا مع عادل إمام في فيلم التجربة الدننماركية.

4- حسين على الهوا:

حسين الإمام هو أول حد يقدم برامج مقالب مع الفنانين كأنهم ضيوف عاديين وبيتفاجؤا بعد كده إنهم في مقلب.. التلفزيون المصري أنتج من البرنامج كذا موسم  "حسين على الناصية"، و"عفاريت حسين الإمام"، و"حسين في الاستوديو" و"حسين على الهوا".

5- حيلهم بينهم:

في الأول قدم عمرو رمزي البرنامج وفكرة البرنامج إن يظهر عمرو رمزي كمذيع بيستفز الفنانين لحد ما يتعصبوا عليه، وفي الموسم التاني وهو كان اسمه حيلهم بينهم كمان وكمان وتم استبدال عمرو رمزي بهبة مندور، وبعد كده ظهر "حيلهم بينهم من الآخر" و"حيلهم بينهم الصلح خير".

6- ماكنش يومك:

برنامج مقالب في النجوم وعن طريق إنهم بيتوهوا في الطريق وهما رايحين التصوير ويكون معاهم منفذ البرنامج ويستفزهم ويخرج عليهم مجموعة من الحرامية ويسرقوا أي حاجة منهم وهكذا لحد ما يبقى يوم مش يومهم فعلا.

7- رامز جلال:

أول ظهور لرامز جلال في برامج المقالب وبدأ سلسلة البرامج مع قناة الحياة وبعد كده مع MBC مصر وكان بدايتها برنامج "رامز قلب الأسد" وكان في 2011 ، وبعدها "رامز تعلب الصحراء" في 2012، وبعدها "رامز عنخ أمون" 2013  وبعد كده "رامز قرش البحر" في 2014، و"رامز واكل الجو" في 2015، "رامز بيلعب بالنار" في 2016، "رامز تحت الأرض" في 2017، و"رامز تحت الصفر" في 2018، وأخيرا رامز في الشلال 2019

واتعرف شعار برامج رامز جلال دايما بجملة "أنا بحب صحابي" وناس كتير اتهموه بالمرض النفسي ده غير كميات الضرب اللي بيضربها رامز جلال وبيخرج بإصابات من الضرب، ده غير تشكيك كتير من الجمهور والإعلاميين في فبركة البرامج

8- هاني رمزي:

بعد ما قناة MBC مصر خدت برنامج مقالب رامز جلال، رجعت قناة الحياة تعمل برامج المقالب عن طريق هاني رمزي، وهما "هاني هز الجبل"، و"هبوط اضطراري"، و"هاني فى الأدغال"، وآخر موسم هو "هاني في الألغام"، وبرضه شكك الجمهور والإعلاميين في صحتها، لكن في الموسم اللي فات في 2018 ظهر هاني رمزي وقال إن فكرة البرنامج تم تسريبها وعشان كده لغى الموسم لانه مايقبلش يعمل برنامج مفبرك.

9- الصدمة:

برنامج الصدمة هو برنامج مقالب له شكل إنساني، مش مهتم إنه يضحك الجمهور على قد ما يبان فيه الإنسانيات في المجتمع العربي عن طريق إن بيحصل في الشارع مواقف غير إنسانية ويشوفوا رد فعل الجمهور العربي في الشارع، واتصور في أكتر من مدينة عربية، مقدم البرنامج هو كريم كوجاك.

Comments: