٧ فوائد للتدخين

16/10/2018


 

السجاير بتقتل واحد من بين كل اتنين بيشربوها لكن دا مينمنعش إن ليها برده 7 فوايد صحية غريبة:

1- بتخليك تخس

اللى متعودين يشربوا سجاير وزنهم بـ يقل عن اللى ما بـ يشربوش. العلاقة بين الأكل والنيكوتين بتاع السجاير معقده. هو مثلا بيأثر على مركز الشبع فى المخ. من الآخر كده بتسد النفس.

السجاير بتخليك تخس

٢- الموود

ناس كتير حتى من اللى بيشربوا سجاير مش مصدقين إنها بتحسن الموود، وفاكرين إنها حاجة بـ ينفخوا فيها وخلاص. لكن اتضح فعلا إن السجاير بتحسن الموود. وبان التأثير ده على المرضى النفسيين، ومرضى الاكتئاب. وساعدهم يستحملوا الأعراض الجانبية للعلاج اللى بـ ياخدوه. وده لأن النيكوتين بـ يغيير فى كيمياء المخ فبقى مثبت علميا مش اجتهادات.

الموود

٣- النسيان

المفروض إن السجاير على المدى الطويل جدا بتأثر على الذاكرة، لكن الغريب بقى إنه النيكوتين طلع بـ يحافظ على المخ وبـ يحسن الذاكرة القصيرة (اللى بتخلى كبار السن يفتكروا إيه اللى حصل من شوية). وعلشان كده بيفكروا دلوقتى لو حد كبير وبطل سجاير يخلوه ياخد النيكوتين البديل اللى بيتمضغ علشان يستفيد من الحكاية دى.

النسيان

4- التهاب القولون التقرحي

التدخين بـ يحمى من إلتهاب القولون التقرحى، صحيح إنه ممكن يسبب مشكلة تانية فى القولون، لكن الأبحاث لقت إن النيكوتين فى السجاير بـ يأثر على نوبات المرض ده وبيمنع ظهوره فى المدخنين. وكمان الحماية بتزيد لما عدد السجاير اللى بيشربوها يوميا يزيد، بس لو واحد مش بيدخن مش هـ نقوله اشرب سجاير، لكن بيدرسوا حاليا امكانية استخدام أقراص النيكوتين.

التهاب القولون التقرحى

٥- الشلل الرعاش

الشلل الرعاش مرض منتشر عند كبار السن طلع بـ يجى أكتر للناس اللى ما كانتش بتدخن. والدراسات لقت إن كبير السن اللى بـ يشرب سجاير بـ يبقى محمى من الشلل الرعاش بنسبة 75%، أما اللى كان بيشرب وبطل فمحمى بنسبة 50%. وفى أستراليا جربوه على ناس فى المراحل الأخيرة من المرض والسجاير جابت معاهم نتيجة. بس ما وصلوش لشىء يأكد إن النيكوتين هو اللى بيعمل كده ولا مادة تانية فى السجاير.

الشلل الرعاش

٦- السرطان

الستات الكبيره بقى اللى دايما تلاقيهم بـ يشربوا سجاير اتضح إن السجاير بتحميهم بنسبة 30% من الأورام الليفية أو سرطان الرحم بعد سن اليأس بالذات. وقد يكون ده بسبب إن السجاير فيها مادة بتشتغل ضد هرمون الاستروجين اللى بيبقى من أسباب الإصابة بالأمراض دى. كمان السجاير بتحمى من سرطان الجلد والغدة الدرقية.

السرطان

٧- ضغط الحمل

يعتبر ارتفاع ضغط الحمل من أهم مشاكل الحوامل اللى بتنتهى أثناء الولادة بمشكلة تسمم الحمل، ومع إن السجاير بترفع الضغط للشخص العادى لكن بتقلل ضغط دم عند الحوامل. يعنى الحامل اللى بتشرب سجاير على خفيف ما بـ يجيلهاش ضغط حمل بنسبة 30%. ومحدش فاهم إيه اللى بيحصل هنا، وفيه دراسات كتير بس مفيش حاجة عليها إجماع.

ضغط الحمل

مصادر

World health organization

Pubmed.com

Tobacco in Australia

Livescience.com

Comments: