كل اللي محتاج تعرفه عن كوبري "تحيا مصر" ومحور روض الفرج: بيودي منين على فين

15/05/2019

كلام كتير بيتقال عن محور روض الفرج وكوبري "تحيا مصر" بعد افتتاحه، خصوصا بعد ما خد شهادة من موسوعة "جينيس" باعتباره أعرض كوبري معلق في العالم، الموضوع ده بيلخص كل المعلومات عن المحور والكوبري، سواء تفاصيل البناء نفسها أو الاتجاهات والمسارات اللي بياخد فيها الراكب

المحور بيبدأ عند تقاطع الطريق الدائري مع منطقة الوراق ومنطقة الخلفاوي عند أبراج أغاخان وبيروح لحد الشيخ زايد وطريق إسكندرية الصحراوي، عند الكيلو 39 بعد معسكر الأمن المركزي، لكن الأهم إن بداية المحور مربوطة بالطريق الدائري اللي جاي من مصر الجديدة ومدينة نصر والأوتستراد والمطار وطريق السويس والإسماعيلية عن طريق جوزيف تيتو، وبالتالي الانتقال من مناطق الشيخ زايد و6 أكتوبر ومصر إسكندرية الصحراوي، هيكون أسهل عن طريق محور روض الفرج من إنك تكمل على الطريق الدائري لحد المنصورية والهرم أو تضطر تنزل وسط البلد وتعدي على كوبري 15 مايو وميدان لبنان، يعني باختصار المحور ربط آخر القاهرة (مدينة نصر ومصر الجديدة والتجمع وطريق السويس وطريق إسماعيلية) بآخر البلد من الناحية التانية (6 أكتوبر والشيخ زايد وطريق الإسكندرية)، وبطريقة أسهل:

- لو جاي من جسر السويس - الأوتستراد - مدينة نصر - مصر الجديدة - المطار - طريق السويس - طريق إسماعيلية - طريق فايد - الهايكستب: اطلع الدائري من جوزيف تيتو واركب دائري المرج اللي رايح في اتجاه شبرا، هتلاقي وصلة بين الدائري ده ومحور روض الفرج هتوصلك على أكتوبر والشيخ زايد وطريق إسكندرية الصحراوي (مش هتضطر تروح المنصورية أو الرماية أو تاخد المحور)

- لو جاي من الشيخ زايد وأكتوبر خد الطريق العكسي واركب محور روض الفرج لحد وصلة الدائري ومن الدائري انزل جوزيف تيتو ومنه تقدر تروح على جسر السويس - مدينة نصر - مصر الجديدة - المطار - طريق السويس - طريق إسماعيلية - طريق فايد - الهايكستب

ده غير إن محور روض الفرج في مراحل متقدمة هيمتد لمحور الضبعة والدائري الإقليمي، اللي بيلف حوالين مصر كلها.

وكإنجاز هندسي، فمحور روض الفرج اتبنى بمليون متر مكعب خرسانة وبـ 290 ألف طن حديد وبيحتوي على 5 حارات مرورية وبيمتد بطول 6.5 كيلومتر و10 كيلومتر هي إجمالي أطوال المطالع والمنازل في كافة الاتجاهات، اشتغل فيه 4 آلاف مهندس وعامل في 3 سنين، في وجود عدد كبير من الشركات المدنية، وإشراف الهيئة الهندسية للقوات المسلحة وإدارة المهندسين العكسريين.

أما كوبري "تحيا مصر" المعلق، واللي دخل موسوعة جينيس كأعرض كوبري معلق في العالم، يتضمن 6 حارات مرورية ويمتد بطول 540 متر بعرض 66.8 متر، وفيه أكبر فتحة ملاحية على النيل بعرض 30 متر، وهو محمول على أبراج خرسانية ارتفاعها 92 متر بجسم معدني تم تجميعه داخل منطقة التجميع بموقع البناء بإجمالي 12 ألف طن، ومحمول بـ 150 كابل شايلة الجسم الرئيسي للكوبري، الكوبري مطل على النيل وفيه ممشى زجاجي على الجانبين عشان الناس تتمشى على النيل.

Comments: