إعلانات رمضان السنة دي: لو إعلانك القديم نجح.. انحته

09/05/2019

إعلانات رمضان كل سنة بيبقى ليها سباق خاص بيها، خصوصا لو بين شركات الاتصالات أو زي ما اتعودنا آخر كام سنة إعلانات البنوك كمان والأجهزة والكومباوندز وشركات المياه الغازية، على عكس فترة زمنية معينة لما كان إعلانات رمضان بتدور عن الزيت والسمنة ومنتجات استهلاكية معينة، المهم إننا قررنا نجمع إعلانات رمضان 2019:

1- إعلان فودافون:

الإعلان بيتكلم عن صحاب زمان والعشرة ولم الشمل، وظهر فيه صحاب عمرو دياب القدام، والجداد طبعا وأولهم دينا الشربيني اللي لحد دلوقتي هي مجرد فريق العمل وماصرحش بأي حاجة رسميا عن علاقتهم، بغض النظر عن كل ده بس أغنية عمرو دياب في الإعلان حلوة وفكرة الإعلان عن لم الشمل بالرغم إنها مش جديدة لكن حلوة ومابتخيبش.

2- إعلان اتصالات:

واضح جدا في الإعلان إن اتصالات صارفة ومكلفة والصرف باين يعني، جابوا النجم العالمي فان دام ووافق كمان إنه يطلع يتضرب من محمد رمضان، بالرغم من كل الصرف ده فالإعلان مالوش شخصية وفكرة معينة، هو شوية أكشن على غنا مهرجانات وخلاص.

3- إعلان أورانج:

الإعلان بيتكلم عن الحاجات البسيطة اللي بتفرق كتير مع الواحد، يمكن الفكرة حلوة بس تنفيذ الإعلان مش أحسن حاجة، وماعلمش أوي مع الناس زي أغنية السنة اللي فاتت "جاري يا جاري".

4- إعلان بنك مصر:

بنك مصر في رمضان 2018 عملوا إعلان جابوا فيه العسيلي وأحمد عدوية بيغنوا أغنية حماسية شبابية لطيفة فيها جو تنمية بشرية، الإعلان عجب الناس جدا والأغنية علقت مع الناس، في 2019 حلبوا الفكرة لآخرها عشان أكيد هتعلق مع الناس تاني، بس جيس وات يا بنك مصر؟ حلب الأفكار ده ماعجبش الناس زي الفكرة ما كانت أصلية.

5- إعلان قطونيل:

نفس فكرة بنك مصر مع انعدام للكريتفتي بسيط كده، الأغنية عجبت الناس وعلقت معاهم؟ ومدحت شلبي كمان؟ لا يلا نكرر نفس الأغنية ونجيب مدحت شلبي برضه بس نصور إعلان جديد.

6- مؤسسة مجدي يعقوب:

الإعلان متعوب فيه كفكرة و برينستورمينج والأغنية اللي في الآخر، ممكن يبقى من أحسن إعلانات رمضان 2019

7- إعلان فريش:

حطينا نفسنا مكان الناس اللي فكروا في الإعلان ودوافعهم إنهم يجيبوا معتز الدمرداش قولنا إنه يمكن عشان اسمه اللي لايق مع قافية الإعلان، بس لقينا إنه لا كان ممكن يجيبوا رامي عياش أو أحمد داش أو اخته دينا داش، كان عندهم اختيارات كتير بس اشمعنا معتز الدمرداش يا فريش!

8- البنك الأهلي:
الإعلان عليه إجماع حلو وده عشان فكرته وعشان كوميدي، لكن للأسف اكتشفنا إن الإعلان مسروق وهنا النسخة الأصلية

9- البنك العقاري المصري العربي:

ده الإعلان المصري الوحيد اللي قرر ينحت فيديو كليب لـ Cold play، ده غير إنهم الوحيدين اللي قدروا يلحنوا جملة من 1880 معاك.

10- إعلان نسكافيه:

الإعلان لعب على تريند مذاكرة الصحاب مع بعض وإنهم بيكسلوا بعض، واتعمل بطريقة كوميدية فشيخة، عشان كده "الكامبين" كلها من أحلى الإعلانات السنة دي، شكرا نسكافيه على الأفكار الصايعة اللي بتضحكنا

11-إعلان مدينتي 

إحنا أكيد مش هنتكلم عنه، السوشيال ميديا اتكلمت خلاص 

Comments: