إطلاق أقمار صناعية هتوفر إنترنت "فضائي" فائق السرعة: هيشتغل السنة الجاية

16/05/2019

الإنترنت خلى العالم قرية صغيرة، مش بس كده ده لسه هيخلي العالم أوضة وصالة، وده اللي بيحاول يعمله الملياردير الأمريكي إيلون ماسك مؤسس شركة "سبيس إكس" لتكنولوجيا اكتشاف الفضاء.

نشر إيلون ماسك على تويتر أول صورة للصاروخ "فالكون 9"  اللي فيه 60 قمر صناعي من ضمن 12 ألف قمر صناعي الشركة هتطلقها، المشروع ده هدفه توفير إنترنت فائق السرعة للكرة الأرضية كلها عن طريق آلاف الأقمار الصناعية، عشان يبقى بسرعات فائقة هتوصل لجيجا بايت في الثانية الواحدة، وبأسعار رخيصة جدا تكاد تكون نفس الأسعار اللي بتتدفع دلوقتي.

ودي أول خطوة من ضمن مشروع "ستارلينك" وهو المشروع اللي أطلقه "ماسك" لتوفير تغطية الإنترنت في العالم بسرعة عالية جدا، وكتب "ماسك" كمان إن إحتمال يحصل غلط كبير في المهمة الأولى، وإن الموضوع ده هياخد 12 عملية إطلاق تانية مماثلة عشان يوصلوا لمستوى خدمة مرضي، ووصف المشروع إنه إعادة بناء للإنترنت في الفضاء.

وقال موقع "ديجيتال تريندس" الأمريكي إن الفكرة بتعتمد على تشغيل شبكات البيانات عن طريق مئات أو آلاف الأقمار الصناعية الصغيرة اللي بتدور على ارتفاعات أقرب للأرض من الأقمار الصناعية التانية.

الشركة كانت أطلقت قمرين صناعيين في فبراير اللي قبل اللي فات، وبتتوقع الاستفادة من الخدمة فعليا في 2020، وخد إيلون ماسك موافقة من لجنة الاتصالات الفيدرالية عشان يطلق 4425 قمر صناعي حوالين الأرض، والرقم ده بيمثل حوالي ضعف الأرقام الموجودة حاليا.

المشروع ده حاليا بيواجهه منافسة كبيرة من شركتين وهما شركة أمازون وشركة "وان ويب" المدعومة من شركة "إيرباص" الفرنسية.

Comments: