أهم ١٥ باند عربى لازم تسمعهم لو بتحب الروك

17/07/2016

١- كيان / Kayan

اتكونت الفرقة عام ٢٠٠٨ على يد أحمد نبيل ومحمد سمير وهى فرقة بـ تقدم موسيقى الروك ممزوجة بالأغانى العربية. وكيان هى الفرقة الأولى فى مصر اللى قدمت موسيقى الميتال والهارد روك لكن بكلمات عربية، وأشهر أغانيهم: "إلى الجهاد"، و"أرض البلابل"، و"الدجال".

 لحد دلوقتى كيان أطلقت ألبومين:

ألبوم الدجال:

ألبوم بالدم:

٢- دروشة بروجكت / Darwasha project

بدأها محمد درويش (عازف جيتار وعود وملحن) فى ٢٠١٢ وبـ تتميز الفرقة بالمزج بين موسيقى الروك وبين الموسيقى الشرقى بإضافة العود إلى الجيتار الكهربائى فى تجربة فريدة ومختلفة.

٣- ملاذ/ Malaz

أعضاء الباند: محمد عبد الرازق (كلمات والحان وجيتار)، عمرو بشر (ليد جيتار)، ماجد عامر (غناء)، معتز النشار (بيز جيتار)، أحمد الجوهر (درامز). وبـ يتميز الباند بالصولوهات العالية الحماسية اللى بـ يحبها مستمعى الروك زى أغنية ستوكهولم أشهر أغانيهم في مصر.

٤- قرار ازالة / Qarar Ezala

فريق مستقل من الإسكندرية. إنطلق من ميدان التحرير عام ٢٠١١ وبـ يقدم موسيقى الروك بشكل حاز على إعجاب ناس كتير، وأهم أغانى الباند أغنية "انا الكافر" اللى انتشرت بشكل واسع النطاق.

٥- هوا دافى / Hawa Dafi

تأسست فرقة هوا دافى عام ٢٠١١، فى مجدل شمس – الجولان السورى المحتل. والفرقة بـ تلعب مزيكا بـ تمزج ما بين أنماط موسيقية شرقية وغربيه مختلفة وبتناقش فى أغانيها قضايا اجتماعية وسياسية بالإضافة إلى الصراعات اليومية اللى بـ يعانى منها الشباب العربى. أطلقت هوا دافى أول ألبوم عام ٢٠١٥ بعنوان "قصتنا".

٦- أيلول/ Ayloal

فرقة أردنية مستقلة بدأت من مدينة أربد فى بداية شهر سبتمبر / أيلول ٢٠١٣ ومن هنا اكتسبت الإسم. التقى أعضاء الفرقة فى غرفة الموسيقى بجامعة العلوم والتكنولوجيا الأردنية قبل سنتين من تأسيسها.

٧- أندروميدا / Andromida

تعتبر واحدة من اقدم فرق الروك المصرية، أسسها عازف الكيبورد عمرو حسن عام ١٩٨٧ وفازت بالجائزة الأولى فى مهرجان "مارلبورو ميوزك" عام ١٩٩٤. وهى بـ تتكون من عمرو حسن على الكيبورد، وألى سالم على الإلكتريك جيتار، ودكتور أحمد أنور على بيز جيتار، وشريف الشرقاوى على الدرامز.

٨- ملاكى القاهرة / Mallaky el Qahera

واحدة من الباندات اللى بـ بتكتب وتألف الموسيقى الأصلية الخاصة بيها، نشأت الفرقة فى ٢٠١٠ على يد الأمير وجوزيف.

٩- بالعكس / Bel3aks

 فرقة فلسطينية تتميز بالتمرد والخروج عن المألوف على مستوى الكلمات والموسيقى التى تقدمها وبـ تحرص على كسر التابوهات الموسيقية التقليدية المعتادة مثل أغنية " زلزال" اللى تعتبر أشهر أغانى الباند. اتكلمنا عنها قبل كده فى مقال عن الباندات الأندرجراوند.

١٠- بركة باند / Baraka Band

يقدم الباند أغانى الراحل العظيم الشيخ امام عيسى والرائع أحمد فؤاد نجم بـ توزيع روك معاصر بالإضافة اللى اشعار عبد الرحيم منصور ونجيب سرور وكمان أغانى من تاليف شباب الشعراء المعاصرين. اتأسست الباند فى ٢٠٠٧ على إيد كل من وسام سلطان ومريم صالح.

١١- جدل / Jadal

أسس الفرقة محمود ردايدة (مؤلف ومنتج وعازف جيتار) عام ٢٠٠٣، وتعتبر جدل من أول فرق الروك فى الشرق الاوسط وقدرت تعمل لنفسها جماهيرية ضخمة فى المنطقة وكانت البداية لما قدمت الفرقة أغنية " التوبة" لعبد الحليم حافظ باستخدام الروك ولقت نجاح كبير. وكانت من ضمن ألبوم "روك عربى" اللى أصدروه عام ٢٠٠٩ واللى بـ يتكون من ١٤ أغنية والتانى فى ٢٠١٢ بعنوان "الماكينة".

١٢- آخر زفير / Akher Zafer

تأسست فى ٢٠٠٧ وقدمت أعمال ناجحة كتيرة زى "آخرته لحن حزين" واللى كانت من ضمن ألبوم "اعكس ثقافة" اللى حقق شعبيه كبيرة فى الوطن العربى.

١٣- المربع / El Moraba3

تتكون فرقة المربع من محمد عبد الله (باص كهربائى وغناء وكتابة الأغاني)، عُدى شواقفة (جيتار كهربائى ومزج إلكترونى وإنتاج)، ضرار شواقفة (طبول وإخراج فيديو وتصوير). بدأت فى الأردن فى ٢٠٠٩ وأصدرت أول ألبوم ليها فى يوليو ٢٠١٢ بعنوان “المربع” ويمكن تعتبر أشهر باند روك فى الشرق الأوسط.

١٤- Haijan / هيجان

أسسها علاء وردى (موسيقى وملحن وموزع موسيقى ومهندس صوت) فى ٢٠١١، مكونة منه وأربعة أعضاء تانيين، وأطلقوا أغنيتهم الأولى بعنوان: وين الكلام.

وبعدين الباند أصدرت أول ألبوم كامل ليها عام ٢٠١٣ بعنوان: يا بى.

١٥- خبز دولة / Khebz Dawla

فرقة سورية، اتشكّلت فى أواخر عام ٢٠١٢، وطلعت أوّل ألبوم لها تحت عنوان "خبز دولة" فى سبتمبر ٢٠١٥.

الباند اتشهرت عالمياً لما أعضائها سابوا سوريا ووصلوا إلى الشواطئ اليونانية وقاموا بتوزيع نسخ عن أعمالهم وأحيوا حفلات فى بلدان أوروبيه مختلفة.

لو ليك فى الراب، جرب الليستة دى.

Comments: