مزايدة في الخير.. مهندس اترفد من شغله قبل فرحه بأسبوع فالشركات فتحت أبوابها ليه

14/05/2019

بولا عبدالمسيح، مهندس داخل على جواز الأسبوع الجاي، راح قدم على أجازة أسبوع من الشغل اتفاجئ إن مديره بيقول له إنت مش هتبقى معانا خلاص، لأن الشركة بتقلل أعداد الموظفين، "بولا" كتب "بوست" على "فيسبوك" لقى تفاعل كبير جدا من الناس اللي كانوا بيعملوا منشن لأصحاب الشركات، وأصدقائهم اللي يقدروا يساعدوا في الحالة دي.

البوست وصل لمحمود عبدالشافي، صاحب شركة "بيتك بإيدك" المتخصصة في العقارات، وعرض على "بولا" ينضم لشركته مع الحصول على مرتب شهر فات بأثر رجعي وشهر مكافأة بما إن أي حد داخل على جواز بيبقى محتاج فلوس، لكن الاتفاق ماكملش لأن "بولا" هيلاقي صعوبة كبيرة في السفر يوميا من بيته في حلوان، لمقر الشركة في أكتوبر.

التفاعل على البوست وصل لمرحلة "المزايدة" في الخير، شادي الزيات، مدير المبيعات في شركة "OUD" المتخصصة في العقارات عرض على "بولا" ينضم للشركة.

وعموما، الناس والتعليقات على "البوست" مبسوطة بفكرة التضامن السريع اللي حصل وإحساس الناس بالناس وإنهم بيحطوا نفسهم مكانهم.
 

Comments: