٨ أفلام لازم تشوفها وانت محبط

01/06/2016

احباط الشغل، والعلاقات العاطفية، والعلاقات الاجتماعية بتدخلنا فى مود مش لطيف، المود ده لما بتدخله مابتكنش عايز تعمل حاجة فى حياتك غير انك تقعد قدام التليفزيون أواللاب توب، تاكل وتتفرج على أفلام.

١. The Pursuit of Happyness


لو محبط من شغلك، وأحوالك المادية مش تمام أوى، أكيد مش هـ تكون أسوأ من "كريس"، على الأقل انت عندك انترنت قادر تقرأ من خلاله الكلام ده. أما هو فبعد ما خسر فلوسه، ومراته، وبيته، ومكانش لاقى مكان ينام هو وابنه فيه، قدر يغير حياته وينجح، وفقد فى الفيلم كل حاجة ماعدا إيمانه بنفسه، وهو ده اللى رجعه تانى للحياة الى كان بيتمناها.

الفيلم دة سيرة ذاتية، يعنى حاجات حصلت فعلاً، فانت مش أقل من بطل الفيلم فى أى حاجة.

٢. Joy


ده كمان سيرة ذاتية، بس هنا بقى "جوى" كل حاجة فى حياتها كانت بايظة، عيلتها تقريباً مجانين، عايشة فى بيت مضطرب، كل المسئوليات على دماغها، حاولت كتير وكانت بتفشل، واحدة غيرها كان زمانها مدمنة أومنتحرة. بس هى قدرت تعمل اللى كانت بتحلم بيه لما كانت صغيرة، وتحقق نبوءة جدتها لما قالتلها "هـ تكبرى وتعملى اختراعات كتير الناس كلهم يستخدموها".

٣. Burnt


"آدم"  شيف محترف، والشيف فى بلاد برا حاجة كبيرة أوى، أكبر حتى من الشيف الشربينى. الشيف ده نجاحه "حَرَقُه"، وأدمن المخدرات، وخسر مطعمه، وجمهوره، وغروره جابه الأرض. بس حياته ماخلصتش هنا، "آدم" بعد ما اتحرق تماماً ابتدى من جديد، كان لازم يتجاوز إدمانه، ويبتدى فى بلد تانية بفريق عمل مختلف، وعمل دة فعلاً، ونجح تانى.

٤. Room


أياً كان اللى حاصل لحياتك، فهو أكيد مش أسوأ من "جاك" وأمه، اللى اتولد مايعرفش أن فيه عالم خارجى برا الأوضة اللى عايش فيها، لأن أمه اتخطفت وهى مراهقة، واللى خطفها حبسها سبع سنين، "جاك" قدر يهرب، وقدر يساعد أمه على الهروب وهو عنده خمس سنين بس، الأم اللى اتحبست سبع سنين فى أوضة ضيقة، وخرجت منها مكتئبة ومش عارفة تعيش، قدرت بمساعدة إبنها تتجاوز الأزمة فى النهاية، وكملوا حياتهم.

٥. The Danish girl


لو احباطك خاص بالعلاقات العاطفية، فانت أكيد أكيد حالك أفضل من حال "جيردا" اللى فجأة اكتشفت أن جوزها عايز يبقى واحدة ست!

الفيلم بيحكى قصة "أينار" واللى كان أول حالة تحول جنسى فى التاريخ. واللى اتحول فعلاً، وعاش ست لفترة قصيرة وبعدين مات وهو بيكمل باقى العمليات الجراحية اللى هـ تكمل تحوله. لو حد خذلك فى قصة حب، فانت حالك أفضل من حال "جيردا"، ولو انت اللى خذلت الطرف التانى، فانت حالك أفضل من حال "أينار" اللى ماقدرش يكون أقل أنانية من كونه يتحول لست، وكمان الشخص الوحيد اللى يساعده فى كل خطواته هى الست الوحيدة اللى حبته فعلاً. وكل دة حصل – فعلاً – غصب عنه.

٦. The Lobster


حاسس أن حياتك انتهت  بسبب فشل قصة حبك؟ طب إحمد ربنا بقى انك مش "ديفيد" بطل الفيلم اللى عايش فى مجتمع فيه السناجل بيموتوا بجد. إما تكون فى علاقة، أو تكون فريسة حد تانى يصطادها علشان يزود أيامه فى الدنيا لحد ما يلاقى الشخص المناسب.

"ديفيد" حتى لما لقى الشخص المناسب، كان لازم يتبع القانون، ويبقى شبهها علشان يكونوا زوجين، هى كانت كفيفة، وكان مطلوب من ديفيد إنه يفقع عينيه الاتنين بسكينة وهو واقف قدام المراية علشان يكون معاها، أو يخرج من غيرها، ويموت.

٧.Shawshank redemption


"آندى" اتحبس حوالى عشرين سنة ظلم. فى العشرين سنة دول قدر يحفر نفق يخرجه برا السجن، ولما خرج عاش باقى حياته فى هاواى حيث البحر والهوا والشمس اللى اتحرم منهم نص عمره.

"آندي" كان طول الوقت بيقاوم، ما استسلمش لما دخل السجن، وعرف إنه ممكن يموت قبل ما سنين عقوبته تنتهى، بالعكس، كان بيحاول يحسن حياته طول الوقت جوا السجن، بالتوازى مع محاولته الأسطورية للهروب، واللى نجحت فى الآخر.

٨. Yes man


الفيلم ده خليه لآخر يوم فى مود الكآبة. انت أكيد دلوقتى محبط، وكل ما حد يقول لك يالله نعمل أى حاجة بتقول لا وترفض وتكمل أكل وفرجة على الأفلام، بعد الفيلم ده ابقى خُد "كارل" قدوة ليك. واعمل زيه، ووافق على كل التجارب اللى هـ تتعرض عليك، هو حياته اتغيرت فى الفيلم تماماً بعد التجربة دى، جرب انت كمان يمكن حياتك تتغير زيه.

Comments: