٦ أبلكيشنز هتساعدك تقضى رمضان بسهولة أكبر

04/05/2019

١- َQibla Connect (آيفون - أندرويد)


مفيد في رمضان وفي غير رمضان. بـ يساعدك عن طريق الـGPS تحدد اتجاه القبلة بالظبط. مفيد لو في مكان جديد  أو وإنت مسافر أو في الشغل مثلا، بالإضافة لوظيفته الأساسية بـ يعرفك مواقيت الصلاة بشكل دقيق وممكن تشغل الأذان وينبهك لمواعيد الصلاة.

٢- Ramadan Legacy (آيفون - أندرويد)


واحد من أفضل الأبلكيشنز المخصصة لرمضان على الإطلاق. واجهته جميلة جدا واستخدامه سهل. الهدف منه يكون المساعد بتاعك طول رمضان على تتبع صلواتك وصيامك وبـ يسمح لك تحط وتتابع أهدافك الشخصية خلال الشهر سواء صلاة التراويح أو الانتظام في الصلاة العادية أو القيام بأعمال خيرية وما شابه.

٣- Coach.me (آيفون - أندرويد)


مش أبلكيشن مخصص لرمضان لكن ممكن جدا الاستفادة منه في الشهر الكريم، الأبلكيشن هدفه الأساسي مراقبة وتكوين عادات جديدة. لو عايز تستغل رمضان في إنك تضيف لنفسك عادة جديدة (الانتظام في الصلاة مثلا)، أو التخلص من عادة (تقليل التدخين مثلا)، البرنامج ده هـ يساعدك تحقق هدفك بطريقة سهلة.

٤- Lose it! (آيفون - أندرويد)

Lose it

شهر العزايم والدب والعك الفشيخ. عادة في رمضان رغم إننا مفروض "بنصوم" وبناكل أقل لكن الحقيقة إن عادة بناكل أكتر وبنطلع وزننا زايد من الكنافة والقطايف والممبار والرقاق والعزايم والولايم. الأبلكيشن ده بـ يساعدك تراقب أكلك وتعد السعرات وتحط أهداف لفقدان الوزن علشان تقدر تحافظ على نفسك خلال رمضان على قد ما تقدر.

٥ - Ramadan 2019 (آيفون - أندرويد)


أشهر أبليكشن لرمضان على جوجل بلاى ستور، بـ ينزل كل سنة نسخة جديدة. البرنامج فيه حاجات كتيرة هـ تساعدك في رمضان. اتجاه القبلة ومواعيد الصلاة ومنبه خاص قبل الصلاة بشوية علشان يفكرك. مجموعة من الأحاديث والأدعية المشهورة وتنبيه لزكاة الفطر وحاجات تانية كتير.

٦- Share the meal (آيفون - أندرويد)


مفيش طريقة أفضل لإنهاء القايمة دى غير بالأبلكيشن ده، بـ يسمحلك تتبرع بقيمة وجبة بالتعاون مع برنامج الغذاء التابع للأمم المتحدة لطفل فقير. قيمة الوجبة نص دولار بس وتقدر بدوسة على موبايلك تـتبرع بسهولة. البرنامج بـ يوريك قيمة فلوسك راحت فين وبـ يوريك صورة الطفل اللي تبرعك وصل له وقصته. نزلوا البرنامج واستغلوا الفرصة وساعدوا حد محتاج.

Comments: