٦ تصريحات لسمية الخشاب عن أحمد سعد: كان هيتسبب في قتلي.. ضربني وفضلت أنزف يومين لما فقدت طحالي

15/05/2019

ظهرت الفنانة سمية الخشاب في برنامج "شيخ الحارة" مع بسمة وهبة على قناة "القاهرة والناس"، وكعادة البرنامج إنه بيضغط على الضيف وبيتكلم معاه في المواقف الصعبة اللي مر بيها في حياته أو بالظبط المواقف المحرجة اللي عدى بيها، ودي كانت تصريحات سمية الخشاب عن علاقتها بأحمد سعد وأسباب طلاقهم:

1- اتكلمت سمية عن أغنية قلبي يا ناس وقالت إنهم كانوا قاعدين في يوم هما الاتنين وقالت له إنها كانت عايزة تعمل أغنية فكرتها جديدة، قالها لازم عشان تنزلى تنزلي بحاجة واو ومش نص نص، فقالت له إن جالها فكرة أغنية وتيمة لحن لواحدة بتشتكي وبتشيل هموم الناس وبتسمع وبتطبطب وهي ماحدش حاسس بيها، وده كان جزء من معاناتها وقتها، إنها عايشة في مأساة، سمية قالت "عمالة بطبطب وبعالج وبدادي، شغالة دكتورة وممرضة ومحاسبة ومديرة أعمال وطباخة وخدامة وكل الحاجات اللي ممكن تتخيلها"، فقالت له إنها عايزة تعمل أغنية وتسميها "قلبي يا ناس، قلبي يا ناس تعبان"، فقالها إن اللي هيكتبها كويس الشاعر هشام صادق، وقالتله تيمة اللحن، فكلم هشام صادق وقتها، وقاله اكتب أغنية اسمها قلبي يا ناس وخد سمية هتشرحلك، حتى هشام لسه مفكرها وقالها إنتي ناسية لما قعدتي تشرحيلي وإنتي في العربية جنب أحمد وقولتيلي أقول "قلبي يا ناس اتوجع من الناس اللي شوفت منهم كتير" فالأغنية كلامي وفكرتي وقالت إنه ساعدها بس لكنها مش أول مرة تلحن، فهو ساعدها بس، وإنها لحنت أغنية في أول ألبوم ليها وبدل ما يكون غناء وألحان سمية الخشاب، فعملت لنفسها اسم فني وهو سوكة كملحنة، وهي بتلحن ألحانها كلها هو مابيسجلش ألحانه هو حر.

2- ردت سمية على تصريح عمرو سعد "إن اللي تتكلم على واحد اتجوزته ولو يوم واحد تبقى ست مش تمام" وقالت "هو بعد كل اللي قاله ده هو كده راجل تمام!، إيه كمية التناقض دي! وإيه الاتهامات وإيه الادعاءات وإيه الظلم وإيه الافتراءات دي كلها! هو فيه واحد يبقى متجوز واحدة ويطلع فيها كل العبر! الأولى يبقى راجل تمام مش ست تمام".

3- وقالت على موضوع العربية إنها دفعتله نص تمنها وقالتله لما يبقى معاك فلوس ابقي غيرلي برضه عربيتي، وأضافت "مش هيقعد يخترع بقي هو قصص"، وقالت لبسمة وهبة إنها هتبعتلها صورة من دفتر شيكاتها. واستنكرت اللي قاله إنها دفعت له الفلوس كهدية عيد ميلاده وقالت "بهدي عربيات أعياد ميلاد ليه! مليارديرة أنا!".

4- أما موضوع الشقة اللي أحمد سعد قال إنها اشترتها من فلوسه "أولا هو بيكدب طول الوقت، وهو ماعندوش دفتر شيكات، وبيخاف يكتب شيكات وقبل كده كان شاري لأم ولاده عربية بالتقسيط بشيكات، وتخلف عن الدفع، وصاحب المعرض لما قدم للبنك الشيكات، فالبنك قال إنه بلاك ليست فهو ماعندوش دفتر شيكات" وأضافت "هو اللي طلب مني إني أكون ضامن.. ودي مش فلوسه لوحده دي فلوسي أنا كمان لإنه كان بيتعثر كتير"، وقالت كمان "هو اللي قالي اكتب الشقة باسمي، وأنا قلتله ماتقلقش أنا في ضهرك لو اتعثرت هسد معاك، وفي الآخر لما الأقساط تخلص هديك البيت" وقالت إنه كان صعبان عليها إنه ماعندوش بيت، وقالت إن أقساط الشقة كانوا 5 أقساط وهي دفعت 3 منهم وخدت الشقة باسمها بعد ما سددت له كل فلوسه.

5- قالت عن ظهوره مع بسمة وهبة "إنت إزاي طالع تتكلم! إنت بتتكلم بتقول إيه عني إيه إنت! إنت لازم تسكت خالص أحسنلك" وقالت كمان "طبعا بيمثل هو طول الوقت بيمثل، ولو هو مش خايف، ماكنش قالك بلاش تستضيفي سمية"

6- "حياتي اتعرضت لخطر، وكان هيقتلني، وكان ممكن دلوقتي يكون موجود في السجن في قضية شروع في قتل، وخسرت جزء من جسمي، لما يطلع يتهمني اتهامات رهيبة كده قدام الناس، وأنا ساكتة وساترة عليه قدام الناس، عشان أنا ست محترمة، وبحافظ على العيش والملح وهو مايعرفش يعني إيه عيش وملح"

"أنا فقدت طحالي بسبب أحمد سعد، ضربني في ضهري مش في وشي، والضربة كانت متعددة بالخاتم اللي في إيده في ضهري في مكان الطحال، وانفجر طحالي وأنا مش حاسة، وفضلت انزف نزيف داخلي لمدة يومين وكنت هموت واتنقلي دم، لإني فقدت جزء كبير جدا من دمي، لإن وأنا في العناية المركزة قولت للدكتور أحمد سعد اللي عمل كده ووقتها بكى وعيط وسامحيني وماكنتش أقصد أصل ماكنتش في وعيي".

Comments: