أخطر ٥ شواطئ في العالم

19/08/2018

بمناسبة الصيف وإجازات العيد الطويلة والآلاف اللي بيزحفوا على الشواطئ دلوقتي، حبينا نعرفك على أكتر 5 شواطئ خطرة، والنزول فيها ممنوع أو على مسؤوليتك الشخصية.

١. كيب تريبيلاشون - Cape Tribulation - أستراليا

هو مكان ساحر وخلاب موجود في أستراليا، وعلى قد ماهو تحفة من تحف الطبيعة على قد ماهو في منتهى الخطورة، وده بسبب الكائنات اللى عايشة هناك. كلها كائنات خطرة ابتداءً من الحشرات للقناديل للتماسيح وغيره. فيه شاطئ هناك اسمه مايل - Myall، الشاطئ ده بتعيش فيه قناديل البحر بس مش زي اللي عندنا في الساحل اللي بتحس إنه كيس لمس رجلك وبعد كده عمللك حرق، لأ! القناديل هناك خطرة لدرجة إنها ممكن تموت. جنب اللوحة اللى بتحذرك من القناديل، فيه محلول خل محطوط ممكن تستعمله لو اتلسعت، وبعد كده تجري على أقرب دكتور.

٢. هاناكابياي - Hanakapiai beach - هاواي

كلنا عارفين سحر شواطئ "هاواي"، بس مش معنى كده إنه مكان آمن دايما. الشاطئ أبو اسم معقد ده، معروف عنه تيارات المياه العنيفة اللي بتغرق الناس، ويقال من كتر ما التيارات قوية، بتشد الناس وهم واقفين على الشط وتغرقهم.

٣. جانسباي - Gansbaai - جنوب أفريقيا

ماتجيش تقول لى أصل ظهر قرش في خليج نعمة، ولا العين السخنة، تخيل أما يظهرلك أخطر نوع سمك قرش فى العالم وحجمه أضعاف أضعاف حجم القرش الغلبان اللي عندنا؟ فيه منطقة جنب جزيرة داير في جانسباي اسمها "زقاق سمك القرش - Shark Alley"، وبيعيش فيها سمك القرش الأبيض الضخم (بتاع الأفلام ده)، طبعا يعتبر الشاطئ من أخطر الشواطئ في العالم لأن السمك ده بيجي على الشاطئ علشان يصطاد الفقمة من هناك.

٤. فريزر Fraser  - أستراليا

الجزيرة دي فى أستراليا، وعلى قد ما هي مكان خيالي بس الشاطئ هناك عامل ميكس مابين تيارات سحب قوية، وقناديل بحر مميتة، وسمك قرش خطر، وتماسيح فتاكة، وتعابين سامة، وعناكب مخيفة. تقريبا فريزر لامة كل اللي فوق ده.

٥. كيلوا Kilauea - هاواي

خلصنا من قناديل البحر وسمك القرش والسحب. هـ تعمل إيه لو وإنت بتعوم بركان فار وقرر ينزل الحمم بتاعته مطرح مانت بتعوم؟ فيه شاطئ في هاواي معروف برمتله السودا، وده بسبب البراكين اللي في المكان، ودايما الناس مترقبة إن البركان يفور في أي لحظة.

Comments: