دينا الشربيني حديث السوشيال ميديا: المرة دي بسبب تمثيلها

09/05/2019

دينا الشربيني عموما اتربط اسمها مع الناس من فترة باسم عمرو دياب تلقائي، لدرجة خلتها تتعرض للتنمر بشكل كبير على السوشيال ميديا، وبالرغم إن التنمر على دينا الشربينى وعلى شكلها ولبسها وطريقتها قل إلا إنها لسه محطوطة تحت الميكروسكوب بسبب ارتباط اسمها باسم عمرو دياب، وارتبط برضه أي نجاح ليها إن أكيد عمرو دياب هو السبب في اللي وصلتله ده.

بصرف النظر عن صحة الكلام من كدبه، بس دينا الشربيني في العموم ممثلة شاطرة، قدرت تثبت نفسها عن طريق كذا عمل فني من أول دورها في مسلسل المواطن X لحد جراند أوتيل لحد مسلسل مليكة اللي كان بطولتها في رمضان 2018.

دينا الشربيني السنة دي في رمضان 2019 بتلعب دور البطولة في مسلسل زي الشمس وهي بنت اسمها "نور" وبتدور أحداث المسلسل عن عيلة بتدور على بنتهم اللي اختفت وهي "فريدة" واللي بيلعب دورها ريهام عبد الغفور.

في أول حلقتين الأحداث كانت بتدور عن إختفاء فريدة، ورجوع نور من لندن عشان تدور على اختها مع أمها "سوسن بدر" ده غير إنها المفروض تخلي بالها من ولاد أختها اللي كانوا بيكدبوا عليها وبيقولوا إنهم عارفين مكان أمهم، وفاجأة بتكتشف إنهم بيكدبوا عليها وبتدور على أختها بالفعل.

في الحلقة التالتة من المسلسل دارت الأحداث عن علاقة الأختين ببعض من خلال فلاش باك، وبان إن "عمر" وهو أحمد صلاح السعدني كان خاطب "نور" ولكن اللي حصل إن "فريدة" اختها راحت اعترفتلها إنها بتحب خطيبها وإنها حامل منه وده كان قبل فرحهم بأسبوعين، لكن وقت اعتراف أختها ليها ماصدقتهاش وقررت تواجه خطيبها.

في مشهد المواجهة ده ظهر موهبة دينا الشربيني في التمثيل خصوصا إن الأبعاد النفسية لشخصية "نور" مرهقة جدا ومعقدة لإنها عدت بمراحل نفسية كتير ومتعبة، وظهر السبب اللي بيخلي الناس تحب دينا الشربيني لذاتها بعيد عن علاقتها بعمرو دياب وغيره من الأحداث والمواقف اللي ممكن تبقى مأثرة على صورتها قدام الناس.

لكن في الأخر برضه خلينا متفقين إن المسلسل كقصة وأحداث من تأليف العظيمة مريم نعوم، ومتفقين كمان إن المخرج الشاطر هو اللي بيطلع أحسن وأشطر ما في الممثل، والمسلسل إخراج كاملة أبو ذكري، واللي للأسف انتشر كلام على السوشيال ميديا إنها اعتذرت عن إخراج باقي المسلسل بسبب خلافات مع دينا الشربيني وإن المخرج اللي هيكمل المسلسل هو سامح عبد العزيز، نتمنى إن الأحداث دي ماتأثرش على أداء دينا الشربيني ولا على حلاوة المسلسل.

ملحوظة: آخر الحلقة الرابعة مشهد مش عايزين نحرقه بس هيخليك تتأثر وتعيط حتى لو عارف إن ده تمثيل في تمثيل 

Comments: