دليل الأكلات المناسبة: إزاي تتجنب الإجهاد والعطش أثناء الصيام؟

11/05/2019


من ساعة ما رمضان بقى في الصيف والموضوع بقى أصعب بكتير، خاصة إن درجات الحرارة كل سنة بتزيد مش بتقل، فالمشاكل الرئيسية اللي بتواجه الصايمين بتكون الصداع (وده اتكلمنا عنه في مقال منفصل)، والعطش والخمول الزايد ودول هنتكلم عنهم دلوقتي.

إيه اللي بيحصل لجسمنا وإحنا صايمين؟

في الأحوال العادية الجسم بياخد طاقته من الجلوكوز اللي موجود في الكبد والعضلات، لكن في حالة الصيام، عادة بيخلص كل الجلوكوز المتخزن، وبيتجه للمصدر التاني للطاقة، وهو الدهون.

لما مدة الصيام بتطول أوي (أيام أو أسابيع)، الجسم بيبدأ يسحب من العضلات وبيدخل في مود المجاعة، لكن لأن صيام رمضان مدته قصيرة فصحيا ما لهوش أي أخطار (لو إنت سليم مش بتعاني من أي مرض)، والفطار والسحور وتناولهم بشكل سليم كفيل يظبط كل حاجة.

الأكل المفيد في رمضان

الكاربوهيدرات المركبة هي أفضل حاجة ممكن تاكلها في الفطار، لأنها بتفضل في المعدة مدة طويلة، فبتساعد على استهلاك الطاقة في الجسم على مدى طويل وماتخليكش حاسس بالخمول وتساعدك على الإحساس بالشبع مدة أطول.

الكربوهيدرات المركبة موجودة في الحبوب والألياف، زى الفول مثلا – صديق المصريين في السحور – الفاصوليا، والبسلة، والدقيق، والرز البسمتي.

الأكل الغني بالألياف كمان مهم فى رمضان، لأنه بيتهضم على مدة طويلة فيزود إحساسك إنك مليان وشبعان، ده غير إنه بيحتفظ بالمياه في الجسم فماتحسش بالإجهاد ولا العطش، هتلاقي الألياف في البران والكورن فليكس، والشوفان، والفواكة بشكل عام خاصة التفاح والخوخ، وفي الخضروات طبعا.

تتجنب إيه في رمضان؟

تجنب المعلبات والأكل المقلي والحلويات الكتيرة، لأنها معمولة من كاربوهيدرات في صيغة سكر، ودي بتتحرق بسرعة جدا ده غير إنها بتزود الإحساس بالعطش، وكمان ابعد عن الأكل اللي فيه دهون كتيرة زي الشوكولاتة والكنافة والحلويات، ويفضل تبعد تماما عن الكافيين لأنه مدر للبول وبيساعد على تخلص الجسم من المياه بشكل سريع، وده مش مفيد في الصيام.

تاكل إيه في الفطار؟

الفطار التقليدي في مصر على تمر مفيد جدا، بيتميز بإنه سريع الامتصاص في الجسم وبيزوده بالطاقة بسرعة، وده ممتاز في كسر الصيام، وكمان عصائر الفاكهة الطازة لأنها بتدي جسمك الأملاح والفيتامينات والألياف اللي محتاجها وتنشطه بسرعة، ويفضل إنك بعد ما تفطر على تمر وشوية مياه، ماتاكلش على طول وتستنى شوية (اخطف المغرب مثلا)، علشان تدي جسمك فرصة يمتص السكر اللي في البلح ويعيد تنشيط مراكز الهضم.

الأكل الكتير بالمناسبة مش مفيد للجسم، خلي الفطار مجرد وجبة مش "وليمة"، كل باعتدال، وحاول تكون أكلة غنية بالطاقة وفيها قدر معقول من السكريات والدهون، الرز البسمتي مفضل جدا في الفطار وكمان السمك وطبعا الخضار.

تجنب طبعا الأكل اللي فيه ملح كتير والبهارات الزيادة، لأنها بتزود الإحساس بالعطش.

تاكل إيه في السحور ؟

يفضل التركيز على الأكل البطئ الامتصاص والهضم، واللي بيساعد على الاحتفاظ بالمياه في الجسم زي العيش والبيض والبطيخ والخيار بيرطبوا جدا، والتفاح كمان، وزي ماقولنا فوق الفول والشوفان والكورن فليكس.

ويفضل مع السحور تشرب عصير فاكهة، مغذي وبيدي الجسم فيتامين وأملاح وبيرطب ويخليك ما تحسش بالعطش، وينصح بالتفاح والموز بالذات لأنهم بيمدوا الجسم بالطاقة، والتفاح الجسم بيمتصه ببطء ده غير إنه بيحتفظ بالمياه مدة كويسة.

وطبعا مش محتاجين نقولكم، اشربوا كتير، على الأقل ٨ كوبايات.

ورمضان كريم.

Comments: