٨ فوايد مذهلة لو كلت 3 تمرات في اليوم: جسمك هيشكرك

14/05/2019

بالرغم إن مش كل الناس بتحب التمر إلا إنه زي ما كلنا عارفين هو مفيد، وحتى لو بنحبه فهتلاقي إنه مش موجود في بيوتنا غير في رمضان وطول السنة ممكن ناكله كام مرة لما يبقى الموسم بتاعه بس، لكن عموما التمر فعلا طعمه حلو ولو مابتحبهوش جرب أي نوع تاني منه لإن له أنواع، وغير إنه حلو فهو كمان مفيد جدا، فلو كلته لمدة أسبوع جسمك هيشكرك جدا ومش بعيد يبوسك.

ولإننا في رمضان ففرصة والتمر موجود في البيت تاكل كل يوم 3 تمرات وهنقولك فوايدهم زي ما قال موقع brightside:

1- صحة عضمك هتتحسن :

دكتورة في جامعة "نورث داكوتا" قالت إن التمر بيحتوي على عنصر البورون اللي بيحسن صحة العضم، وقالت دراسة تانية إن التمر زي الفواكه المجففة بيحتوى على الفوسفور والبوتاسيوم والكالسيوم والماغنيسيوم اللي بتقوي العضم وبتحميه من الهشاشة.

2- صحة جهازك الهضمي هتتحسن:

زي ما كلنا عارفين إن التمر غني بالألياف، وجهازنا الهضمي أصلا عشان يشتغل كويس محتاج ألياف لإنها بتمنع الإمساك، وبتساعد إن حركة الأمعاء تبقى طبيعية، المجلة البريطانية للتغذية نشرت في مقال إن الأشخاص اللي بياكلوا تمر باستمرار جهازهم الهضمي أحسن.

3- بيساعد على محاربة الضغط العصبي والاكتئاب:

التمر بيحتوي كمان على فيتامين B6، واللي تم إثبات إنه بيساعد الجسم على إنتاج السيروتونين والنورادرينالين، وده اللي بيحسن صحة الدماغ لإن السيروتونين بيحسن الحالة المزاجية، وفي الدراسة كمان بيقولوا إن نقص فيتامين B6 في الجسم بيزود الاكتئاب، فكل ما فيتامين B6 زاد في الجيم كل ما حالة الشخص هتبقى أحسن مش جسديا لكن نفسيا.

4- هيديك طاقة كبيرة:

التمر غني بالألياف والبوتاسيوم والماغنيسيوم والفيتامينات ومضادات الأكسدة، وده اللي بيخليه وجبة خفيفة مثالية، وبتدي الجسم طاقة لإنها غنية بالسكريات زي الفركتوز والجلوكوز، فهو مفيد جدا قبل ما تتمرن.

5- بيحمي من أمراض القلب:

فيه دراسة بتقول إن التمور بتقلل مستويات الدهون التلاتة، وبيقلل من الإجهاد التأكسدي، وهما العوامل الخطر أصلا على القلب وتصلب الشرايين، وكمان هو غني بالبوتاسيوم اللي بيقلل ضغط الدم وبيقلل من خطر الإصابة بالسكتة الدماغية، وأمراض القلب.

6- بتقلل من خطر الإصابة بسرطان القولون:

التمر بيحمي النظام الهضمي والأمعاء من البكتيريا الضارة، وبالتالي هيقلل من خطر انتشارها في القولون، وفيه دراسة عملتها جمعية علوم التغذية الامريكية إن الأشخاص اللي بياكلوا التمر دايما بيزيد عندهم البكتيريا اللي بتحمي من نمو الخلايا السرطانية في القولون.

7- بيساعد على فقد الوزن:

لإن الألياف اللي في البلح بتساعد على الإحساس بالشبع لفترة طويلة وبتمنع طفرات الجلوكوز في الدم، بالإضافة كمان لإن التمر بيحتوي على مضادات الأكسدة زي الأنثوسيانين والفينوليك والكاروتينات، اللي بتساعد الجسم يتخلص من السموم، وبتساعد على الهضم وده اللي بيخلي الشخص يفقد وزن.

8- بيخفف من أعراض الحساسية الموسمية:

فيه أكتر من 30 مليون شخص مصاب بالتهاب الجيوب الأنفية في أمريكا بس لوحدها، بس التمر له تأثير إيجابي على الحساسية الموسمية وحساسية الجيوب الأنفية، ودراسة تانية أثبتت إن كبشة من البلح فعاله في تقليل أعراض الالتهاب لمرضى جيوب الأنفية.

Comments: