المُشاهد: ملاحظات الحلقة الرابعة من الموسم التامن لجيم أوف ثرونز

08/05/2019


كتب: كابتن بسلة

قبل المقدمات والدبجات تحذير هام بالحرق، الموضوع ده للي شاف الحلقة ولو ماشوفتهاش ماتفتحهوش إلا لما تشوفها، وقد أعذر من أنذر.

انتهت الحرب الكبرى، واتفضت الجنازة ولأن الحي أبقى من الميت قلبنا فاجأة على الحفلة المسائية بالإنتصار في الحرب المحبطة اللي خلصت بغزة خنجر والحلقة الرابعة اللي خلصت بغزة في قلبنا من زيادة إنحدار مستوى كتابة المسلسل المفضل لينا حلقة عن التانية بعد ما أتعشمنا في الحلقة التانية إنه هيبقى موسم مختلف عن السابع شوية!

1- دينيريس بتزداد وحدة كل يوم عن التاني، في نهاية مشهد مائدة الإحتفال بالنصر واللي كان  من منظور "داني" اللي بنشوف بعينيها إحساسها بالوحدة اللي بيزيد بعد موت جورا وعدم ثقتها الكاملة في مستشاريها وظهور حقيقة جون في حياتها اللي قلبت كل حاجة، دينيريس بدأت تحس بوحدة شديدة والوحدة دايماً بتجيب قرارات غبية زي ما كلنا عارفين وخاصة في نهاية الحلقة بعد ما بتخسر تاني أقرب حد ليها وهي الجميلة "ميساندي" الله يرحمها، فهل دينيريس هتبقى "الملكة المجنونة" وتحرق كل شىء ولا لسه في ذرة عقل عندها؟!

2- ليه الكتاب بيعملوا كدة مع شخصية "جوست"؟! حقيقي تصرفات جون سنو بقت غريبة وأكثرها غرابة هو تعامله في وداع "جوست"، الذئب ده كان شخصية مهمة في أحداث المسلسل وخاض مع جون معارك ولحظات كتير حرجة ويعتبر مش حيوان أليف له ولكن كصديق، فلو تفهمنا السبب اللي قاله جون إنه خايف عليه من الجنوب مش هنقدر نتفهم إن الوداع بينهم يكون بالبرود ده!

3- فريق "دينيريس" عمال يثبت إنه غبي جداً على المستوى العسكري والإستراتيجي، من ساعة ما سابت قارة "إيسوس" ودينيريس كل مواجهتها مع "سيرسي" بتخسر فيها، والمكسب الوحيد كان في ردة فعل إنتقامية منها لما هاجمت جيش اللانستر بالدوثراكي ودروجون، فليه كتاب المسلسل مصممين إن فريق فيه رجل ذكي زي تريون لانستر و رجل داهية وله عيون في كل حتة زي فاريس ودينيريس اللي اختبرت أشكال كتير من الغدر وواجهتها وقائد عسكري زي جراي ورم مايعملوش أقل التصرفات التكتيكية بالتحرك بجيش كبير في البر أو البحر ويبعتوا سرية استطلاع تكون سابقة بيوم على الأقل عنه عشان تحذره من أي خطر أو كمين منصوب له وبمنتهى السذاجة يرجعوا على "دراجون ستون" بأسطول وتنينين وهم مأمنين جداً إن محدش ممكن يأذيهم؟! هو أنتوا كنتوا سايبين شالية الساحل وراجعين له؟! ده مركز القيادة بتاع دينيريس؟! اللي بتتحرك منه دايماً لأي حاجة.. إزاي ده يحصل؟!

4- أنا فاهم إنك ككاتب عمال تقتل في تنانين دينيريس عشان توازن القوى بينها وبين سيرسي.. بس نرجع برضه نقول.. ليه حتى الآن "دينيريس" ما لبستش ريجار ودروجون دروع؟! التارجريان الأوائل كانوا بيلبسوا تنانينهم دروع.. فليه بعد موت التنين الأول ليها على إيد النايت كينج وفي وجود حداد شاطر وذكي زي جيندري في وينترفيل مايجيش لها فكرة إنها تطلب منه تصميم دروع للتنانين؟! تصرفات غريبة من شخصيات المفروض إنها حذرة وذكية!
 

5- جون سنو؟! وعلامة استفهام وتعجب كبيرة، علاقة جون وداني محدش قادر يبلعها بشكل كافي والرومانسية بينهم دايماً بنحس إنها مفتعلة لأنها بفعل الكروتة ماخدتش حقها في المسلسل زي علاقة "يجريت" بجون في المواسم الأولى، فليه جون منصاع بالشكل المستفز ده لرغبات دينيريس، حتى لو هو راجل عايز يحفظ وعده ليها ولكن مفيش مقاومة منه، جون بقى شخصية سلبية جداً ودوره في الموسم ده حتى الآن يضايق، لأنه كان أكتر شخصية محبوبة في المسلسل، يعني تاخد سهم في كتفك من يجريت عشان إيمانك بقضيتك وتسيبها ودينيريس اللي عايزة تعيشك عالطول موصوم بإنك ابن غير شرعي مش عايز تتجادل معاها حتى؟!

6- "أنا مش أخوكوا أنا ابن عمتكوا والوريث الشرعي للعرش" معلومة وخبر المفروض يكون صادم ومخيف لأريا وسانسا ولكن صناع العمل قرروا عشان ما يكرروش المعلومة إنهم يحرمونا من ردة فعلهم عليه، خبر زي ده المفروض كنا على الأقل شوفنا مشهد تابع له بين جون وسانسا أو جون وأريا ونشوف ردة فعلهم عليه، بس التصرف على إن أريا وسانسا دول عادي أي أتنين قالهم الخبر ومش مهم نشوف هيبصوا لجون إزاي ساعتها، تصرف مستفز!

7- وأخيراً سيرسي تقف في منتهى قوتها على أسوار كينجزلاندينج وقدامها دينيريس في منتهى الضعف وتقرر إنها تتحلى بالأخلاق السمحة للهدنة وماتقومش بأمر إبادتها فوراً، سيرسي اللي عملت مذبحة "محرقة" في كل أعدائها وموتتهم في مكان العبادة الأكبر بالمدينة ومحترفة عمل الكماين والأفخاخ للناس، مش عايزة تغدر بالشلة اللي واقفة قدامها دي وتخلص عليهم وتريح دماغها؟! الله يرحمك يا عم تايون لانستر.. الحرب القذرة خسرت كتير من بعدك.

Comments: