أخطر ١٤ مافيا فى العالم

26/11/2016

المافيا نوع من أنواع الجريمة المنظمة. وبيعود أصل للكلمة الإيطالية مافيوسو mafioso، و معناها الـ " الجرأة". والمافيا ظهرت من مدينة صقلية فى إيطاليا، وبعد كده ظهرت تنظيمات شبيهة لها انتشرت فى أنحاء العالم.

١. المافيا المتمركزة فى آسيا وشرق آسيا

١. الياكوزا

وساعات بيسموهم "جوكيدو". والتنظيم ده ظهر فى اليابان وكوريا. والياكوزا مشهورين جدا عالميا، لدرجة إن عندهم مبانى إدارية، وبيسينز كاردز، وساعات بيكتبوا مقالات فى الجرايد. سهل أوى التعرف عليهم من بدلهم السودا، وطرف صوبعهم الصغير المقطوع (ده إثبات الولاء لكبير المافيا). فى بعض الأحيان بيبقى لهم دور فى الحياة السياسية. ولهم كمان أعضاء فى مجالس إدارة شركات كبيرة، وكمان كانوا من أول الناس اللى قدمت مساعادات إنسانية بعد كارثة زلزال اليابان - تسونامى ٢٠١١.

٢. Chinese Triads

هو اسم أطلقته عليهم الحكومة البريطانية علشان رمز المثلث اللى مشهورين به. والحكومة الأمريكية بتقول إن المافيا دى بتهرب أكتر من ١٠٠ ألف صينى فى السنة  بطرق غير شرعية لأمريكا مشهورين بتزوير الفلوس، ومركزهم الأساسى هونج كونج.

٣. D-Company

متمركزة فى الهند، بس لها سيطرة فى باكستان والإمارات بشكل قوى. ورئيس التنظيم ده هو داود إبراهيم الـمطلوب عالميا (وكمان ممثل مشهور فى بوليوود!)، وبيشتغل فى الإبتزاز وصولا للإرهاب زى تفجيرات بومباى فى ١٩٩٣ اللى اتقتل فيها أكتر من ٢٥٠ شخص. وفيه ناس بتقول إن داود إبراهيم له علاقات بالقاعدة وطاليبان. تمويل المافيا ده بيجى من مشاريع قانونية كتير زى شركات المقاولات، والبنوك، وكمان الأنشطة غير القانونية. لحد دلوقتى محدش يعرف داود إبراهيم فين، وفيه كلام بيقول إنه عمل عمليات تجميل وغير شكله. ( الهندى هندى برضه)

٢. المافيا المتمركزة فى أوروبا وشرق إوروبا

١. المافيا الروسية

دلوقتى بيعتبروا أشرس مافيا فى العالم، وعددهم تقريبا ٣٠٠ ألف عضو متقسمين حوالين روسيا. وبيتعرفوا من الـ تاتوهات اللى على جسمهم، وبيختلف التاتوه على حسب مستواه فى العصابة. معظم الوقت بيستخدموا استراتيجيات عسكرية ومن أشهر الحاجات اللى بيشتغلوا فيها هى الإرهاب، وتجارة الأعضاء، والقتل مقابل الفلوس.

٢. المافيا الصقلية أو La Cosa Nostra

ابتدت كتنظيم إجرامى صغير فى النص التانى من القرن الـ ١٩، بس المافيا الصقلية أوالمافيا الأمريكية الإيطالية بسرعة بقوا أكتر تنظيم إجرامى بتخاف منه الحكومة. والتنظيم ده قائم على العائلات الصقلية فقط. وعندهم شعائر خاصة للأفراد الجداد اللى بينضموا له. وكلهم مؤمنين بحاجة اسمها الـ " omertà " وهى إن محدش يحكى أو يتكلم عنهم، واللى مش بيعمل كده بيتعدم فورا.

٣. المافيا الألبانية

هو تنظيم مكون من ١٥ عائلة ألبانية أصيلة وده اللى خلاهم ينتشروا بسرعة عالمياً، وبيركزوا على تهريب المخدرات، والسلاح، والإتجار بالبشر. ومشهورين بعنفهم الشديد فى جرائمهم. وأشهر أعضائها هو Daut Kadriovski أكبر تاجر هرويين فى أوروبا.

٤. المافيا الصربية

هى تنظيم صربى منتشر حوالى فى أكتر من ٢٥ بلد، وبيتاجروا فى تهريب المخدرات (بالذات الهيروين)  والسلاح. وفى ٢٠٠٩ طلع خبر شهير عن قتل رؤساء المافيا لواحد كان عنيد معاهم، وحطوه فى مفرمة وأكلوا لحمه بعد كده.

٣. المافيا المتمركزة فى أمريكا الشمالية والجنوبية

١. عصابة الشارع الـ١٨ 18th Street gang

دى أكبر عصابة فى شمال أمريكا، وبيسموهم جيش الأطفال؛ لأنهم بيشغلوا أطفال من إبتدائى وإعدادى معاهم. وبيقال إن عدد أعضائها عدى الـ ٣٠ ألف فى أمريكا بس، والمركز بتاعهم هو لوس أنجلوس. وعلى كلام الـ FBI، إنهم بـ يسرقوا عربيات وبيوت فى لوس أنجلوس بصفة يومية. ومن أشهر الحاجات المنتشرة فى ثقافتهم؛ إن لو عضو ماسمعش كلام الريس بتاعهم، أو خالفوا قوانينهم الصارمة  هـ يتضرب لمدة ١٨ ثانية، ممكن توصل للإعدام على حسب الموقف.

٢.  مارا سالفاتروتشا Mara Salvatrucha

واختصارهم MS-13، ودى مافيا متمركزة فى لوس أنجلوس، ومنتشرة فى وسط أمريكا كمان. والعصابة دى هى العدو الأول لعصابة 18th Street، وعدد أفرادهم أكتر من ٥٠ ألف عضو، ومشهورين بالتاتو على وشهم وإيدهم.

٣. ملائكة الجحيم Hells Angels

هو نادى متوسكيلات فى الأساس، ومشهورين بسواقة متوسكيلات هارلى ديڤد سن. فيه خرافات وإشاعات كتيرة حوالين نشاطهم الإجرامى، بس رئيس النادى بيقول إنهم بيحبوا المتوسكيلات فقط، وأى جريمة بتحصل هى جريمة فردية مالهاش دعوة بالمجموعة. بس كتير من أعضاء النادى ده بيشتغلوا فى تهريب المخدرات، والدعارة، والإبتزاز بالعنف.

٤. المافيا المونترياليه أو The Rizzutos

هو تنظيم قائم على عائلة واحدة، ومتمركز فى مونتريال، بس منتشر فى جنوب كوبيك وانتوريو. مع الوقت بنوا علاقات مع عائلة تانية من المافيا الإيطالية فى أمريكا، وده عمل حروب شرسة فى مونتريال فى أواخر السبعينات. The Rizzutos بيتاجروا فى السلاح والمخدرات، وبيملكوا معظم شركات المقولات فى مونتريال.

٥. المافيا المكسيكية أو  Mexican Cartels 

على الرغم من إن المافيا المكسيكية موجودة من زمان جدا، لكن سيطرت أكتر وكبرت لما المافيا الكولومبية شغلها أقل. دلوقتى تجارة المخدرات بتمثل ٦٣٪ من اقتصاد المكسيك. "الحرب على المخدرات" اللى بدأتها الحكومة المكسيكية علشان تقضى على نشاط المافيا دى، كان شرس جدا لدرجة إن أكتر من ٢٠ ألف واحد اختفوا، ولقوا مقابر جماعية فيها أكتر من ٢٤ ألف جثة وده راجع لأن أعضاء المافيا كلهم مسلحين تسليح عسكرى.

٦. المافيا الكولومبية أو  Colombian Cartels 

لحد ٢٠١١ كولومبيا كانت الأولى على العالم فى صناعة الكوكاين، بس الحكومة قامت بحملة كبيرة وقوية ضد المخدرات قتلت فيها أعضاء كبار المافيا، وده خلى نشاطها يقل بشكل كبير لدرجة إنه تقريبا مالوش تأثير دلوقتى.

٤. المافيا المتمركزة فى أفريقيا

١. تنظيم Mungiki

وده تنظيم فى كينيا، ومعناه "الجمهور". التنظيم قبلى لأن أعضائة كلهم من قبيلة الـ "الكيكويو kikuyu". وأفكار وقيم التنظيم الأساسية  هى رفض الفكر الغربى، والرجوع لأفكارهم القبلية. وبطبيعة الحال، فهم نشيطين فى كينيا بس، وبيشتغلوا فى الإبتزاز، ومحتكرين صناعة التاكسيات. وأى حد بيتعدى عليهم بيقطعوا له رأسه أو إيده، أو رجله، وساعات بيولعوا فيهم.

Comments: