ليه بتحل مشاكل الناس أسهل من حل مشاكلك؟

كلنا بنتعامل مع مشاكل في حياتنا سواء تخصنا احنا أو تخص حد من الدايرة المحيطة بينا زي أهلنا وصحابنا أو حتى زمايلنا.. بس لما نيجي نواجه مشاكلنا بنلاقي الموضوع صعب ومابنوصلش لحل بسهولة أو مابنوصلش لحل أصلا أما مشاكل الآخرين بنحلها
زي السكينة في الحلاوة وبأحسن الطرق كمان.. طب إيه السر؟!
حسب موقع People Daily

ليه سهل نحل مشاكل الآخرين؟ 

1- انت مش مكانهم:

عشان انت بره المشكلة وبره الصداع بتاعها.. ومش جوا دماغ الناس دي ولا عايش الشكوك والخوف والتحديات اللي هم عايشينها فعليًا.. هنا ده بيخليك تشوف الموضوع كله من شكل محايد وموضوعي مافيهوش أي عاطفة لأنك كمان ماعديتش بالتجربة الإنسانية اللي هم فيها ولا الماضي أو الحاضر اللي هم فيه وهي دي النقطة الفارقة.. من الآخر كده وانت بره رايق ودماغك صافية ومعندكش معاناة وهنا تطلع حلول وبدايل للحلول دي كمان.. حاجة كده يارب الأفكار الرايقة دي في مشاكلي 

2- مرايتك عامية

أصل حل المشاكل هو إنك تواجهها وتدخل فيها كده تاخد غطس عشان تفهمها وتعرف تتعامل معاها.. فا سهل أوي تقدم نصيحة لواحد في مشكلة عشان انت مش هتعيشها.. انت مجرد هتحلها أو حتى هتقدم نصيحة فيها.. نرجع تاني لإن المواجهة صعبة لأنك وقتها ممكن تكتشف إنك لا سمح الله محتاج تتغير أو تبذل مجهود ودي حاجات لا سنك ولا لياقتك يسمحولك بيها.. ماحدش عايز يتعب كله عايز الحاجة على الجاهز

3- النتيجة

ودي مرتبطة بأول حاجة وهو إنك عادي تطلع 60 حل أو حتى مليون بس في الآخر مين اللي هيشيل الشيلة؟ مين اللي ممكن يتعور بسبب الحل ده؟ أكيد مش انت.. هو صاحب المشكلة فساعتها هتتغاضى عن كل حاجة وتركز إنك تطلع حلول بس.. إنما صاحب المشكلة بينزله الحل مع الخازوق بتاعها باكيدج على بعض فبيقلق

في الأخر سواء بتحل مشكلتك أو مشكلة حد تاني ماتخليش السلبيات تأثر على تفكيرك وتخطيطك أو حتى تأخرك إنك تاخد قرار وتضيع عليك الوقت المناسب.. ممكن تكون عاطفي بس حاول تتحكم في عاطفتك عشان ماتأثرش على تفكيرك.. وحاول تركز على الحاجات المفيدة وهي تحديد المشكلة وتحديد الأسباب الأساسية ليها وتدور على حلول مختلفة سواء من دماغك أو تاخد رأي الناس وتشوف الأنسب من وجهة نظرك وتبدي تتعامل وتشوف النتيجة هتكون إيه.