٧ نصايح علشان تكمل تمرينك في الجيم فى رمضان

15/05/2019

فيه ناس كتير ما بتصدق تنزل التمرين، وتتشجع تروح الجيم، بييجي رمضان وتلاقي كله كسل، وعمل freeze للتمرين، وقالك بعد العيد، الكلام ده مش دايما صح، رمضان ممكن يكون فرصة أكبرعلشان تحافظ على النظام اللي عملته لنفسك، سواء عايز تخس، أو عايز تعمل فورمة. دى شوية نصايح علشان ما تكسلش عن التمرين فى رمضان.

١. خلي عندك gym fellow

بص التمرين دمه تقيل علينا كلنا، كلنا محتاجين حد يساعدنا ويشجعنا في الخطوة دي، سواء إنت حابب تجري أو تتمرن خلي معاك حد من صحابك، أو اتعرف على حد خليه يشجعك على الخطوة دي، بلاش تعرف ناس تجيبك ورا وتحبطك.

٢.  اتمرن قبل الفطار بساعة على الأقل

التمرين في الجيم سواء كان على أجهزة أو تمرين cardio بيعتمد على الحرق، وبيحتاج مخزون من الجليكوجين اللي بيتحول لسكر في وسط التمرين. بعد أول ٤٠ دقيقة، الجسم بيبتدي يحرق الدهون، وده المطلوب طبعا، بس خلي بالك ما تكترش عن ساعة وربع لأن جسمك بعدها ممكن يبتدى يكسر في العضلات بتاعته، وبعدها تروح تفطر علشان ما تحصلش ليك مشاكل بسبب الجفاف، علشان المياه من أهم الحاجات في التمرين، بس بلاش العصاير اللي كلها سكرو تودي في داهية زي قمر الدين، خليك في مياه/ تمر/ عرقسوس.

٣.  بلاش تمرين قبل الفطار لو بتعمل فورمة

الناس اللي بتعمل فورمة وعضلات بلاش يتمرنوا قبل الفطار، لأن ده فعلا ممكن يؤثر على الكتلة العضلية لو ما اتعملش بشكل صح. خلي التمرين بعد الفطار بساعتين ونص لتلات ساعات، علشان بعد الفطار على طول كل أجهزة الجسم والدورة الدموية بتركز على كمية الأكل اللي دخلت، وبتحاول تهضمها، فساعتين ونص لتلات ساعات دي فترة كافية إن عمليات الهضم خلاص أخدت كفايتها، وتبتدي أجهزة الجسم تركز على التمرين.

٤.  ياميش رمضان فرصة برضه

الحرمان من أي أكل أثبت فشله، ورمضان يعني مكسرات، وعلى الرغم إن المكسرات من أكتر الحاجات اللي فيها دهون، بس فيها دهون غير مشبعة، اللي هي بتبقى مطلوبة بنسبة معينة في الجسم علشان يعرف يقوم بالوظايف الحيوية بتاعته. ياميش رمضان زى اللوز والبندق والكاجو، ممكن ناخدهم وسط التمرين كـ snack لو بنتمرن بعد الفطار.

٥. مواعيد أكل الألياف والكاربوهيدرات

خلي أكل الألياف اللي في الخضار والفاكهة وقت السحور، وخلي الكاربوهيدرات بنسبة أكبر ساعة الفطار، علشان الألياف بتخلي الجسم شبعان فترة أطول، كمان الكاربوهيدرات مهمة قبل التمرين  لو هتتمرن بعد الفطار علشان الجليكوجين.

٦. النوم وسنينه

 مرحب شهر النوم مرحب، لو شغال فى الحكومة تقريبا هتروح الساعة ١، حاول تنام وربنا يكفيك شر العين من اللي شغالين فى القطاع الخاص اللي بيجوا على المدفع. لكن بالنسبة للناس اللي بتتمرن يفضل النوم بعد ما تيجي من التمرين، أو بعد وجبة السحور الخفيفة، بلاش تنام بعد الفطار على طول علشان الأكل اللي أكلته هـ يتخزن، ومش هـ تساعده على الحرق.

٧. الصيام بيعمل Detox

ممكن ما يكنش للصيام فايدة مباشرة للصائمين على المستوى الصحي، لكن الصيام لساعات طويلة بيعمل detox يعنى تنضيف الجسم من السموم، ودى حاجة جديدة ودارجة في الانظمة الغذائية، وجاتنلنا الفرصة إننا نقعد ٣٠ يوم نستفيد منها. حاول تبص لها من المنظور ده برضه.

Comments: