أغرب ١٥ اسم لقرى مصرية على خريطة جوجل

12/04/2016

من ييجي ١٠٠ سنة، سيد درويش غنى من كلمات بديع خيرى "مصر يا أم العجايب". إحنا مانعرفش كان قصده إيه بالضبط بالعجايب، بس الأكيد إن أسامي القرى دي كلها تؤهل مصر إنها تبقى "أم عجايب الدنيا" كلها بجدارة .

١سنهوت البرك

 جوا كل أم مصرية قدرة مدهشة على ابتكار شتايم معقدة، زى "يا هباب البرك"، أو "نيلة المجاري". بس لسبب ما، أظن إن "سنهوت البرك" دي مصدر القدرات كلها من أيام الفراعنة.

سنهوت البرك

٢الزنكلون

 وإحنا صغيرين كانوا دايما يسألونا "إيه الرقم اللي أكبر من ألف؟ طيب أكبر من مليون؟ طيب أكبر من مليار؟ طيب أكبر من تريليون؟". الواضح طبعا إن الإجابة النهائية هى الزنكلون، أكبر رقم فى الكون هو الزنكلون أو الألف زنكلون أو المليار زنكلون".

 الزنكلون

٣البلد

 بعد برنامج "البرنامج"، ومحل مكرونة "مكرونة"، وقهوة "القهوة"، كان من البديهي إن الموضوع ينتهى ببلد “البلد"!


"إنت منين؟.. "من البلد".. "من أنهي بلد؟".. "من البلد!".

٤- أين نشأت وجبة الكنتاكي؟

واضح إنه ولا كان كولونيل ولا حاجة، ولا كان اسمه ساندرز حتى، مؤسس مطعم كنتاكي هو العمدة سند رامز، عمدة كفر أبو فراخ، ودبوس، وخلوة دبوس .

أين نشأت وجبة الكنتاكى؟

٥. الدراكسة

دراكس المدمر - Drax the destroyer  من فيلم "جارديانز أوف ذَا جالاكسى \ Guardians of the Galaxy"؟ يوليان دراكسلر اللى بـ يلعب فى نادى شالكه الألمانى؟ مين الدراكسه دول؟؟ وإيه علاقتهم بالفضاء!

٦. الستامونى وقلبشو

"بحبك يا ستامونى"، والإلهام الأول لأغنية "قرقشانجى دبح" قلبشو". واضح إن إلهام أهم علامات الثقافة المصرية فى السبعينات والتمانينات جت من هنا .

٧. الواحات

إزاى تسافر باريس "الـ بــى خفيفة مش تقيلة"، بأقل تكلفة؟ خد عربية وعليك وعلى الواحات. مبروك عليك باريس .

٨. دولة المماليك

 بعد مذبحة القلعة، نجا عدد محدود جدا من المماليك من قتل محمد علي، وهربوا على الشام. اللي محدش عارفه إنهم رجعوا تاني قرب نهر النيل، وعملوا طرق وكباري تحت قيادة قائدهم الأعظم، برقاش المناشي!

٩. أم زغيو؟ فعلا؟

لا تعليق

١٠ شطانوف

 بعد قيام الثورة الروسية على الكسندر الثاني، اضطرت معظم عائلة القيصر الروسي للهرب خارج روسيا. اللي ما تعرفوش إنهم وقتها وصلوا لمصر واستقروا سرا هنا، السر فضل فى حيز الكتمان لسنين كثيرة، لأنهم أخفوا كل آثار أصلهم عن العيون. وبعد موتهم، وكتقدير من سكان القرية لهم، سموا القرية بـ"شطانوف"، وهو اسم البيضة الفابراجية المرصعة بالزبرجد اللى كان نيقولا الرابع بيلعب بيها في طفولته.

١١. لعنة الفراعنة/ قرية شنشور

"شَنْشُور، تِلوَانَة، هِيت، هِيت". يقولها ثلاثًا وهو ينظر لقمر ١٤، وبعدها يختفى أعداءه – من مخطوطة فرعونية .

١٢ شبرا زنجي

ما اسمهاش زنجي يا مصر، اسمها "أفريكان آميريكان" لسبب مجهول .  شبرا أفريكان آميريكان .

١٣. الدلنجات

واحدة من أكثر أسامى القرى المحببة لقلبى. المفروض طبقا للأسطورة إنها زمان كانت زى لاس فيجاس للفراعنة، واتسمت الدلنجات على اسم الصوت اللى بيطلع من ماكينة القمار لما بتكسب "دلنج دلنج دلنج".

١٤. Pen Pals

فى التسعينات، وقبل انتشار الإنترنت، كان منتشر بين جيلي مراسلة شباب خارج مصر عن طريق Pen Pal . طبعا واضح المقر الرئيسى لـ Pen Pal فى مصر كان فين.

١٥. قرية دالاس

"Houston, we have a problem,هيوستن، واضح إن عندنا مشكلة, فى ٢ دالاس على الكوكب!"

Comments: