حكاية اتهام شيماء سيف بالعنصرية: اتريقت على السُمر فهاجموها فاعتذرت

12/05/2019

من كذا سنة ظهرت الفنانة شيماء سيف في برنامج "الشيكروباص" وهو كان برنامج مقالب، لما الناس تركب الميكروباص ده بيعملوا فيهم مقلب لكن وقتها شيماء سيف ماكنتش بنفس شهرتها دلوقتي، عشان كده السنة لما عملت برنامج مقالب فكرته نفس فكرة برنامج الشيكروباص لكن اسمه "الشقلباظ" قررت تتنكر.

اتنكرت شيماء سيف في شكل ست سودانية، وكانت بتزعج الناس في الميكروباص بصوتها العالي ده غير إنها في آخر الحلقة كانت بتطلب من الشخص اللي بتعمل فيه المقلب إنه يبوسها قبل ما تكشف له عن هويتها الحقيقية وإن ده مجرد مقلب، وده اللي خلى جمهورها ينتقدها، ووصفها السودانيين إنها عنصرية، وده كان سبب إن ناس كتير توجه لها شتايم على السوشيال ميديا، لإنهم واتهموها بالتمييز الجنسي والعنصرية وإنها بتهين الستات السودانيات، ده غير إن فيه ناس طالبت إن البرنامج يتوقف.

وده اللي خلى شيماء سيف تكتب اعتذار لجمهورها وقالت:

" جمهوري السوداني الحبيب

من شوية قريت كمية هايلة من كومنتاتكم كلها إهانة وسب وشتايم..

أنا ممثلة كوميدية ودوري كان كوميدي وكنت بتمنى إنكم تاخدوا الموضوع بشكل كوميدي لإن أنا أكيد مش قصدي أضايقكم (مش قصدي أضايق أخواتي وحبايبي)

أنا آسفة لو الموضوع وصلكم بصورة سيئة وأنا والله مش قاصدة كده.. أنا آسفة أنا بحبكم وإنتوا أكيد بتحبوني أنا واثقة من ده وآسفة لو خيبت ظنكم فيا في موقف أنا مليش ذنب فيه وربنا أعلم بنيتي اتجاهكم.. بحبكم".. وبعد كده قفلت شيماء سيف أكونت الفيسبوك الرسمي بتاعها.

Comments: