دليلك لانقاذ الحيوانات الضالة فى مصر

14/08/2016

كتير مننا بـ يلاقى حيوانات ضالة، سواء مريضة، أو حد اتخلى عنها، أو حد أذاها، أو ممكن تكون صغيرة إنها تقدر تعيش فى الشارع وبالتالى هـتموت. الخبر الكويس إن فيه منظمات وحركات تقدر تساعدك فى ده.

الناس لما بـ تلاقى حالات، بـ تدور على أقرب مكان لمجئ حيوانات علشان يودوا الحيوان لهم. المشكلة أن الملاجئ مليانة على آخرها وهم محتاجين حد يساعدهم أصلا! أنت ممكن تساعد وتاخد ثواب فوق ما تـتخيل.

بس فى الأول نتكلم عن الحاجات اللى ممكن تقدمها كمساعدة للحيوان:

إتبنى، استضيف اكفل، اتبرع

Adopt and foster

التبنى هو إنك تقرر تخلى الحيوان يعيش عندك فى البيت ويبقى جزء من العائلة، ويبقى حيوانك الأليف وترتبط بيه مدى العمر. بالتبنى، أنت بتساعد حيوانين فى وقت واحد؛ أولا هـ توفر بيت لواحد فى الملجأ وبكده بـ تدى مكان الحيوان ده لحيوان تانى محتاج رعاية الملجأ. الأسئلة اللى بـ تيجى على دماغ الناس إنه إيه المشكلة أن الحيوان يقعد فى الملجأ؟ الحيوان كائن زينا بالظبط، محتاج بيئة مستقرة علشان يقدر يمارس حياته بشكل طبيعى جدا، وكتر التغيير بـ يأثر فى صحة الحيوان النفسية والجسدية بطريقة مؤذية. وثانيا الحيوانات مش بـ تاخد الإهتمام والحب اللى بـ يحتاجوه  بسبب عدد الحيوانات الكبير فى الملجأ وبـ يبقى الموضوع أصعب وأخطر لو كان مع الجراوى والقطط صغيرة، ومن السهل يتنقل لهم أمراض وفيروسات قاتلة من الحيوانات الكبيرة علشان بـ يكونوا لسه صغيرين على التطعيمات ( زى الأطفال بالظبط!).

ولو أنت مش مستعد لإرتباط زى ده، أو ماعندكش الوقت أو خلافه، فأنت ممكن تستضيف الحيوان فى بيتك لفترة مؤقتة. والفترة دى بـ تعتمد على حالة الحيوان اللى عندك سواء مريض، أو محتاج رعاية معينة، أو حتى بـ يبقى حيوان صحى وسليم تماما بس بـ يبقى محتاج يقعد فى مكان مؤقت لحد ما يلاقوله بيت دائم. المثال هـ يوضح أكتر: أنت ممكن تستضيف حيوان كان متعرض لحادثة، والملاجئ مش قادرة تستقبل حالته بسبب الضغط فى العدد اللى عندها، أو علشان الحالة محتاجة رعاية خاصة. فالحيوان بـ يقعد عندك الفترة اللى المفترض يخف فيها، وأنت بـ تساعده برعايتك له، من ناحية العلاج، الأكل واللعب والحب. أنت بكده بتوفرله بيئة صحية يقدر يكبر فيها ويبقى حيوان معافى سليم. ميزة الاستضافة إنك بـ تعيش تجربة رعاية وتربيه الحيوان، وفى المقابل بتاخد حب وسعادة وطاقة إيجابيه من الروح اللى أنت أنقذتها.

ولو حابب تساعد، وماعندكش الفرصة إنك تـتبنى أو تستضيف وترعى، أنت ممكن تـتكفل بحيوان معين أو حالة معينة جوا الملجأ. ممكن تتحمل المصاريف والمستلزمات الكاملة لرعاية الحيوان لحد ما يخف أو يلاقوا حد يتبناه.

مصدر الصورة: Ahmed Hamed

وأخيراً، لو مش قادر على كل ده، فأنت ببساطة ممكن تتبرع بأى مبلغ أو مستلزمات زى المراتب والفوط والأكل والشنط .. الخ  للملاجئ والجهات وهم هـ يتكفلوا بكل حاجة.

مع العلم إن المؤسسات دى ـ بتقوم على مبادرات شخصية، غير مدعومة من الحكومة، وبـ تبقى جهات مش بـ تسعى للربح بأى شكل، فأى مساعدة بـ تفرق وبـ تقدر تنقذ حياة الحيوانات وتحسن من ظروف معيشتها. أنت ممكن كمان تتطوع فى أنشطة التوعية مثلا اللى بـ تعملها الجمعيات والملاجئ من وقت لوقت، أو حملات بـ تتعمل علشان ينزلوا يأكلوا حيوانات الشارع، أو تمنع الممارسات الوحشية اللى الحكومة بـ تعملها علشان تتخلص منهم عن طريق تسميمهم.

السم ده محرم وغير شرعى، وممكن يوصل للإنسان بسهولة، غير إنه بـ يخلى الحيوان يعانى جدا ويتعذب قبل ما يموت. وممكن تمنع حد بـ يعذب حيوان فى الشارع أو تحاول تخلص الحيوان منهم، أو يا أخى حط شوية مياه تحت البيت عندك فى الحر ده!  الموضوع طلع كبير بس سهل، مش كده؟

جمعية رسالة مؤخرا ابتدت تـتحرك بخصوص حقوق الحيوان وعاملين حملات لإطعام حيوانات الشوارع، وبـ يحتاجوا متطوعين، ممكن تـتواصلوا معاهم عن طريق صفحتهم:

أسماء الملاجئ الموثوق بيها وأنواع خدماتهم

دى لستة للملاجئ والمبادرات والجمعيات الموثوق فيها، اللى بـ توريلك كل مليم اندفع وراح لفين، وبـ تفضل مخلياك متابع الوضع عندهم بشفافية، وكمان بـ تعامل الحيوانات بكل إنسانية وخبرة.

* مش معنى أن فيه أسماء ما اتحطتش على اللستة تبقى جهات غير موثوق فيها أو غير إنسانية.

١. .ESMA -EGYPTIAN SOCIETY FOR MERCY TO ANIMALS  -الجمعية المصرية للرحمة بالحيوان

٢.  جمعية ESAF Page (The Egyptian Society of Animal Friends)

٣. Animal Haven

الجمعيات والملاجئ  دى بـتقدم الرعاية الطبيه للحيوانات زى الكلاب والقطط والأحصنة والحمير، وبـ تقدم برنامج الـ  TNR- Trap-neuter-return، البرنامج ده الغرض منه التحكم فى أعداد الحيوانات الضالة (كلاب - قطط) بطرق رحيمة بعيدا عن الضرب بالنار والسم.

هو مكون من كذا مرحلة:

أول مرحلة هي Trap - والمقصود إنهم بياخدوا أو بـ يصطادوا الحيوان من الشارع أو مكان ما هو موجود، وبعد كده تتم عملية التعقيم neuter للذكور وspay للإناث، وهى عبارة عن إزالة الرحم للحيوانات الإناث، أو الخصى للذكور، علشان يمنعوا تكاثر الحيونات، وبـ يدوهم فترتهم فى النقاهة. وأخيرا return، بـ يرجعوا الحيوان لمكان ما اصطادوه أو أخدوه علشان يكمل حياته الطبيعية. ويعتبر الـ TNR من أكتر الأساليب الرحيمة بالحيوانات ومدعومة ومؤيدة من مؤسسات وحقوقين كتيرة منها (American Society for the Prevention of Cruelty to Animals (ASPCA - المجتمع الأمريكى لمنع الوحشية ضد الحيوانات. وكمان عندهم خدمة الـ animal boarding، بمعنى إنك لو مسافر وهـ تبعد عن البيت فترة، فأنت ممكن تسيب حيوانك عندهم وهم هـ يرعوه ويعتنوا بيه ويدوا له مساحته فى الحركة واللعب.

مع العلم إن ESMA وESAF ما بقاش عندهم الإمكانية والأماكن لإستقبال الحيوانات، فهم دائماً بيدوروا على متبنيين وناس ممكن تستضيف الحيوانات عندها بصورة مؤقتة.

ولو حابب تتبرع ممكن تتواصل معاهم وهم هـ يدوك حسابهم البنكى، وفيه طرق تبرع عن طريق الموبايل وغيره مشروحة بتفاصيل فى صفحاتهم.

٤. مبادرة معادى TNR - Maadi TNR initiative -

هى مبادرة اتعملت على يد مجموعه من سكان المعادى، وهدفهم إنهم يعرفوا ويثقفوا الناس عن الممارسات الوحشية ضد الحيوانات، وبيحاولوا إنهم يحدوا ويتحكموا فى انتشار وتكاثر الحيوانات الضالة فى شوارع المعادى.

للتواصل: هنا و هنا

٥. منظمة Touch of life

المنظمة دي ابتدت فى شقة، ووصلت إنها بقت ملجأ بـ يضم فوق الـ ٤٠٠ كلب وقطة وحمار، والمكان ده بـ يستقبل حالات الحيوانات اللى عندها إصابة أو إعاقة أو حيوانات صحابها قرروا يتخلوا عنها.

هم محتاجين تبرعات ومساعدات مادية وتطوع. وطبعا تقدر تـتبنى أو تستضيف حالات.

٦. HOPE - Egyptian Baladi Rescue & Rehabilitation

هى منظمة عندها شبكة من المتخصصين والمتطوعين بـ يقدموا خدمات طبية طارئة وعاجلة، وكمان متخصصة فى علاج حالات الجرب الصعبة. مع العلم إنهم محتاجين تبرعات من أى نوع، أكل، مستلزمات .. الخ.

٧. The dog network

هو موقع عبارة عن شبكة بيلم فيها المعلومات والنصائح والمقالات المختصة بتربية الحيوانات والكلاب خاصة.ومجمع لك الأماكن اللى بـ تقدم الخدمات البيطرية، وتمشية الكلاب، وتدريبهم وأماكن الإقامة المؤقتة لهم. وكمان مجمعين أسماء المطاعم والكافيهات اللى بتسمح بدخول الحيوانات، والجناين اللى ممكن الكلاب تتمشى فيها، وغيره، ممكن تلاقى كل ده على موقعهم.

Comments: